Matius 10:1-42
10 Idilo Jesus murid-muridna si 12 kalak e, jenari iberekenna kalak e kuasa guna mpelawes malekat-malekat jahat ras mpepalem kerina erbage pinakit bage pe kerina masalah kesehaten.
2 Gelar rasul si 12 kalak e eme: Si pertama, Simon si igelari ka Petrus, ras Andreas seninana; Jakup anak Sebedeus ras Johanes seninana;
3 Pilipus ras Bartolomeus; Tomas ras Matius si pengalo cuke; Jakup anak Alpeus; Tadius;
4 Simon kalak Kanani;* ras Judas Iskariot, si i bas pudi wari ihianatina Jesus.
5 Isuruh Jesus rasul si 12 kalak e, janah iberekenna petunjuk enda, “Ula kam lawes ku daerah bangsa-bangsa si deban, janah ula masuk ku kota kalak Samaria.
6 Tapi laweslah ndahi kalak Israel saja si bali bagi biri-biri si nggo papak.
7 Sanga kena erberita, kataken, ‘Kerajan surga nggo ndeher.’
8 Pepalemlah kalak si sakit, pegeluh kalak si nggo mate, pepalemlah kalak si sakit kusta, janah pelaweslah malekat-malekat jahat. Kerina e ialoken kena alu la nggalar, emaka bereken ka alu la ngaloken penggalaren.
9 Ula baba emas ntah pirak ntah tembaga i bas kantong duit kena,
10 ntah ingan pangan i bas perdalanen, ntah baju ganti, ntah selop, ntah tongkat, sebap kalak si erdahin patut ngaloken upahna.*
11 “Sanga kena masuk ku kota ntah ku kuta si apai pe, daramilah kalak si nggit ngalo-ngalo kena, janah tadinglah i je ngayak kena lawes.
12 Adi masuk kena ku sada rumah katakenlah, ‘Mejuah-juah!’
13 Adi kena ialo-alo bas rumah e, reh me kedamen i je, tapi adi la kena ialo-alona, mulihken man kena kedamen e.
14 I japa pe adi lit kalak si la ngaloken kena ntah pe la megiken kata-kata kena, kisamken abu si lit i bas nahe kena sanga itadingken kena rumah ntah pe kota e.
15 Situhuna, i bas Wari Penghakimen pagi, beraten ukumen man kota e asangken man Sodom ras Gomora.
16 “Perdiatekenlah! Kusuruh kena bali bagi nuruh biri-biri ku tengah-tengah srigala. Emaka hati-hatilah bagi nipe tapi polos bagi merpati.
17 Hati-hatilah nandangi manusia, sebap ibaba kalak pagi kena ku pengadilen setempat janah iligasina kena i bas ingan-ingan pulung kalak Jahudi.*
18 Ibabana pagi kena ku lebe-lebe gubernur-gubernur ras raja-raja erkiteken aku, gelah ersaksi kena man kalak e bage pe man bangsa-bangsa.
19 Tapi sanga kena iserahken kalak e, ula kena kuatir kerna uga ras kai si arus ikataken kena. Ibereken nge kari man kena kai si arus ikataken kena i bas paksa si e,
20 sebap si ngerana labo ngenca kena, tapi kuasa* Bapak kena si ngerana erkelangken kena.
21 Selain si e, kalak si ersenina mereken seninana pagi gelah ibunuh, bage pe bapak nandangi anakna. Anak-anak ngelawan orang tuana janah iberekenna gelah ibunuh.
22 Segat pagi ate kerina kalak man kena erkiteken gelarku. Tapi kalak si megenggeng seh ku kedungenna iselamatken pagi.
23 Adi isiksa kalak kena i bas sada kota, kiamlah ku kota si deban. Situhuna, kerina kota Israel lenga pagi serser isiari kena seh asa Anak manusia reh.
24 “Labo ganjangen sekalak murid asangken guruna, bage pe labo ganjangen sekalak suruh-suruhen asangken tuanna.
25 Enggo bias adi murid bali ras guruna, janah suruh-suruhen bali ras tuanna. Adi tuan rumah saja igelari Balsebul,* apai denga ka kalak si lit bas rumahna!
26 Dage ula mbiar man kalak e, sebap kerina si tertutup, terbuka nge pagi, janah kerina rahasia tereteh nge pagi.
27 Si kukataken man kena i bas gelap, katakenlah e i bas terang, janah si ibegi kena alu kusik-kusik i bas aku nari, beritakenlah arah atap rumah nari.
28 Ula mbiar man kalak si banci munuh daging tapi la banci meneken kesah,* tapi mbiarlah man Dibata si banci ngkernepken daging ras kesah i Gehena.*
29 La kin dua perik cipcip adi idayaken ergana sada sen logam si kitik* ngenca? Tapi labo sada pe perik e ndabuh ku taneh alu la iteh Bapak kena.
30 Janah buk takal kena pe itehNa asa buena.
31 Emaka ula mbiar, ergan nge kena asangken melala perik cipcip.
32 “Ise pe si ngakui aku i lebe-lebe manusia, kuakui ka nge ia pagi i lebe-lebe Bapakku si i surga.
33 Tapi ise pe si mersoken aku i lebe-lebe manusia, kupersoken ka nge ia pagi i lebe-lebe Bapakku si i surga.
34 Ula iakap kena aku reh ku doni enda maba dame. Aku reh labo maba dame, tapi maba pedang.
35 Aku reh erban perpecahen: anak si dilaki ngelawan bapakna, anak si diberu ngelawan mamakna, janah permen ngelawan bibi simetuana.
36 Situhuna, kerina kalak si lit i bas rumahna njadiken ia musuh.
37 Ise pe si kelengen atena bapakna ntah pe mamakna asangken aku, ia la cocok* ras aku, janah ise pe si kelengen atena anakna si dilaki ntah si diberu asangken aku, ia la cocok* ras aku.
38 Ise pe si la ngaloken tiang siksanna* ras la ngikutken aku, ia la cocok* ras aku.
39 Ise pe si nelamatken kesahna,* kebenen kesah, janah ise pe si kebenen kesahna* erkiteken aku, idatkenna nge pagi mulihi.
40 “Ise pe si ngaloken kena, ngaloken aku ka nge, janah ise pe si ngaloken aku, ngaloken Ia si nuruh aku ka nge.
41 Ise pe si ngalo-ngalo nabi erkiteken ia sekalak nabi, ialokenna me upah nabi, janah ise pe si ngalo-ngalo kalak benar erkiteken ia kalak si benar, ialokenna me upah kalak benar.
42 Janah situhuna, ise pe si mereken sada cangkir lau mbergehlah gia man salah sada i bas kalak si kitik enda erkiteken ia muridku, ialokenna nge pagi upahna.”
Cataten i teruh
^ Ntah “kalak si ergiah-giah.”
^ As. “pangan.”
^ As. “sinagoga.” Nen Kamus.
^ Ntah “kesah si badia.” Nen Kamus.
^ Penggelaren man Setan, penguasa malekat-malekat jahat.
^ Ntah “kegeluhen,” maksudna, arapen kegeluhen i bas wari si pepagi.
^ Ingan nutung sampah i darat Jerusalem. Nen Kamus.
^ As. “sada asarion.”
^ Ntah “metunggung.”
^ Ntah “metunggung.”
^ Nen Kamus.
^ Ntah “metunggung.”
^ Ntah “kegeluhenna.”
^ Ntah “kegeluhenna.”
