Markus 9:1-50
-
Salih rupa Jesus (1-13)
-
Anak si kerasuken ipepalem (14-29)
-
La lit si la mungkin man kalak si erkiniteken (23)
-
-
Kematen Jesus inubuatken ka (30-32)
-
Ipersoalken murid-murid kerna ise si mbelinna (33-37)
-
Ise si la ngelawan kita, ras kita nge (38-41)
-
Batu si erban tertuktuk (42-48)
-
“Lit min sira i bas kena” (49, 50)
9 Kenca si e, nina, “Situhuna, lit piga-piga kalak si tedis i jenda si la pagi ngenanami kematen sope idahna lebe Kerajan Dibata reh alu kuasa.”
2 Enem wari kenca si e, ibaba Jesus me Petrus ras Jakup bage pe Johanes, kalak e saja ngenca ku das deleng si meganjang. Kenca si e, salih rupa Jesus i lebe-lebe kalak e.
3 Uisna si arah darat mulai erndilap, ndauh mbentaren asangken uis si apai pe si banci ipebentar si lit i doni.
4 Kalak e pe ngidah Elia ras Musa ercakap-cakap ras Jesus.
5 Emaka nina Petrus man Jesus, “O Guru,* meriah ukur kami i jenda. Pediat kami erban telu kemah: sada man bandu, sada man Musa, janah sada nari man Elia.”
6 Situhuna, lanai itehna kai si man katanken, perban mbiar kel kalak e.
7 Jenari reh me embun nutupi kalak e, janah terbegi sora arah embun e, “Enda me AnakKu, si Kukelengi. Begikenlah ia.”
8 Kenca si e rempet inen kalak e ku sekelilingna janah lanai idahna ise pe selain Jesus.
9 Sanga kalak e nusur i bas deleng nari, alu tegas ilarang Jesus kalak e cerita man ise pe kerna kai si nggo idah kalak e, seh asa Anak manusia keke i bas si mate nari.
10 Itama kalak e ku pusuhna* kata-kata e, tapi icakapkenna sapih-sapih ia kai erti keke i bas si mate nari.
11 Emaka nungkun kalak e man Jesus, “Engkai maka ahli-ahli Undang-Undang Musa ngataken maka Elia arus reh leben?”
12 Ngaloi Jesus, “Tuhu, Elia leben reh janah ipesikapna kerinana. Tapi uga maka banci lit tertulis kerna Anak manusia si arus ngenanami melala kiniseran ras ihina?
13 Kukataken man kena, Elia situhuna nggo reh janah iperlakoken kalak ia bagi ate-atena saja, bagi si nggo tertulis kerna ia.”
14 Sanga idahi kalak e murid-murid si deban, idahna nterem kel jelma ngkelilingi murid-murid e, i je ahli-ahli Undang-Undang Musa sangana sijawapen ras kalak e.
15 Tapi kenca kerina ngidah Jesus, sengget kalak e, emaka kiam kalak e ngalo-ngalosa.
16 Nungkun Jesus, “Kai si ipersoalken kena ras kalak e?”
17 Ngaloi sekalak i bas jelma si nterem e nari, “O Guru, kubaba anakku si dilaki bandu erkiteken irasuki malekat jahat ia si erbanca ia bisu.
18 Tiap irasuki malekat jahat e ia, idampes-dampeskenna ia ku taneh, janah rugup babahna, ipenna pe erderep ras bene gegehna. Enggo kupindoken man murid-muridndu mpelawessa, tapi la kalak e ngasup.”
19 Nina Jesus man kalak e, “O kena kalak si la erkiniteken, asa kai nari dekahna aku arus terus ras kena? Asa kai nari dekahna aku arus sabar nandangi kena? Baba ia man bangku.”
20 Emaka ibaba kalak e me anak ndai man bana, tapi sanga ngidah Jesus, mis idampesken malekat jahat e anak ndai ngayak kejang-kejang. Kenca ndabuh ku taneh, terus ia guling-guling janah babahna pe rugup.
21 Jenari nungkun Jesus man bapak anak e, “Enggo asa dekahna ia bagena?” Ngaloi ia, “Kitik-kitikna nari,
22 janah rusur idampeskenna ia ku bas api bage pe ku bas lau guna munuh ia. Tapi adi ngasup kam, mekuah min atendu janah sampati min kami.”
