Matius 26:1-75
-
Rencana imam-imam munuh Jesus (1-5)
-
Minak wangi icurcurken man Jesus (6-13)
-
Paskah si terakhir janah Jesus ihianati (14-25)
-
Man Berngi ras Tuan si jadi ikuten (26-30)
-
Nubuat kerna Petrus si merso (31-35)
-
Ertoto Jesus i Getsemane (36-46)
-
Jesus itangkap (47-56)
-
Persidangen i Pengadilen Agama Jahudi (57-68)
-
Petrus mersoken Jesus (69-75)
26 Kenca dung ikataken Jesus kerina enda, nina man murid-muridna,
2 “Iteh kena maka dua wari nari Paskah irayaken, janah Anak manusia iserahken pagi guna iukum mate i bas tiang.”*
3 Paksa si e, imam-imam kepala ras tua-tua si minpin bangsa e pulung i bas halamen rumah imam si mbelin si gelarna Kayapas,
4 janah arih-arih kalak e nangkap Jesus alu cara si licik guna munuh ia.
5 Tapi, nina kalak e, “Ula sanga perayan, gelah ula guntar jelma si nterem.”
6 Sanga Jesus i Betani, i rumah Simon si pernah sakit kusta,
7 sekalak diberu ndeheri ia alu maba sada botol marmar si isina minak wangi si merga, janah icurcurkenna ku takal Jesus si paksana man.
8 Ngidah si e, merawa murid-murid janah nina, “Engkai maka isia-siaken e?
9 Seh kel ergana adi idayaken, janah senna banci ibereken man kalak mesera.”
10 Meteh si e, nina Jesus man kalak e, “Engkai maka susah iban kena diberu e? Si mehuli kap ibanna bangku.
11 Sebap kalak mesera lalap nge ras kena, tapi aku labo lalap ras kena.
12 Sanga itamana minak wangi e ku dagingku, ilakokenna e guna nikapken penguburenku.
13 Situhuna, i japa pe berita si meriah iberitaken i belang-belang doni, kai si ilakoken diberu enda iceritaken ka pagi guna nginget ia.”
14 Kenca si e, sekalak i bas 12 rasul nari, si igelari Judas Iskariot, lawes ndahi imam-imam kepala,
15 janah nina, “Kai kari si ibereken kena bangku adi kuserahken* ia man kena?” Itawarken kalak e bana 30 sen logam pirak.
16 Emaka mulai jenari, terus idaramina kesempaten si cocok guna nerahken Jesus.
17 Sanga wari pertama i bas Perayan Roti si La Itama Ragi, idahi murid-murid me Jesus, nina, “I ja atendu isikapken kami Paskah man bandu?”
18 Ngaloi ia, “To, laweslah ku kota, dahilah si Anu janah kataken bana, ‘Bagenda nina Guru, “Waktu si nggo itentuken bangku nggo ndeher, kurayaken ateku Paskah ras murid-muridku i rumahndu.”’”
19 Emaka ilakoken murid-murid bagi si iperentahken Jesus janah isikapkenna perayan Paskah.
20 Paksa berngi wari, kundul ia ras 12 murid-muridna guna man.
21 Sanga kalak e man, nina, “Situhuna, sekalak i bas kena nari ihianatina kari aku.”
22 Erkiteken ceda kel ate kalak e, mulai ia sekalak-sekalak nungkun man Jesus, “Tuan, me labo aku?”
23 Nina ngaloi, “Kalak si ncelupken roti radu ras aku ku bas mangkok, ia me si nghianati aku.
24 Payo, lawes me Anak manusia e, bagi si nggo itulisken kerna ia. Tapi cilaka kel kalak si nghianati Anak manusia e! Ulin min ndai ia la lahir.”
25 Judas, si nandangi nghianati Jesus, ngaloi, “Me labo aku, Guru?”* Nina Jesus bana, “Itehndu nge jawapna.”
26 Sanga kalak e man denga, ibuat Jesus roti, kenca ia ertoto mindo pasu-pasu, icepik-cepikkenna roti e, janah iberekenna man murid-muridna, nina, “Buatlah, panlah. Enda ngertiken dagingku.”
