Matius 1:1-25
1 Buku kerna sejarah* Jesus Kristus,* anak Daud, anak Abraham:
2 Abraham eme bapak Isak;Isak eme bapak Jakup;Jakup eme bapak Juda ras senina-seninana;
3 Juda eme bapak Peres ras Sera, nande kalak e eme Tamar;Peres eme bapak Hesron;Hesron eme bapak Aram;
4 Aram eme bapak Aminadap;Aminadap eme bapak Nahesson;Nahesson eme bapak Salmon;
5 Salmon eme bapak Boas, nande Boas eme Rahap;Boas eme bapak Obet, nande Obet eme Rut;Obet eme bapak Isai;
6 Isai eme bapak Raja Daud.Daud eme bapak Salomo, nande Salomo eme diberu si pernah jadi ndehara Uria;
7 Salomo eme bapak Rehabeam;Rehabeam eme bapak Abia;Abia eme bapak Asa;
8 Asa eme bapak Josapat;Josapat eme bapak Joram;Joram eme bapak Usia;
9 Usia eme bapak Jotam;Jotam eme bapak Ahas;Ahas eme bapak Hiskia;
10 Hiskia eme bapak Manase;Manase eme bapak Amon;Amon eme bapak Josia;
11 Josia eme bapak Jekonia ras senina-seninana. Kalak enda lahir sanga ibuang ku Babilon.
12 Paksa pembuangen i Babilon, lahir me anak Jekonia eme Sealtiel;Sealtiel eme bapak Serubabil;
13 Serubabil eme bapak Abiud;Abiud eme bapak Eliakim;Eliakim eme bapak Asor;
14 Asor eme bapak Sadok;Sadok eme bapak Ahim;Ahim eme bapak Eliud;
15 Eliud eme bapak Eleasar;Eleasar eme bapak Mattan;Mattan eme bapak Jakup;
16 Jakup eme bapak Jusup. Jusup eme dilaki Maria. Arah Maria lahir me Jesus si igelari Kristus.
17 Jadi kerina kesusuren arah Abraham nari seh ku Daud lit 14 kesusuren; Daud nari seh ku pembuangen i Babilon lit 14 kesusuren; pembuangen i Babilon nari seh ku Kristus lit 14 kesusuren.
18 Bagenda me kerna kelahiren Jesus Kristus. Maria, nande Jesus, nggo ertunangen ras Jusup. Tapi sope erjabu, nggo hamil Maria erkiteken kesah si badia.
19 Jusup, tunangen* Maria e, kalak si bujur. La atena erban Maria mela i lebe-lebe jelma si nterem. Emaka iceraikenna* atena ia alu sinik-sinik.
20 Tapi kenca iukurina kel kerna si e, idahna malekat Jahwe* reh i bas nipina. Nina, “O Jusup, kesusuren Daud, ula kam mbiar njadiken Maria diberundu. Sebap anak si i bas beltekna* e lit erkiteken kesah si badia.
21 Ilahirkenna pagi sekalak anak dilaki janah arus ibanndu gelarna Jesus,* sebap ia me pagi si nelamatken kalak i bas dosa nari.”
22 Kerina enda tuhu-tuhu terjadi gelah seh kai si ikataken Jahwe arah nabiNa, nina,
23 “Hamil pagi singuda-nguda e janah ilahirkenna pagi sekalak anak dilaki, janah igelari pagi ia Immanuel,” si ertina “Dibata Ras Kita.”
24 Kenca e, medak Jusup janah idalankenna kai si ikataken malekat Jahwe man bana. Iempoina me Maria.
25 Tapi la ia erhubungen seks ras Maria seh asa anak e lahir, janah igelarina me anak e Jesus.
Cataten i teruh
^ Ntah “terombo.”
^ Ntah “Mesias; Kalak si Ipilih.”
^ I bas kalak Jahudi, tunangen e nggo ikataken perbulangen ntah pe ndehara.
^ Menurut kalak Jahudi, adi kalak si ertunangen la surung erjabu arus ia cerai.
^ Enda me si pemenana isuratken gelar Dibata eme Jahwe i bas Kitap-Kitap Junani Kristen si buena lit 237 kali.
^ Ntah “bertinna.”
^ I bas cakap Heber, gelar e Jesua ntah Josua, si ertina “Jahwe Eme Keselamaten.”
