Matius 12:1-50
-
Jesus, “Tuan nandangi wari Sabat” (1-8)
-
Dilaki si sembelah tanna lumpuh ipepalem (9-14)
-
Persuruhen si ikelengi Dibata (15-21)
-
Malekat jahat ipelawes alu kesah si badia (22-30)
-
Dosa si la banci iampuni (31, 32)
-
Batang itandai arah buahna (33-37)
-
Tanda Juna (38-42)
-
Paksa malekat jahat mulihken (43-45)
-
Nande ras senina-senina Jesus (46-50)
12 Paksa si e, erdalan Jesus ngelewati perjuman gandum i bas wari Sabat. Iputikken murid-muridna gandum e, janah ipanna sebap melihe ia.
2 Ngidah si e, nina kalak Parisi man bana, “Nenlah! Ajar-ajarndu ngelakoken kai si ilarang i bas wari Sabat.”
3 Nina ngaloi, “Lenga kin pernah ibaca kena kerna kai si ilakoken Daud sanga melihe ia ras teman-temanna?
4 Masuk ia ku rumah Dibata janah ipan kalak e roti persembahen, si arusna la banci ipanna, erkiteken imam-imam ngenca banci manca.
5 Entah, lenga kin ibaca kena i bas Undang-Undang Musa maka sanga wari Sabat, imam-imam i bas Rumah Pertoton erdahin,* tapi la ia ersalah?
6 Tapi kukataken man kena maka i jenda lit si pentingen asangken Rumah Pertoton.
7 Bicara iangkai kena ertina kata-kata enda, ‘Si kuarapken perkuah ate labo korban,’ labo min ndai ihakimi kena kalak si la ersalah.
8 Sebap Anak manusia kap Tuan nandangi wari Sabat.”
9 Kenca bage, lawes Jesus ku ingan pulung kalak Jahudi* kalak e.
10 I je lit sekalak si sembelah tanna lumpuh. Emaka nungkun kalak man Jesus guna ndarami kesalahenna, “Menurut undang-undangta, banci kin kalak sakit ipepalem i bas wari Sabat?”
11 Ngaloi ia, nina, “Adi ndabuh sada biri-biri kena ku bas lubang si mbages i bas wari Sabat, la kin itarik kena ku darat?
12 Manusia ndauh ergan asangken biri-biri. Emaka banci silakoken kai si mehuli i bas wari Sabat.”
13 Jenari nina man si lumpuh e, “Pepinter tanndu.” Emaka ipepinterna tanna, janah minter malem bagi tanna si sembelah nari.
14 Tapi ndarat kalak Parisi e, arih-arih ia guna munuh Jesus.
15 Kenca iteh Jesus kerna si e, lawes ia je nari. Enterem si ngikutken ia janah ipepalemna kerina kalak e,
16 tapi alu tegas ipersingetina kalak e gelah ula iceritakenna kerna ia.
17 Alu bage terjadi me kai si nggo ikataken arah Nabi Jesaya, nina,
18 “Enda me persuruhenKu si nggo Kupilih, ia me si Kukelengi janah si ngena ateKu! Kubereken me kesahKu man bana, janah ia me si erbanca jelas erti keadilen man bangsa-bangsa.
19 Labo ia pagi rubat ntah pe serko, bage pe la pagi terbegi sorana i pasar-pasar si mbelin.
20 Buluh si nggo mbengkuk la ipenggelkenna, sumbu lampu si milep-ilep la imatekenna, seh asa menang ibanna keadilen e.
21 Situhuna, i bas gelarna me pagi bangsa-bangsa erpengarapen.”
22 Jenari itaruhken kalak man Jesus sekalak dilaki si irasuki malekat jahat, ia pentang ras bisu. Emaka ipepalem Jesus ia, alu bage banci kalak si bisu e ngerana ras erpengidah.
23 Jengang kalak si nterem janah nina, “Banci jadi ia nge Anak Daud e!”
24 Megi si e, nina kalak Parisi, “Labo banci ipelawesna malekat jahat adi la kin isampati Balsebul,* penguasa malekat jahat.”
25 Iteh Jesus perukuren kalak e, emaka nina, “Kerina kerajan si lit perpecahen i je, ugapa pe sontar nge, janah kota ntah rumah tangga si lit perpecahen i je, labo banci ertahan.
26 Bage pe adi Setan mpelawes Setan, terpecah-pecah kap ia. Adi bage uga kerajanna banci ipertahanken?
27 Dage, adi alu penampat Balsebul kin aku mpelawes malekat jahat, alu penampat ise pengikut kena mpelawessa? Erkiteken si e me maka ikatakenna kena salah.
