Matius 19:1-30
19 Kenca nggo dung ikataken Jesus si enda kerina, lawes ia i Galilea nari janah seh i perbatasen Judea i sebrang Lau Jordan.
2 Enterem kel jelma si ngikuti ia, janah ipepalemna kalak si sakit i je.
3 Kenca si e, reh kalak Parisi njumpai Jesus guna nguji ia, janah nungkun, “Menurut undang-undang, banci nge iceraiken sekalak dilaki ndeharana alu alasen kai pe?”
4 Nina ngaloi, “Lenga kin pernah ibaca kena maka tangtangna nari Dibata njadiken manusia selaku dilaki ras diberu?
5 Nina Dibata, ‘Erkiteken si enda me sekalak dilaki nadingken bapakna ras mamakna jenari ersada ia ras ndeharana, janah duana jadi sada daging.’
6 Emaka kalak e lanai bo dua, tapi sada. Erkiteken si e, kai si nggo ipersada Dibata, la banci isirangken manusia.”
7 Nina kalak e man bana, “Adi bage, ngkai maka isuruh Musa dilaki mereken surat cerai guna nceraiken ndeharana?”
8 Ijawap Jesus, “Perban kena keras kepala, ipediat Musa kena nceraiken ndehara kena, tapi tangtangna nari labo bage.
9 Kukataken man kena maka ise pe si nceraiken ndeharana, adi labo erkiteken perbahanen seks si salah,* janah erjabu ia ras kalak si deban, ia nggo erlua-lua.”
10 Nina murid-murid man bana, “Adi bage kin keadanna man sekalak dilaki ras ndeharana, ulin la erjabu.”
11 Ngaloi ia, “Labo kerina kalak banci ndalanken kata enda, selain kalak si ngaloken gegeh* i bas Dibata nari ngenca.
12 Lit kalak la banci erjabu perban bage kin lahirna nari, janah lit si la banci erjabu perban kalak si deban si erbanca ia bage, janah lit ka si ipilihna la erjabu guna Kerajan surga. Pediatlah kalak si banci ndalanken si e, ndalankenca.”
13 Kenca si e, ibaba me anak-anak man bana gelah ipasu-pasuna ras itotokenna, tapi merawa murid-murid man kalak e.
14 Tapi nina Jesus, “Pediatlah anak-anak e reh man bangku. Ula ambati ia, sebap man kalak si bagenda me Kerajan surga.”
15 Kenca si e, itamana tanna ku datas anak-anak e jenari lawes ia i je nari.
16 Reh me sekalak dilaki ndahi ia, nina, “O Guru, perbahanen si mehuli kai nge si arus kulakoken gelah kudat kegeluhen si rasa lalap?”
17 Ijawap Jesus, “Engkai maka isungkunndu aku kerna kai si mehuli? Sada ngenca si mehuli. Tapi, adi atendu ndatken kegeluhen, teruslah dalanken perentah Dibata.”
18 Nungkun ka ia, “Si apai?” Ijawap Jesus, “Ula munuh, ula erlua-lua, ula nangko, ula mereken kesaksin palsu,
19 hamatilah bapakndu ras mamakndu, janah arus ikelengindu kalak si deban bagi kam ngkelengi dirindu.”
20 Nina anak perana e, “Kerina nggo kudalanken. Kai nari kin si kurang?”
21 Ijawap Jesus, “Adi atendu jadi sempurna, laweslah, dayaken ertandu janah bereken senna man kalak mesera, alu bage lit pagi ertandu i surga. Kenca si e, mari jadilah pengikutku.”
22 Megi si e, lawes anak perana e alu gulut ukur, sebap melala ertana.
23 Kenca si e, nina Jesus man murid-muridna, “Situhuna, kalak bayak mesera masuk ku Kerajan surga.
24 Kukataken ka man kena, nukahen unta masuk ku lubang jarum asangken kalak bayak masuk ku Kerajan Dibata.”
25 Megi si e, sengget kel murid-murid, nina, “Adi bage, ise si banci selamat?”
26 Itatap Jesus kalak e janah nina, “I bas manusia, enda la mungkin terjadi, tapi i bas Dibata kai pe banci terjadi.”
27 Kenca si e ngaloi Petrus, “Enggo itadingken kami kerinana janah ikutken kami kam. Dage, kai nge si ialoken kami pagi?”
28 Ijawap Jesus, “Situhuna, iban Dibata pagi kerinana jadi mbaru, sanga Anak manusia kundul i bas tahtana si mulia. Paksa si e pagi, kena si nggo ngikutken aku kundul i bas 12 tahta janah ngadili 12 suku Israel.
29 Janah ise pe si nggo nadingken rumahna ntah seninana ntah turangna ntah bapakna ntah mamakna ntah anakna ntah tanehna erkiteken gelarku, ialokenna pagi seratus kali terbuen janah idatna kegeluhen si rasa lalap.
30 “Tapi nterem kalak si pertama jadi si terakhir pagi, janah si terakhir jadi si pertama.