23 Nina Jesus, “Kai nindu, ‘Adi aku ngasup’? La lit si la mungkin man kalak si erkiniteken.”
24 Minter ngerana bapak anak e alu megang, “Erkiniteken nge aku! Sampati min aku gelah tambah kinitekenku!”
25 Sanga idah Jesus jelma si nterem siasak-asaken ndahi kalak e, isergangna malekat jahat e, nina, “Kam malekat jahat si erbanca bisu ras pasek, kuperentahken kam gelah ndarat i bas ia nari, janah ula nari rasuki ia!”
26 Kenca serko janah ibanna anak e kejang-kejang, ndarat malekat jahat e. Anak e tempa nggo mate, emaka nterem si ngataken, “Ia nggo mate!”
27 Tapi ijemak Jesus tanna janah ipekekena, jenari cinder ia.
28 Emaka kenca masuk Jesus ku bas sada rumah, nungkun murid-muridna sanga la lit kalak si deban, “Engkai maka la banci ipelawes kami?”
29 Nina ngaloi, “Si bagenda alu toto ngenca banci mpelawessa.”
30 Berkat me kalak e je nari janah lawes arah Galilea, tapi la atena ise pe metehsa kerna si e.
31 Sebap sangana iajarina murid-muridna janah ikatakenna, “Anak manusia ihianati pagi bas tan musuhna, janah ibunuh kalak e me ia. Tapi aminna pe ibunuh, keke ia pagi kenca telu wari.”
32 La iangkai kalak e kata-katana, tapi mbiar kalak e nungkuni ia.
33 Seh me kalak e i Kapernaum. Sanga i bas rumah, nungkun Jesus man kalak e, “Kai nge ndai si ipersoalken kena bas dalan?”
34 Sinik saja kalak e, sebap si ipersoalkenna i bas dalan eme kerna ise si mbelinna i bas kalak e.
35 Emaka kundul ia, idilona 12 rasul e janah nina, “Ise pe si atena jadi si pertama, ia arus jadi si terakhir arah kerina janah ngelayani kerinana.”
36 Jenari ilebuhna sekalak anak-anak janah ipecinderna ia i tengah-tengah kalak e. Asum itamana tanna i bas bara anak e, nina man kalak e,
37 “Ise pe si ngaloken anak-anak si bagenda i bas gelarku, ialokenna ka nge aku. Janah ise pe si ngaloken aku labo ngenca ialokenna aku, tapi ialokenna ka Ia si nuruh aku.”
38 Nina Johanes man Jesus, “O Guru, lit idah kami sekalak jelma mpelawes malekat jahat alu make gelarndu, emaka icubaken kami ngambati ia erkiteken la ia ikut ras kita.”
39 Tapi nina Jesus, “Ula cubaken kena ngambati ia, sebap la lit kalak si banci ngelakoken perbahanen si dem kuasa i bas gelarku jenari minter ka ikatakenna si la mehuli kerna aku.
40 Sebap ise pe si la ngelawan kita, ras kita nge.
41 Janah ise pe si mereken sada cangkir lau inemen man kena erkiteken kena pengikut Kristus, situhuna, ia pasti la kebenen upahna.
42 Tapi ise pe si erbanca bene kiniteken salah sada i bas kalak si kitik enda si nggo erkiniteken, ulin igantungken sada batu penggilingen si galang* ku kerahungna, jenari ibenterken ia ku lawit.
43 “Adi tanndu erban kam erdosa,* potonglah e. Ulin kam cacat tapi ndatken kegeluhen asangken lit dua tanndu tapi masuk ku Gehena,* ku bas api si la banci imateken.*
44 *——
45 Janah adi nahendu erban kam erdosa,* potonglah. Ulin sada ngenca nahendu tapi ndatken kegeluhen asangken lit dua nahendu tapi iambekken ku Gehena.*
46 *——
47 Adi matandu erban kam erdosa,* ambekkenlah. Ulin sada ngenca matandu tapi masuk ku bas Kerajan Dibata asangken lit dua matandu tapi iambekken ku Gehena,*
48 si i je bernga ras api pe la banci mate.
49 “Sebap kerina kalak arus isirai alu api.
50 Sira e mehuli, tapi adi sira e lanai masin, alu kai kin iban kena maka banci masin mulihi? Lit min sira i bas kena, janah tetaplah erdame sada ras si debanna.”
Cataten i teruh
^ As. “Rabbi.”
^ Ntah banci saja “Irahasiaken kalak e.”
^ Ntah “batu penggilingen si itarik kelede.”
^ As. “tertuktuk.”
^ Nen Kamus.
^ Maksudna, ikernepken si rasa lalap.
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ As. “tertuktuk.”
^ Nen Kamus.
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ As. “tertuktuk.”
^ Nen Kamus.