28 Tapi adi alu penampat kesah Dibata aku mpelawes malekat jahat, e tandana Kerajan Dibata nggo tuhu-tuhu reh alu la isadari kena.
29 Ise pe labo banci masuk ku rumah kalak si megegeh guna ngerampasi erta-ertana, pala iketna lebe kalak si megegeh e. Emaka banci irampokna isi rumahna e.
30 Ise si la mihak aku ngelawan aku kap, janah ise si la mpepulung ras aku, erban merap kap.
31 “Erkiteken si e, kukataken man kena, kerina dosa ras kata-kata penghinan manusia banci iampuni, tapi penghinan nandangi kesah si badia la banci iampuni.
32 Contohna, ise pe ngerana nentang Anak manusia banci iampuni, tapi ise pe ngerana nentang kesah si badia la banci iampuni, i bas jaman* gundari pe lang, bage pe i bas wari si pepagi.
33 “Adi batang kena mejile, buahna pe mejile janah adi batang kena macik, buahna pe macik. Sebap arah buahna itandai kap batangna.
34 O, kesusuren nipe si erbisa, uga ning kena ngataken si mehuli adi kena pe jahat nge? Sebap kai si ibelasken rehna i bas pusuh nari.
35 I bas kalak bujur nari ndarat kai si mehuli si lit i bas pusuhna, tapi i bas kalak jahat nari ndarat kai si jahat si lit i bas pusuhna.
36 Emaka i bas Wari Penghakimen pagi, arus ipertanggungjawapken manusia kerina ranan si la erguna si ibelaskenna.
37 Sebap, arah ranan kena me kena ikataken benar, janah arah ranan kena ka kena ikataken ersalah.”
38 Kenca si e, nina piga-piga guru agama ras kalak Parisi ngaloi, “O Guru, merincuh kel kami ngidah tanda i bas kam nari.”
39 Ijawap Jesus, “O kena kalak si jahat ras la setia,* terus ipindo kena tanda, tapi la lit tanda ibereken selain tanda Nabi Juna.
40 Telu wari telu berngi dekahna Juna i bas beltek ikan si galang, bage ka me pagi Anak manusia e telu wari telu berngi dekahna i bas beltek taneh enda.
41 I bas Wari Penghakimen pagi, keke me kalak Niniwe ras kalak enda* janah ikatakenna me kalak enda* ersalah, erkiteken kalak Niniwe ertobat* sanga ibegina berita Juna. Situhuna, i jenda lit si belinen asangken Juna.
42 I bas Wari Penghakimen pagi, keke me ratu i selatan nari ras kalak enda* janah ikatakenna me kalak enda ersalah, erkiteken ia reh i bas ujung doni nari guna megiken kepentaren Salomo. Situhuna, i jenda lit si belinen asangken Salomo.
43 “Sanga nggo ndarat malekat jahat i bas sekalak jelma nari, lawes malekat jahat e janah ilewatina ingan-ingan si kerah guna ndarami ingan ngadi tapi la idatna.
44 Kenca si e, nina, ‘Mulihlah aku ku rumahku si nggo kutadingken e.’ Janah, seh kenca i je, idapetina rumah e la lit si ngianisa tapi nggo bersih isapui janah nggo ipejile.
45 Jenari lawes ia, ibabana pitu malekat si deban si jahaten asa ia, janah masuk ia kerina ku bas, i je me ia ringan. Emaka reh kelekna me keadan kalak e asangken si ndube. Bage me pagi jadina kalak jahat enda.”
46 Paksa Jesus ngerana denga man jelma si nterem, nandena ras senina-seninana tedis i darat, sebap ngerana atena ras Jesus.
47 Emaka lit si ngerana man Jesus, “Nandendu ras senina-seninandu paksana tedis i darat, ngerana atena ras kam.”
48 Ngaloi ia, “Ise kin nandeku? Ise kin senina-seninaku?”
49 Jenari ituduhken Jesus ku murid-muridna janah nina, “Enda kap nandeku ras senina-seninaku!
50 Ise pe si ndalanken peraten Bapakku si i surga, ia kap seninaku, turangku, ras nandeku.”
Cataten i teruh
^ Ntah “ngelanggar aturen Sabat.”
^ As. “sinagoga.” Nen Kamus.
^ Penggelaren man Setan.
^ Ntah “doni.” Nen Kamus.
^ As. “erlua-lua.”
^ Ntah “kalak si jahat ras la setia.”
^ Ntah “kalak si jahat ras la setia.”
^ Ntah “jera dingen robah.”
^ Ntah “kalak si jahat ras la setia.”
