Matius 11:1-30
11 Kenca dung Jesus mere petunjuk man 12 murid-muridna, berkat ia guna ngajar ras erberita i bas kota-kota kalak e.
2 Sanga ibegi Johanes i bas penjara nari berita kerna pendahin Kristus, isuruhna me murid-muridna
3 nungkun man Jesus, nina, “Kam kin kalak si nandangi reh e, ntah itimai kami denga kalak si deban?”
4 Ijawap Jesus kalak e, “Dahilah Johanes, turiken man bana kai si ibegi ras si idah kena:
5 Kalak pentang gundari erpengidah, si lumpuh erdalan, si sakit kusta ipepalem, si pasek erpemegi, si mate ipekeke, janah berita si meriah iberitaken man kalak mesera.
6 Meriah me ukur kalak si la ragu erkiniteken man bangku.”*
7 Sanga kalak e lawes, mulai iceritaken Jesus kerna Johanes man jelma si nterem, nina, “Kai kin si man nehenen kena adi lawes kena ku taneh mesawang?* Peren si iembus angin nge?
8 Kai dage si man nehenen kena ku je? Kalak si mehaga uisna? Kalak si mehaga uisna inganna i bas istana raja nge.
9 Jadi, ngkai kena ndarat? Ngenen nabi? Payo, kukataken man kena maka ia lebihen asangken sekalak nabi.
10 Ia me si ikataken i bas tulisen enda: ‘Nenlah! Kusuruh persuruhenKu leben asangken kam, ia pagi si nikapken dalan man bandu!’
11 Situhuna, Johanes Peridiken kap si mbelinna i bas kerina si lahir i bas diberu nari, tapi si kitikna i bas Kerajan surga belinen asangken ia.
12 Mulai kin jaman Johanes Peridiken nari seh gundari, iusahaken kalak kel masuk ku bas Kerajan surga, janah kalak si la nyerah pasti idatna.
13 Sebap kerina Ajaren Nabi-Nabi ras Undang-Undang Musa ernubuat seh asa jaman Johanes.
14 La soal kena tek ntah lang, ia kap ‘Elia si nandangi reh’ e.
15 Ise pe si ercuping, begikenlah.
16 “Bagi ise nge ndia kuandingken kalak enda? Kalak enda bali bagi anak-anak si kundul bas pajak si ngelebuh temanna main-main,
17 nina, ‘Enggo iembus kami suling tapi la kena landek, iendeken kami lagu tangis-tangis tapi la kena erceda ate.’*
18 Bage ka pe, Johanes reh, la ia man ntah pe minem, tapi nina kalak, ‘Lit i bas ia malekat jahat.’
19 Anak manusia reh, man ras minem, tapi nina kalak, ‘Nenlah! Ia kalak rangap ras peminem anggur, temanna pe pengalo cuke ras kalak perdosa.’ Amin bage gia, kepentaren teridah arah perbahanen kap.”
20 Kenca bage mulai ipandangi Jesus kota-kota si nggo melala ilakokenna perbahanen si dem kuasa, sebap kalak e la nggit ertobat,*
21 nina, “Cilaka me kam, o Korasin! Cilaka me kam, o Betsaida! Bicara i Tirus ras i Sidon min ndai iban perbahanen si dem kuasa si nggo iban i tengah-tengah kena, nggo min nai nari kalak e ertobat* alu kain guni ras abu.
22 Tapi, i bas Wari Penghakimen pagi, beraten ukumen kena asangken ukumen man Tirus ras Sidon.
23 Kam pe, o Kapernaum, ipeganjang kin kam pagi seh ku langit? Nusur nge kam pagi ku Kuburen,* erkiteken bicara i Sodom min ndai iban perbahanen si dem kuasa si nggo iban i tengah-tengahndu, lit denga min ndai kota e seh asa gundari.
24 Tapi, i bas Wari Penghakimen pagi, beraten ukumen kena asangken ukumen man Sodom.”
25 Paksa e nina Jesus, “O Bapak, Tuhan si erkuasa i langit ras doni, kupuji Kam i lebe-lebe jelma si nterem, sebap nggo ipebetehkenNdu man anak-anak kai si ibunikenNdu man kalak pentar ras erpemeteh.
26 O Bapak, enda kap si ngena ateNdu.”
27 Nina Jesus ka, “Enggo ibereken Bapakku kerinana man bangku. Ise pe labo tuhu-tuhu nandai Anak selain Bapak, janah ise pe labo tuhu-tuhu nandai Bapak selain Anak. Bapak e banci tuhu-tuhu itandai kalak adi nggit Anak e mpebetehkenca kerna Bapak.
28 Marilah, kena kerina si latih janah beraten, gelah kupegegehi kena.
29 Marilah, erdahinlah ras aku,* janah erlajarlah i bas aku nari, sebap aku melias dingen lembut janah meteruk ukur, alu bage kena terpegegehi mulihi.
30 Sebap erdahin ras aku* labo mberat, janah babanku menahang kap.”
Cataten i teruh
^ As. “si la tertuktuk erkiteken aku.”
^ Taneh si mbelang si jarang iingani.
^ Ntah “la ipekpekindu bandu alu ceda ate.”
^ Ntah “jera dingen robah.”
^ Ntah “jera dingen robah.”
^ Nen Kamus.
^ As. “Alokenlah pasangenku.” Pasangen eme alat si biasa itama ku kuduk manusia ntah pe binatang guna maba baban.
^ As. “pasangenku.” Nen ctt. i Mat 11:29.