27 Kenca si e ibuatna sada calung,* ertoto ia ngataken bujur janah iberekenna man kalak e, nina, “Minemlah kena kerina tare calung* enda,
28 sebap enda ertina darehku, ‘dareh perjanjin’ si iamburken pagi guna ngampuni dosa nterem jelma.
29 Tapi kukataken man kena, lanai bo pagi kuinem anggur seh warina kuinem anggur si mbaru ras kena i bas Kerajan Bapakku.”
30 Dungna, kenca ngendeken puji-pujin,* lawes kalak e ku Deleng Saitun.
31 Kenca si e nina Jesus man kalak e, “I bas berngi enda, kerina kari kena nadingken aku perban kai si nandangi terjadi bangku, sebap bagi si tertulis, ‘Kuserang pagi permakan e, janah merap pagi rarasen biri-biri e.’
32 Tapi kenca aku ipekeke, leben kari aku asa kena ku Galilea.”
33 Tapi ngaloi Petrus, “Aminna pe kerina kalak nadingken kam perban kai si terjadi bandu, aku labo pagi nadingken kam!”
34 Nina Jesus man bana, “Situhuna, i bas berngi enda, ope lenga tekuak manuk, nggo ipersokenndu kari aku telu kali.”
35 Ngaloi Petrus, “Aminna pe arus aku mate ras kam, pasti la kam kupersoken.” Kerina murid-murid si deban pe bage ka nina.
36 Kenca si e, seh me Jesus ras murid-murid bas sada ingan si igelari Getsemane, janah nina man kalak e, “Kundullah kena i jenda, ertoto aku lebe ku jah.”
37 Ibabana Petrus ras dua anak Sebedeus, janah paksa si e ceda atena ras getem kel pusuhna.
38 Jenari nina man kalak e, “Ceda kel ateku, tempa mate atena. Timai i jenda janah teruslah erjaga-jaga ras aku.”
39 Kenca si e miser ia ku lebe, erjimpuh ia janah ertoto, “O Bapakku, adi banci, pedauh min calung* enda i bas aku nari. Tapi, labo peratenku, peratenNdulah si jadi.”
40 Mulihken ia ndahi murid-murid janah idapetina kalak e paksana medem. Nina man Petrus, “La kin banci kena tetap erjaga-jaga sada jam saja ras aku?
41 Teruslah erjaga-jaga janah teruslah ertoto, gelah ula kena nyerah ku bas percuban. Pusuh tuhu semangat, tapi daging lemah.”
42 Kenca si e, lawes ia pedua kaliken janah ertoto, “O Bapakku, adi la kin banci enda ipedauh janah arus kuinem, peratenNdulah si jadi.”
43 Kenca si e mulihken ka ia janah idapetina kalak e paksana medem, sebap mberat matana.
44 Emaka itadingkenna kalak e, lawes ka ia janah ertoto petelu kaliken, ibelaskenna sekali nari bagi si ndai.
45 Jenari mulihi idahina murid-murid janah nina, “Engkai maka kena medem ras istirahat i bas paksa si bagenda? Nenlah! Enggo seh jamna Anak manusia ihianati i bas tan kalak perdosa.
46 Tediskenlah, ota kita lawes. Nen! Si nghianati aku nggo ndeher.”
47 Sanga ia ngerana denga, mis reh Judas, sekalak i bas 12 rasul nari, reh ia radu ras sada rombongen si nterem si maba pedang ras perpalu. Kalak e isuruh imam-imam kepala ras peminpin bangsa e.
48 Si nghianati ia nggo mere sada tanda man kalak e, nina, “Ise kari si kuema, ia me jelmana. Tangkaplah ia.”
49 Kenca e minter idahina Jesus, nina, “Mejuah-juah, Guru!”* jenari iemana ia alu lembut.
50 Tapi nina Jesus bana, “O Teman, kai kin atendu reh ku jenda?” Kenca si e, maju kalak e, itangkapna Jesus janah itagangina.
