Matius 14:1-36
14 Paksa si e, ibegi Herodes, penguasa daerah e, laporen kerna Jesus
2 janah nina man pelayan-pelayanna, “Ia Johanes Peridiken. Enggo keke ia i bas si mate nari, eme sebapna perbahanen-perbahanen si dem kuasa e banci ilakokenna.”
3 Ope si e, Johanes nggo itangkap Herodes* janah igarikenna, kenca si e ipenjarakenna perban Herodias, diberu Pilipus, seninana.
4 Erkiteken nggo rusur ikataken Johanes man bana, “La banci iempoindu ia.”
5 Aminna pe ibunuh Herodes atena Johanes, mbiar ia man jelma si nterem, sebap iakap kalak Johanes e nabi.
6 Tapi sanga ulang tahun Herodes irayaken, landek me anak Herodias si diberu, enda erbanca meriah kel ukur Herodes,
7 emaka ersumpah ia mereken kai pe si ipindona.
8 Kenca iajuk-ajuk mamakna ia, nina, “Bereken man bangku takal Johanes Peridiken tare talam.”
9 Aminna pe ceda kel ate raja, iperentahkenna gelah e ibereken man bana perban nggo ersumpah ia i lebe-lebe kalak si man ras ia.
10 Emaka isuruhna prajurit ku penjara motong kerahung Johanes.
11 Ibaba me takalna tare talam janah ibereken man anak e, kenca si e iberekenna man mamakna.
12 Dungna, reh me murid-murid Johanes muat mayat e janah ikuburkenna, kenca si e lawes kalak e guna ngelaporkenca man Jesus.
13 Megi si e, lawes Jesus je nari ku ingan si melungen alu perahu guna nerapken bana. Kenca iteh jelma si nterem, iikuti kalak e ia alu erdalan arah kota-kota nari.
14 Sanga ia seh i tepi lawit, idahna nterem kel jelma. Mekuah atena kalak e emaka ipepalemna kerina si sakit.
15 Tapi kenca ben wari, idahi murid-muridna ia janah nina man bana, “Ingan enda melungen janah wari pe nggo ben. Suruhlah kalak e lawes, gelah itukurna panganna i kuta-kuta si ndeher jenda nari.”
16 Tapi nina Jesus, “La perlu kalak enda lawes, kena saja si mere kalak e man.”
17 Ngaloi kalak e, “Kai pe la lit bas kami selain lima roti ras dua ikan ngenca.”
18 Nina Jesus, “Baba roti ras ikan e ku jenda.”
19 Janah isuruhna jelma si nterem e kundul i dukut. Kenca si e ibuatna lima roti ras dua ikan e, itatapna ku langit janah ertoto. Kenca icepik-cepikkenna roti e, iberekenna man murid-muridna janah ibereken murid-murid e ka man jelma si nterem.
20 Emaka kerina kalak e man ngayak besur janah ipepulung kalak e sisana, dem 12 keranjang buena.
21 Lit kira-kira 5.000 dilaki si man, lenga termasuk diberu ras anak-anak.
22 Kenca si e, mis isuruh Jesus murid-muridna nangkih ku perahu gelah leben kalak e nyebrang, asum si e isuruhna jelma si nterem e mulih.
23 Kenca isuruhna jelma si nterem e mulih, lawes ia sisada ku deleng guna ertoto. Sisada ia i je seh asa berngi.
24 Paksa si e, perahu nggo ratusen meter dauhna i bas daraten nari, iombang-ambingken galumbang perban ientam angin.
25 Tapi paksa nandangi erpagi-pagi,* reh me Jesus ndahi murid-muridna, erdalan ia i datas lawit.
26 Sanga idah kalak e ia erdalan i datas lawit, mbiar murid-muridna, nina, “Begu!” Janah serko kalak e ban biarna.
27 Tapi mis ikataken Jesus man kalak e, “Petetap ukurndu! Aku nge enda, ula mbiar.”
28 Ngaloi Petrus, “O Tuan, adi kam kin e, suruh min aku erdalan i datas lau ndahi kam.”
29 Nina Jesus, “Mari!” Emaka nusur Petrus i bas perahu nari janah erdalan ia i datas lau ndahi Jesus.
30 Tapi sanga inenna angin si meter, mbiar ia. Paksa mulai ia gedap, serko ia, “O Tuan, sampati aku!”
31 Minter idudurken Jesus tanna, itangkapna ia janah nina, “Kam si kitik kinitekenndu, ngkai maka la tetap ukurndu?”
32 Kenca kalak e nangkih ku perahu, ngadi me angin si meter e.
33 Jenari, murid-murid si i bas perahu e erjimpuh man bana, nina, “Tuhu-tuhu me kam Anak Dibata.”
34 Seh me kalak e i sebrang janah ngadi i Genesaret.
35 Kenca kalak si i je nandai ia, ipeseh kalak e berita ku sekeliling daerah e, emaka ibaba kalak e kerina si sakit man bana.
36 Ipindoken kalak e gelah banci idadapna ujung uisna si arah darat sajalah gia. Kerina si ndadapsa tuhu-tuhu malem.
Cataten i teruh
^ Maksudna, Herodes Antipas. Nen Kamus.
^ As. “giliren jaga si peempatken.” I bas kalak Jahudi, enda kira-kira jam 3 seh jam 6 erpagi-pagi.
