Matius 24:1-51
24 Paksa itadingken Jesus rumah pertoton, ideheri murid-muridna ia janah icidahkenna man Jesus bangunen-bangunen rumah pertoton.
2 Nina Jesus, “La kin idah kena kerinana enda? Situhuna, lanai pagi lit sada batu pe si lit i jenda itadingken i datas batu si debanna janah kerina iruntuhken.”
3 Sanga ia kundul i Deleng Saitun, ideheri murid-muridna ia paksa la lit kalak si deban, nina, “Kataken man kami, ndigan kin e terjadi, janah kai nge pagi jadi tanda kerehenndu* ras kedungen jaman* enda?”
4 Ngaloi Jesus, “Hati-hatilah, ula sempat lit si erbanca kena papak,
5 perban nterem pagi si reh make gelarku, nina, ‘Aku kap Kristus,’ janah nterem ibanna jelma papak.
6 Ibegi kena pagi sora perang ras berita-berita kerna perang. Ula kena mbiar, sebap enda kerina arus terjadi, tapi kedungen e lenga seh.
7 “Bangsa pagi ngelawan bangsa ras kerajan ngelawan kerajan, janah i japa pe kurang pangan ras terjadi gempa.
8 Enda kerina bena-bena kiniseran* denga nge.
9 “Kenca si e, iban kalak pagi kena ngenanami kiniseran janah ibunuhna, segat ate kerina bangsa man kena erkiteken gelarku.
10 Selain si e, nterem pagi kalak bene kinitekenna, ihianatina sapih-sapih ia, ras sisegat-segaten.
11 Enterem pagi reh nabi-nabi palsu janah nterem ibanna jelma papak.
12 Janah erkiteken reh buena kejahaten, nterem kalak reh kurangna kekelengenna.
13 Tapi kalak si megenggeng seh ku kedungenna iselamatken pagi.
14 Janah berita si meriah kerna Kerajan e iberitaken pagi man manusia i belang-belang doni guna kesaksin man kerina bangsa, kenca si e reh me kedungen e.
15 “Erkiteken si e, sanga idah kena kai si erban ciga ate si erban hancur, bagi si ikataken Nabi Daniel, cinder i bas ingan si badia (perlu iukuri kalak si mbaca sanga mbaca enda),
16 kalak si lit i bas Judea arus kiam ku deleng-deleng.
17 Kalak si lit i bas atap rumah* ula ku teruh guna muat barang-barang si lit bas rumahna,
18 janah kalak si sangana bas juma ula mulihken guna ngelegi uisna.
19 Cilaka kel diberu si sangana hamil ras si sangana pepinemken anakna paksa si e!
20 Teruslah ertoto gelah sanga kena kiam e la i bas musim mbergeh ntah pe wari Sabat.
21 Sebap paksa si e, lit pagi kiniseran si mbelin si lenga pernah terjadi mulai kin doni lit seh asa gundari, lang, janah ndigan pe lanai bo terjadi.
22 Situhuna, adi wari-wari e la ipegendek, ise pe la banci iselamatken. Tapi guna kalak si ipilih, ipegendek me wari-wari e.
23 “Emaka ula kena tek adi lit si ngataken, ‘Nen! I jenda kap Kristus,’ ntah, ‘Nen! I jah kap ia,’ ula kena tek.
24 Sebap reh me pagi Kristus-Kristus palsu ras nabi-nabi palsu, janah ibanna pagi melala tanda si luar biasa ras mukjizat guna erban kalak papak, termasuk kalak si ipilih e pe.
25 Ingetlah! Enggo kupersingeti kena.
26 Erkiteken si e, adi ikataken kalak man kena, ‘Nen! I bas taneh si mesawang* ia,’ ula kena ndarat. ‘Nen! I ruangen si arah bas ia,’ ula kena tek.
