Matius 23:1-39
23 Kenca si e, ngerana Jesus man jelma si nterem bage pe man murid-muridna, nina,
2 “Ahli Undang-Undang Musa ras kalak Parisi tek maka kai si iajarkenna seri ras kai si iajarken Musa.
3 Erkiteken si e, lakokenlah kerina si ikatakenna man kena tapi ula ikutken perbahanenna, sebap la ilakokenna kai si ikatakenna.
4 Iketkenna baban si mberat janah itamana ku bara kalak, tapi ia sendiri la nggit njemaksa alu jari-jarina.
5 Kerina si ilakokenna gelah idah kalak. Ipegalangna kotak-kotak si isina ayat si ipakena guna njaga ia, janah ipegedangna rumbai uisna.
6 Meriah iakapna i bas ingan si mehamat i pesta-pesta bage pe i bas ingan kundul si arah lebe* bas ingan-ingan pulung kalak Jahudi,*
7 janah meriah iakap kalak e iperkuanken kalak alu mehamat i bas ingan si nterem jelma* ras ilebuh kalak ia Guru.*
8 Tapi kena ula ilebuh Guru, sebap sada Guru kena, janah kerina kena ersenina.
9 Selain si e, ula ise pe ilebuh kena Bapak i doni, sebap sada Bapak kena eme si i surga.
10 Janah, ise pe ula lebuh kena peminpin, sebap sada Peminpin kena, eme Kristus.
11 Tapi ise si mbelinna i bas kena arus jadi pelayan kena.
12 Ise pe si ipeganjangna bana ipeteruk me, janah ise pe si ipeterukna bana ipeganjang me.
13 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken itutup kena Kerajan surga i lebe-lebe kalak. Kena sendiri la masuk ku bas janah kalak si atena masuk la ipediat kena.
14 *——
15 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken ilewati kena lawit ras taneh guna erban sada kalak masuk ku agama kena, janah kenca masuk, iban kena ia cocok masuk ku Gehena* janah dua kali jahaten asangken kena.
16 “Cilaka kel kena, o penegu-negu si pentang, sebap ning kena, ‘Adi kalak ersumpah i bas gelar rumah pertoton, la lit ertina. Tapi adi kalak ersumpah i bas gelar emas si lit bas rumah pertoton, arus itepatina.’
17 O kalak motu ras pentang! Apai kin pentingen, emas ntah rumah pertoton si erbanca emas e badia?
18 Ning kena ka, ‘Adi kalak ersumpah i bas gelar batar-batar persembahen, la lit ertina, tapi adi kalak ersumpah i bas gelar persembahen si lit i je, arus itepatina.’
19 O kalak pentang! Apai kin pentingen, persembahen ntah batar-batar persembahen si erbanca persembahen e badia?
20 Emaka ise pe ersumpah i bas gelar batar-batar persembahen, labo ngenca ersumpah i bas gelar e, tapi i bas gelar kerina si lit i je.
21 Janah ise pe ersumpah i bas gelar rumah pertoton labo saja ersumpah i bas gelar e, tapi i bas gelar Dibata si tading i je.
22 Janah ise pe ersumpah i bas gelar surga, labo ngenca ersumpah i bas gelar tahta Dibata, tapi i bas gelar Dibata si kundul i je.
23 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken ibereken kena sepersepuluh i bas sinuan-sinuan mint nari, jera page ras jera, tapi la iperdiateken kena kai si pentingen i bas Undang-Undang eme keadilen, perkuah ate, ras kesetian. Payo, mere perpuluhen e penting, tapi si debanna pe arus iperdiateken kena.
24 O penegu-negu si pentang, agas iagui kena tapi unta ibendut kena!
25 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken ibersihken kena cangkir ras piring kena si arah darat tapi si arah bas dem kerangapen* ras napsu si la terkuasai.
26 O kalak Parisi si pentang, bersihken lebe cangkir ras piring si arah bas e, gelah si arah darat pe banci ka bersih.
27 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken kena bali bagi kuburen si icet mbentar, arah darat teridah mejile tapi arah bas dem tulan-tulan kalak mate ras kerina si najis.
28 Bage ka nge kena, arah darat teridah kena benar i lebe-lebe manusia, tapi arah bas kena seh kel munapikna ras ngelanggar undang-undang.
29 “Cilaka kel kena, o ahli Undang-Undang Musa ras kalak Parisi, kalak si munapik! Erkiteken ibangun kena kuburen nabi-nabi janah ipejile kena kuburen kalak si benar,
30 janah ning kena, ‘Adi nggeluh kami i bas jaman nini bulang kami, pasti la ikutken kami kalak e munuh nabi-nabi.’
31 Erkiteken si e, ibereken kena kesaksin si nentang diri kena sendiri maka kena anak-anak si munuh nabi-nabi.
32 Emaka, dungilah dahin si nggo ibenaken nini bulang kena.
33 “O nipe, kesusuren nipe si erbisa, uga kena banci pulah i bas ukumen Gehena* nari?
34 Eme sebapna kusuruh nabi-nabi ras kalak si pentar bage pe guru* ndahi kena. Piga-piga i bas kalak e ibunuh kena pagi, iukum kena bas tiang* seh asa mate, piga-piga iligasi kena i bas ingan-ingan pulung kalak Jahudi,* janah isiksa kena arah kota ku kota.
35 Emaka man kena dabuhna dareh kerina kalak benar si mambur i doni, mulai dareh Abil eme kalak si benar, seh ku dareh Sakaria anak Barahia si ibunuh kena i kelang-kelang ingan si badia ras batar-batar persembahen.
36 Situhuna, kerina ukumen e pagi ndabuh ku kena kalak si nggeluh gundari enda.
37 “O Jerusalem, Jerusalem, pemunuh nabi-nabi ras si mbenteri* kalak si isuruh ndahi kam, seh kel rusurna ateku mpepulung anak-anakndu bali bagi indung manuk mpepulung anak-anakna i teruh kabengna! Tapi la kena nggit.
38 Emaka, rumah pertoton kena itadingken pagi.
39 Sebap, mulai gundari nari lanai kari idah kena aku seh ngasa ikataken kena, ‘Ipasu-pasu me ia si reh i bas gelar Jahwe!’”
Cataten i teruh
^ Ntah “si mehulina.”
^ As. “sinagoga.” Nen Kamus.
^ Ntah “i bas pajak.”
^ As. “Rabbi.”
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
^ Nen Kamus.
^ Ntah “asil rampasen.”
^ Nen Kamus.
^ Ntah “guru man jelma si nterem.”
^ Ntah “kayu.”
^ As. “sinagoga.” Nen Kamus.
^ Ntah “mbenteri kalak alu batu.”
