Matius 15:1-39
15 Kenca si e reh me piga-piga kalak Parisi ras ahli Undang-Undang Musa i bas Jerusalem nari ndahi Jesus, nina,
2 “Engkai maka ilanggar murid-muridndu adat nini bulangta nai? Contohna, la iburihina* tanna ope man.”
3 Ngaloi Jesus, “Engkai maka ilanggar kena perentah Dibata erkiteken adat kena?
4 Contohna, nina Dibata, ‘Hamatilah bapakndu ras mamakndu,’ janah, ‘Ise pe si ngisakken* bapakna ntah pe mamakna arus ibunuh.’
5 Tapi ning kena, ‘Ise pe si ngataken man bapak ntah pe mamakna, “Kai pe si lit bas aku si banci erguna man kena eme pemere si ipersembahken man Dibata,”
6 ia lanai perlu nghamati bapakna.’ Emaka nggo iban kena kata Dibata lanai meherga erkiteken adat kena.
7 O kalak si munapik, tuhu kel si inubuatken Jesaya kerna kena,
8 ‘Ihamati bangsa enda Aku alu biberna, tapi pusuhna ndauh i bas Aku nari.
9 Sia-sia ia terus nembah Aku, erkiteken si iajarkenna perentah manusia.’”
10 Kenca si e ilebuhna jelma si nterem e gelah reh deherna janah nina, “Begiken janah angkailah enda:
11 Labo kai si masuk ku bas babah sekalak jelma si erbanca ia najis, tapi kai si ndarat arah babahna nari nge si erbanca ia najis.”
12 Kenca si e reh me murid-murid janah nungkun man Jesus, “La kin itehndu maka kalak Parisi la kel senang megi katandu ena?”
13 Ijawapna, “Kerina sinuan-sinuan si la isuan Bapakku si i surga iruah nge pagi.
14 Pediat saja kalak e. Kalak e penegu-negu si pentang. Adi kalak pentang negu kalak pentang, ndabuh me ia duana ku lubang.”
15 Ngaloi Petrus, “Kataken dage erti perumpaman* e man kami.”
16 Kenca si e, nina Jesus, “Kena pe, lenga ka kin iangka kena?
17 La kin iteh kena maka kai pe si masuk ku bas babah nusur ku beltek, kenca si e ipedarat ka?
18 Tapi kai pe si ndarat i bas babah nari rehna i bas pusuh nari, e me si erbanca kalak najis.
19 Contohna, i bas pusuh nari ndarat perukuren si jahat, pembunuhen, erlua-lua, perbahanen seks si salah,* nangko, kesaksin si palsu, penghinan.
20 Enda me si erbanca kalak jadi najis, tapi man ope lenga mburihi tan* labo erban kalak jadi najis.”
21 Jenari lawes me Jesus ku daerah Tirus ras Sidon.
22 Kenca si e, sekalak diberu bas Punike nari reh janah nina alu sora megang, “Mekuah min atendu aku, Tuan, Anak Daud. Anakku si diberu irasuki malekat jahat, mekelek kel keadanna.”
23 Tapi kai pe la ibelaskenna man diberu e. Emaka reh murid-muridna janah ipindona man Jesus, nina, “Suruhlah ia lawes, erkiteken terus ia nderkuh man banta.”
24 Nina ngaloi, “Aku isuruh Dibata ndahi kalak Israel ngenca, si bali bagi biri-biri si nggo papak.”
25 Tapi reh diberu e janah erjimpuh man bana, nina, “O Tuan, sampati min aku!”
26 Ngaloi ia, “La patut ibuat roti i bas anak-anak nari janah iambekken man anak-anak biang.”
27 Nina diberu e, “Payo, Tuan, tapi situhuna anak-anak biang pe man rimah-rimah si ndabuh arah meja tuanna nari nge.”
28 Kenca si e nina Jesus, “Mbelin kel kinitekenndu. Jadilah bagi si iarapkenndu.” Paksa si e, minter malem anakna ndai.
29 Jenari, lawes Jesus ku deher Lawit Galilea. Kenca nangkih ku deleng, kundul ia i je.
30 Kenca si e, reh me jelma si nterem ndahi ia, ibaba kalak e si lumpuh, cacat, pentang, bisu, ras nterem si debanna. Iamparkenna kalak e i deher nahe Jesus, janah ipepalemna kerina.
31 Emaka jengang jelma si nterem ngidah kalak bisu ngerana, si cacat malem, si lumpuh erdalan, janah si pentang erpengidah. Jenari imuliaken kalak e Dibata Israel.
32 Kenca bage ilebuh Jesus murid-muridna janah nina, “Mekuah ateku jelma si nterem e, erkiteken nggo telu wari kalak e ras aku janah kai pe la lit si man panganenna. La ateku nuruh kalak e mulih adi lenga kin kalak e man, erkiteken banci kalak e lumben bas perdalanen.”
33 Tapi, nina murid-murid e, “I bas ingan si melungen enda, i ja sibuat roti guna mbesuri jelma si bagenda teremna?”
34 Nina Jesus, “Piga lit roti bas kena?” Nina kalak e, “Pitu, ras piga-piga ikan si kitik.”
35 Emaka kenca isuruhna jelma si nterem e kundul i taneh,
36 ibuat Jesus pitu roti ras ikan ndai, janah kenca ngataken bujur man Dibata, icepik-cepikkenna, kenca si e mulai iberekenna man murid-muridna, janah murid-muridna merekenca man jelma si nterem.
37 Kerina man ngayak besur janah ipepulung kalak e sisana, dem pitu keranjang si galang buena.
38 Si man lit 4.000 dilaki, lenga termasuk diberu ras anak-anak.
39 Dungna kenca isuruhna jelma si nterem e mulih, nangkih ia ku bas perahu janah lawes ku daerah Magdala.
Cataten i teruh
^ Maksudna, erburih sue ras kebiasan Jahudi.
^ Ntah “nghina.”
^ Ntah “anding-andingen.”
^ Bahasa Junani, porneia. Nen Kamus.
^ Maksudna, mburihi tan menurut kebiasan Jahudi.
