Matius 18:1-35
18 I bas paksa si e, reh me murid-murid ndeheri Jesus janah nungkun, “Ise situhuna si mbelinna i bas Kerajan surga?”
2 Emaka ilebuhna sekalak anak-anak, ipecinderna ia i tengah-tengah kalak e,
3 jenari nina, “Situhuna, adi la kena robah janah la bagi anak-anak e, la banci kena masuk ku bas Kerajan surga.
4 Emaka, ise pe si mpeteruk bana bagi anak enda, ia me si mbelinna i bas Kerajan surga.
5 Janah ise pe si ngaloken anak-anak si bagenda i bas gelarku, ialokenna ka nge aku.
6 Tapi ise pe si erbanca bene kiniteken salah sada i bas kalak si kitik enda si nggo erkiniteken bangku, ulin igantungken sada batu penggilingen si galang* ku kerahungna, kenca si e igedapken ia ku bas lawit si mbelang.
7 “Cilaka me doni enda erkiteken erban kalak erdosa!* Tuhu la tersilahi kai si erbanca erdosa,* tapi cilaka me kalak si erbanca kalak si deban erdosa!*
8 Emaka adi tanndu ntah nahendu erban kam erdosa,* potonglah e janah ambekken. Ulin kam lumpuh ntah pe cacat tapi ndatken kegeluhen* asangken lit dua tanndu ntah pe dua nahendu tapi iambekken ku bas api si la banci mate.*
9 Bage ka pe, adi matandu erban kam erdosa,* cungkillah e janah ambekken. Ulin sada ngenca matandu tapi ndatken kegeluhen, asangken lit dua matandu tapi iambekken ku Gehena* si gurlah.
10 Ula iakap kena la meherga sada pe i bas kalak si kitik enda nari, sebap malekat-malekatna si i surga lalap lit i lebe-lebe Bapakku si i surga.
11 *——
12 “Uga menurut kena? Adi lit sekalak jelma 100 biri-birina janah bene sada, la kin itadingkenna si 99 e i deleng jenari lawes ia ndarami si bene e?
13 Janah adi idatna, pasti riahen ukurna kerna si sada e asangken si 99 si la bene e.
14 Bage ka pe, Bapakku* si i surga la ateNa bene sada pe i bas kalak si kitik enda.
15 “Adi erban dosa seninandu, laweslah janah turiken kesalahenna* sanga kam ras ia saja. Adi ibegikenna kam, nggo idatndu seninandu e.
16 Tapi adi la ibegikenna, babalah ras kam sekalak ntah dua kalak, gelah alu kesaksin arah dua ntah telu kalak saksi kerina masalah banci iperjelas.
17 Adi la ibegikenna kalak e, katakenlah man runggun. Adi runggun pe la ibegikenna, pediatlah ia bali bagi kalak i bas bangsa-bangsa si deban ras bagi pengalo cuke.
18 “Situhuna, kai pe si iiket kena i doni nggo iiket i surga, janah kai pe si ilepasken kena i doni nggo ilepasken i surga.
19 Mulihi kukataken man kena, adi dua kalak i bas kena nari i doni setuju mindo kai si penting, pasti ibereken Bapakku si i surga.
20 Sebap i ja lit dua ntah telu kalak pulung i bas gelarku, aku lit i tengah-tengah kalak e.”
21 Kenca si e reh Petrus janah nina bana, “O Tuan, adi seninaku erdosa man bangku, piga kali nge arus kuampuni? Ngayak pitu kali nge?”
22 Ngaloi Jesus, “Labo ngayak pitu kali, tapi ngayak 77 kali.
23 “Eme sebapna Kerajan surga banci iumpamaken bagi sekalak raja si atena erkira ras budak-budakna.
24 Sanga mulai erkira, sekalak dilaki si utangna 10.000 talenta* ibaba ku ia.
25 Tapi erkiteken la ngasup ia nggalarisa, iperentahken tuanna e gelah ia, ndeharana, ras anak-anakna bage pe kerina si lit i bas ia idayaken gelah lit penggalarna.
26 Emaka erjimpuh budak e man bana, nina, ‘Sabarlah min kam bangku, kugalari nge pagi kerina.’
27 Erkiteken mekuah ate tuanna e, ibebaskenna me budak e janah isasapkenna utangna.
28 Tapi sanga ndarat budak e, jumpa ia ras budak-budak si deban si utangna lit 100 dinar* man bana. Itangkapna ia jenari icekakna, janah nina, ‘Galari utangndu.’
29 Emaka erjimpuh temanna e janah mindo kel ia man bana, nina, ‘Sabarlah min kam bangku, kugalari nge pagi.’
30 Tapi, la ia nggit. Lawes ia janah itamakenna temanna e ku bas penjara seh asa banci igalarina utangna e.
31 Sanga idah budak-budak si deban kai si terjadi, ceda kel atena, emaka lawes kalak e janah iceritakenna man tuanna kerina si terjadi.
32 Kenca si e, ilebuh tuan e ia janah nina, ‘Kam budak si jahat, kusasapken kerina utangndu erkiteken mindo kel kam man bangku.
33 La kin arusna kam pe rate mekuah man temanndu sapih-sapih budak bagi aku nggo rate mekuah bandu?’
34 Erkiteken merawa kel tuanna e, ipenjarakenna ia seh ngasa igalarina kerina utangna.
35 Bage ka me iban Bapakku si i surga man kena sekalak-sekalak, adi la kin iampuni kena turang senina kena i bas pusuh kena nari.”
Cataten i teruh
^ Ntah “batu penggilingen si itarik kelede.”
^ As. “tertuktuk.”
^ As. “la tersilahi batu si erban tertuktuk.”
^ As. “tertuktuk.”
^ As. “tertuktuk.”
^ Maksudna, kegeluhen si rasa lalap.
^ Maksudna, ikernepken si rasa lalap.
^ As. “tertuktuk.”
^ Nen Kamus.
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ Ntah banci saja “Bapakndu.”
^ As. “persingeti ia.”
^ Ntah “60.000.000 dinar.”
^ Sen logam pirak kalak Roma.