51 Rempet, sekalak si radu ras Jesus muat pedangna janah iserangna budak imam si mbelin, retap ibanna cupingna.
52 Kenca si e nina Jesus bana, “Masukken pedangndu ena ku inganna, sebap kerina si make pedang mate pagi iban pedang.
53 Ntah, akapndu kin la banci kupindo man Bapakku gelah iberekenNa bangku gundari lebih 12 pasuken malekat?
54 Adi bage, uga kata-kata i bas Kitap si Badia banci terjadi, si ngataken maka kerina arus terjadi alu cara si bage?”
55 Jenari nina Jesus man jelma si nterem e, “Akap kena kin aku enda perampok maka reh kena maba pedang ras perpalu nangkap aku? Tiap wari aku kundul ngajar i bas rumah pertoton, tapi la itangkap kena aku.
56 Tapi kerina enda terjadi gelah seh kai si itulisken nabi-nabi.” Kenca si e, kerina murid kiam nadingken ia.
57 Kalak si nangkap Jesus maba ia ku rumah Kayapas, Imam si Mbelin, i je nggo pulung ahli-ahli Undang-Undang Musa ras peminpin-peminpin.
58 Tapi Petrus terus ngikuti Jesus dauh-dauh nari, seh ku halamen rumah imam si mbelin. Kenca masuk, kundul ia ras pelayan-pelayan rumah guna ngenen kai kari si terjadi.
59 Asum si e, imam-imam kepala ras kerina anggota Pengadilen Agama Jahudi* ndarami kesaksin palsu guna ngelawan Jesus gelah ia iukum mate.
60 Tapi la lit kai pe si idat kalak e, amin gia nterem saksi palsu si reh ku lebe. Kenca si e maju me dua saksi
61 nina, “Dilaki enda ngataken, ‘Banci kuruntuhken rumah pertoton Dibata janah kubangun mulihi i bas telu wari.’”
62 Cinder me imam si mbelin janah nina, “La nge atendu katakenndu kai pe? Uga menurutndu tuduhen kalak e bandu?”
63 Tapi Jesus tetap sinik. Emaka nina imam si mbelin e man bana, “Ersumpahlah i bas gelar Dibata si nggeluh, janah kataken man kami tuhu nge kam Kristus, Anak Dibata!”
64 Ijawap Jesus, “Kena sendiri si ngatakenca. Tapi kukataken man kena, mulai gundari nari, idah kena pagi Anak manusia kundul arah kanan Si Erkuasa janah reh i datas embun i langit.”
65 Kenca si e, irigatken imam si mbelin uisna si arah darat, nina, “Enggo ihinana Dibata! Man kadeta nari kin saksi? Gundari nggo ibegi kena ia nghina Dibata.
66 Uga iakap kena?” Ijawap kalak e, “Bunuh saja ia.”
67 Kenca si e iciduri kalak e ayona janah itinjuina. Si debanna marapi ayona,
68 janah nina, “O Kristus, adi nabi kin kam, kataken dage man kami ise si nggudam kam!”
69 Sanga kundul Petrus i darat, i halamen, reh sekalak pelayan si diberu ndahi ia, nina, “Kam pe ras Jesus kap, kalak Galilea ah!”
70 Tapi ipersokenna i lebe-lebe kalak e kerina, nina, “La kuangka kai si ikatakenndu e.”
71 Sanga ia lawes ku gerbang, iperdiateken diberu si deban ia janah nina man kalak si lit i je, “Dilaki e kap si ras Jesus kalak Nasaret e.”
72 Mulihi ipersokenna janah ersumpah, “La ia kutandai pe!”
73 La ndekah kenca si e, kalak si cinder i je ndahi Petrus janah nina, “Pasti kam pe salah sada i bas kalak e, teridah kel arah carandu ngerana.”
74 Kenca si e mulai ia ersumpah, “La ia kutandai!” Jenari minter tekuak manuk.
75 Kenca bage teringet Petrus nandangi kai si nggo ikataken Jesus, “Ope lenga tekuak manuk, nggo ipersokenndu aku telu kali.” Jenari lawes ia ndarat janah nderkuh ia tangis.
Cataten i teruh
^ Ntah “kayu.”
^ Ntah “kuhianati.”
^ As. “Rabbi.”
^ Ntah “cangkir.”
^ Ntah “cangkir.”
^ Ntah “masmur.”
^ Ntah “cangkir.” Enda ngertiken peraten Dibata guna mpediat Jesus mate alu tuduhen ihinana Dibata.
^ As. “Rabbi.”
^ As. “Sanhedrin.”
