Matius 21:1-46
21 Sanga nggo ndeher kalak e ku Jerusalem janah seh i Betpage i Deleng Saitun, isuruh Jesus dua muridna,
2 nina, “Laweslah ku kuta si arah lebe ah, idapeti kena kari i je sada kelede si itambat ras anakna. Pulahi janah baba man bangku.
3 Adi lit kari si nungkun, arus ikataken kena, ‘Perlu Tuan.’ Minter kari ipediatna ibaba kena.”
4 Enda tuhu-tuhu terjadi gelah kai si nggo ikataken arah nabi terjadi, nina:
5 “Kataken man kalak si tading i Sion, ‘Nenlah! Reh kap Rajandu, ia melias dingen lembut janah inangkihina kelede, ue, anak kelede, kesusuren rubia-rubia si erbaban.’”
6 Emaka lawes me murid-murid e janah ilakoken kalak e bagi si ikataken Jesus.
7 Ibaba kalak e kelede e ras anakna, janah itama kalak e uisna si arah darat ku datas kelede e, kenca si e inangkihi Jesus.
8 Teremen kalak ngkimbangken uisna i dalan, si debanna motong dahan batang kayu janah iamparkenna i dalan.
9 Selain si e, jelma si nterem si erdalan arah lebe bage pe arah pudi Jesus terus ersurak, “Selamatkenlah Anak Daud! Ipasu-pasu me ia si reh i bas gelar Jahwe! O Dibata si lit i bas ingan si meganjangna, tolong selamatkenlah ia!”
10 Sanga ia masuk ku Jerusalem, guntar me belang-belang kota e, nina, “Ise kin enda?”
11 Jelma si nterem e terus ngerana, “Enda kap nabi e, Jesus, arah Nasaret nari i Galilea!”
12 Masuk Jesus ku rumah pertoton janah ipelawesna kerina kalak si erbinaga ras si nukur i je. Itunggalingkenna meja-meja kalak si nukari sen bage pe bangku-bangku kalak si erbinaga merpati.
13 Nina, “Lit tertulis, ‘RumahKu pagi igelari rumah pertoton,’ tapi iban kena jadi gua perampok.”
14 Kalak si pentang ras si lumpuh pe reh ndahi ia i rumah pertoton, janah ipepalemna kalak e.
15 Idah imam-imam kepala ras ahli Undang-Undang Musa melala mukjizat si ilakoken Jesus bage pe anak-anak dilaki si ersurak bas rumah pertoton, “Tolong selamatken Anak Daud!” Emaka merawa kalak e
16 janah nina, “Ibegi kena nge kai nina kalak enda?” Ijawap Jesus, “Ue. La kin pernah ibaca kena enda: ‘IbanNdu ndarat pujin arah babah anak-anak nari bage pe arah bayi nari’?”
17 Kenca itadingkenna kalak e, ndarat ia i bas kota e nari. Lawes ia ku Betani janah erberngi i je.
18 Sanga mulihken ia ku kota pagi-pagi si lampas, melihe ia.
19 Idahna sada batang ara i tepi dalan janah lawes ia ku je, tapi kai pe la lit idatna i je selain bulungna ngenca, emaka nina man batang e, “Asa ndigan pe lanai kam erbuah.” Jenari mis kerah batang ara e.
20 Sanga iidah murid-murid si e, mamang kel atena janah nina, “Uga maka banci mis kerah batang ara e?”
21 Ngaloi Jesus, “Situhuna adi lit kiniteken kena janah la kena ragu-ragu, labo ngenca banci iban kena bagi si kuban man batang ara e, tapi adi ikataken kena pe man deleng enda, ‘Angkatlah bandu jenari benterken bandu ku lawit,’ e banci terjadi.
22 Adi erkiniteken kena, kerina si ipindo kena i bas toto pasti ialoken kena.”
23 Kenca masuk Jesus ku rumah pertoton, imam-imam kepala ras peminpin bangsa e reh ndahi ia si paksana ngajar janah nina, “Janari datndu kuasa ngelakoken kerina enda? Ise si mereken kuasa e man bandu?”
