Markus 8:1-38
8 Paksa si e, lit ka nterem jelma si pulung, janah la lit pangan kalak e. Emaka idilo Jesus murid-murid e, nina,
2 “Mekuah ateku jelma si nterem e, erkiteken nggo telu wari kalak e ras aku janah kai pe la lit si man panganenna.
3 Adi kusuruh kalak e mulih sangana melihe, banci kari kalak e lumben bas perdalanen, janah piga-piga rehna arah ingan si ndauh nari.”
4 Tapi ngaloi murid-muridna e, “I bas ingan si melungen enda, ja nari banci sidat roti gelah kalak e besur?”
5 Nungkun Jesus, “Piga lit roti bas kena?” Nina kalak e, “Pitu.”
6 Emaka isuruh Jesus jelma si nterem e kundul i bas taneh. Kenca si e, ibuatna pitu roti e, ikatakenna bujur man Dibata, icepik-cepikkenna roti e, kenca si e mulai iberekenna man murid-muridna guna ibagiken, jenari ielaken kalak e man jelma si nterem.
7 Lit ka piga-piga ikan si kitik i bas kalak e. Kenca ertoto, isuruhna ka murid-murid mbagikenca.
8 Emaka man kalak e ngayak besur, janah ipepulungna sisana dem pitu keranjang si galang buena.
9 Paksa si e, lit kira-kira 4.000 dilaki. Kenca si e isuruh Jesus kalak e mulih.
10 Mis inangkihi Jesus perahu ras murid-muridna janah lawes ku daerah Dalmanuta.
11 I je reh me kalak Parisi janah mulai sijawapen ras Jesus. Ipindo kalak e bas ia nari tanda arah surga guna nguji ia.
12 Emaka ceda kel atena janah nina, “Engkai maka ipindo kalak enda tanda? Situhuna la lit tanda kai pe si ibereken kari man kalak enda.”
13 Emaka itadingkenna kalak e, nangkih ka ia ku perahu janah nyebrang ku pantai si deban.
14 Tapi, lupa kalak enda maba roti, kai pe la lit bas kalak e i perahu, selain sada roti ngenca.
15 Ipersingeti Jesus kalak enda alu tegas, “Teruslah buka mata kena. Hati-hatilah nandangi ragi kalak Parisi ras ragi Herodes.”
16 Emaka mulai sijawapen murid-murid e erkiteken la lit roti kalak e.
17 Ngidah si e, nina Jesus, “Engkai maka kena sijawapen kerna la lit roti? Lenga kin isadari kena ras iangkai kena? Lenga kin enda jelas i bas pusuh kena?
18 ‘Lit mata kena tapi la erpengidah, lit cuping kena tapi la erpemegi.’ La kin inget kena,
19 sanga kucepik-cepikken lima roti man 5.000 dilaki, piga keranjang buena sisana si ipepulung kena?” Ngaloi kalak e, “Sepulu dua.”
20 “Sanga kucepik-cepikken pitu roti man 4.000 dilaki, piga keranjang si galang sisana si ipepulung kena?” Ngaloi kalak e, “Pitu.”
21 Emaka nina Jesus, “Lenga ka kin iangkai kena?”
22 Seh me kalak e i Betsaida. I je itaruhken kalak man bana sekalak dilaki si pentang, janah mindo kel kalak e gelah ijemak Jesus ia.
23 Emaka ijemakna tan dilaki si pentang e janah ibabana ku darat kuta. Kenca icidurina matana, itamaken Jesus tanna ku datasna janah nina, “Kai si idahndu?”
24 Inen dilaki e ku lebe janah nina, “Kuidah jelma, tapi bagi batang kayu si erdalan-dalan.”
25 Itama Jesus mulihi tanna ku mata dilaki e, jenari jelas me pengidahna. Pengenenna nggo malem, janah banci idahna kerina alu jelas.
26 Emaka isuruh Jesus ia mulih, nina, “Ula nari kam masuk ku kuta e.”
27 Jenari lawes Jesus ras murid-muridna ku kuta-kuta i Kesarea Pilipi. I bas perdalanen mulai ia nungkun man murid-muridna, “Nina kalak, ise kin aku?”
28 Ngaloi kalak e, “Johanes Peridiken, si debanna ngatakenca Elia, janah lit ka si ngatakenca salah sada nabi.”
29 Nungkun ka ia man kalak e, “Adi menurut kena, ise kin aku?” Ijawap Petrus, “Kam kap Kristus.”
30 Erkiteken si e ilarang Jesus kalak e alu tegas gelah ula iceritakenna man ise pe kerna ia.
31 Selain si e, mulai iajarkenna man kalak e maka Anak manusia arus ngenanami melala kiniseran janah itulak peminpin-peminpin ras imam-imam kepala bage pe ahli Undang-Undang Musa jenari ibunuh, janah keke kenca telu wari.
32 Alu terus terang ikataken Jesus kerna si e. Tapi itarik Petrus ia ku samping janah mulai ipersingetina ia.
33 Ipudiken Jesus ia, inenna murid-muridna jenari ipersingetina Petrus, nina, “Laweslah ku pudiku, Setan! Perban kai si iukurindu labo perukuren Dibata tapi perukuren manusia.”
34 Kenca si e, ilebuhna jelma si nterem ras murid-muridna janah nina, “Ise atena ngikutken aku, lanai ia banci nggeluh man dirina sendiri janah arus iangkatna tiang siksanna* bage pe terus ikutkenna aku.
35 Sebap ise pe si atena nelamatken kesahna,* kebenen kesahna nge pagi, tapi ise pe si kebenen kesahna erkiteken aku ras erkiteken berita si meriah, selamat nge pagi.
36 Situhuna, kai kin gunana adi sekalak jelma ndatken kerina si lit bas doni enda tapi kebenen kesahna?*
37 Situhuna, kai kin si banci ibereken sekalak jelma ganti kesahna?*
38 Kalak enda la setia* ras erdosa. Ise pe i bas kalak enda nari si mela nandangi aku ras kata-kataku, Anak manusia pe mela ka nge pagi nandangi ia sanga reh Anak manusia e i bas kemulian Bapakna ras malekat-malekat si badia.”
Cataten i teruh
^ Nen Kamus.
^ Ntah “kegeluhenna.”
^ Ntah “kegeluhenna.”
^ Ntah “kegeluhenna.”
^ As. “Kalak enda erlua-lua.”