27 Sebap bali bagi kilat si rehna i bas timur nari si ersinar seh ku barat, bage me pagi kerehen* Anak manusia e.
28 I ja lit bangke, i je pulung kuliki.
29 “Kenca wari-wari kiniseran e, minter matawari jadi gelap, bulan lanai ersinar, bintang-bintang ndabuhen langit nari, janah kuasa-kuasa i langit pe mugur-ugur.
30 Kenca si e, teridah me tanda Anak manusia i langit. Kerina suku i doni mekpeki bana alu erceda ate, janah idah kalak e pagi Anak manusia reh i datas embun i langit alu kuasa ras kemulian si mbelin.
31 Kenca bage, isuruhna pagi malekat-malekatna alu sora trompet si megang, janah ipepulung malekat-malekat e pagi kalak si nggo ipilih i bas empat mata angin nari, arah ujung langit ku ujungna si deban.
32 “Gundari erlajarlah i bas perumpaman* batang ara nari: Kenca dahanna si nguda reh janah erbulung, mis iteh kena maka musim perlego nggo ndeher.
33 Bage ka pe, sanga idah kena kerina enda, arus iteh kena maka Anak manusia nggo i deher pintu.
34 Situhuna, lit sada kelompok kalak* si la pagi mate seh asa kerina enda terjadi.
35 Langit ras doni masap me pagi, tapi kata-kataku tetap rasa lalap.
36 “Kerna wari ras jamna, ise pe la metehsa, malekat-malekat i surga pe lang, Anak pe lang, tapi Bapak ngenca.
37 Sebap bali bagi jaman Nuah, bage me pagi kerehen* Anak manusia.
38 Ope lenga Banjir si Mbelin, kalak i bas jaman e man ras minem, dilaki-dilaki erjabu ras diberu-diberu ipejabuken, seh asa Nuah masuk ku bas bahtra.
39 Kalak e la ermediate seh ngayak reh Banjir si Mbelin ras ngkernepken kerina kalak e, bage me pagi kerehen Anak manusia.
40 Paksa si e, lit dua dilaki i juma, sada ibaba janah sada nari itadingken.
41 Dua diberu sangana nutu, sada ibaba janah sada nari itadingken.
42 Emaka teruslah erjaga-jaga, sebap la iteh kena ndigan Tuan kena reh.
43 “Tapi, ukuri enda: Adi nggo iteh tuan rumah jam piga reh pinangko, pasti terus ia erjaga-jaga janah la ipediatna rumahna ibongkar.
44 Emaka, pastiken kena nggo ersikap, sebap Anak manusia reh i bas jam si la isangka kena.
45 “Ise situhuna budak si setia janah pentar, si ipilih tuanna guna ngurus pelayan-pelayan rumahna ras mere pangan man kalak e i bas waktu si tepat?
46 Ermeriah ukur me budak e adi sanga tuanna reh, idapeti tuanna ia ngelakoken pendahinna!
47 Situhuna, ipilih tuanna kari ia ngurus kerina erta-ertana.
48 “Tapi bicara nina budak si jahat e bas ukurna, ‘Tuanku ndekah denga reh,’
49 jenari mulai ipekpekina budak-budak si deban janah man bage pe minem ia ras kalak pemabuk,
50 reh me tuan budak ndai i bas wari si la isangkana ras i bas jam si la itehna,
51 janah seh kel beratna kari ibanna ukumen kalak e janah ipersadana kari ia i bas ingan kalak si munapik. I je me ia tangis ras erderep ipenna.
Cataten i teruh
^ Nen Kamus.
^ Ntah “doni.” Nen Kamus.
^ Maksudna, kiniseran bagi persui sekalak diberu sanga melahirken.
^ Buen rumah si i je rata atapna janah melala si banci ilakoken i je.
^ Taneh si mbelang si jarang iingani.
^ Nen Kamus.
^ Ntah “anding-andingen.”
^ I bas bahasa Junani, enda maksudna sada kelompok kalak si nggeluh i bas jaman si seri.
^ Nen Kamus.