24 Ngaloi Jesus, “Aku pe lit sada penungkunenku man kena. Adi ijawap kena, kujawap ka kari i ja nari kudat kuasa ngelakoken enda kerina.
25 Ja nari rehna kuasa Johanes guna mperidiken? Surga nari nge ntah manusia nari?” Kalak e pe mulai ngerana sapih-sapih ia, nina, “Adi sikataken, ‘Surga nari,’ ikatakenna ka kari, ‘Engkai kena la tek man bana?’
26 Tapi adi sikataken, ‘I bas manusia nari,’ mbiar kita man jelma si nterem, erkiteken kerina kalak e erpengakap maka Johanes sekalak nabi.”
27 Emaka nina kalak e man Jesus, “La iteh kami.” Ijawap Jesus ka, “Aku pe la kukataken man kena ja nari kudat kuasa ngelakoken enda kerina.
28 “Uga menurut kena? Sekalak dilaki lit dua anakna. Idahina sintua nina, ‘O Nakku, to erdahin kam gundari i bas kebun anggur.’
29 Ngaloi ia, ‘La aku nggit,’ tapi dungna nyesal ia janah lawes ku kebun anggur.
30 Jenari ideherina anak si peduaken, ikatakenna ka bagi si ndai. Ijawapna, ‘Ue, Pak,’ tapi la ia lawes.
31 Si apai i bas dua anak enda si ngelakoken sura-sura bapakna?” Ngaloi kalak e, “Sintua.” Nina Jesus, “Situhuna leben pagi pengalo cuke ras pelacur masuk ku bas Kerajan Dibata asangken kena.
32 Sebap Johanes reh ndahi kena guna nuduhken dalan si benar, aminna pe bage la kena tek bana. Tapi, pengalo cuke ras pelacur tek bana. Enggo pe idah kena si e, la kena nyesal janah la kena tek man bana.
33 “Begiken perumpaman* si deban: Lit sekalak dilaki, ia tuan taneh, ibanna kebun anggur, ipagarina i sekelilingna, ikurakna ingan mereh anggur i je janah ipajekkenna sada menara. Kenca si e, erbelah ia ras perjuma si deban janah lawes ia ku luar negri.
34 Kenca seh paksa rani, isuruhna budak-budakna ndahi perjuma e guna muat baginna.
35 Tapi, itangkap perjuma e budak-budakna ndai. Sada ipekpekina, sada nari ibunuhna, janah si debanna ibenterina alu batu.
36 Isuruhna ka mulihi budak-budak si deban, teremen asangken si pertama, tapi bagi si ndai ka ibanna kalak e.
37 Si pendungi, isuruhna anakna ndahi kalak e, sebap nina i bas ukurna, ‘Iergai kalak e nge kari anakku e.’
38 Ngidah anakna e, ngerana perjuma e sapih-sapih ia, ‘Enda kap ahli warisna. Eta, sibunuh ia gelah banta warisenna!’
39 Emaka, itangkap kalak e ia, ibenterkenna ku darat kebun anggur janah ibunuhna.
40 Erkiteken si e, sanga reh si mpuna kebun anggur e, uga nge kari banna kerina perjuma e?”
41 Ijawap kalak e, “Erkiteken jahat, ikernepkenna kari kalak e janah ibelahkenna kebun anggur e man perjuma si deban, si nggit mere baginna paksa peranin.”
42 Nina Jesus man kalak e, “La kin pernah ibaca kena bas Kitap si Badia, ‘Batu si itulak tukang bangunen, batu enda nggo jadi batu si utama. Batu e rehna i bas Jahwe nari, janah luar biasa kel e man banta.’
43 E me sebapna, ibuat kari pasu-pasu Kerajan Dibata i bas kena nari janah ibereken man sada bangsa si ngelakoken peraten Dibata.
44 Selain si e, kalak si ndabuh ku batu enda pasti getem, janah ise pe si idabuhi batu e, meripuk me.”
45 Sanga imam-imam kepala ras kalak Parisi megi perumpaman-perumpaman* e, iteh kalak e maka kalak e si paksana icakapken Jesus.
46 Aminna pe itangkap kalak e atena Jesus, mbiar kalak e man jelma si nterem, erkiteken iakui kalak ia sekalak nabi.
