Matius 27:1-66
27 Paksa erpagi-pagi, kerina imam kepala ras peminpin bangsa e arih-arih guna ngelawan Jesus gelah banci munuh ia.
2 Kenca Jesus iiket, ibabana ia janah iserahken man Gubernur Pilatus.
3 Judas, si nghianati Jesus, erkadiola* kel paksa idahna Jesus nggo iukum. Emaka iulihkenna 30 sen logam pirak e man imam-imam kepala ras peminpin-peminpin.
4 Nina, “Enggo erdosa aku perban kuhianati dareh kalak si la ersalah e.” Ngaloi kalak e, “Kai ka kin urusenna ras kami? Ena urusenndu!”
5 Emaka ibenterkenna kerina logam pirak e ku rumah pertoton, jenari bunuh diri* ia.
6 Tapi ibuat imam-imam kepala kerina logam pirak e, janah nina, “La banci itama enda i bas ingan penimpanen si badia, perban enda sen dareh.”
7 Kenca arih-arih, ipake kalak e sen ndai guna nukur taneh tukang kudin, si ijadiken kuburen man kalak pertandang.
8 Erkiteken si e me maka seh asa gundari taneh e igelari Taneh Dareh.
9 Alu bage, terjadi me kai si ikataken arah Nabi Jeremia: “Ibuat kalak e 30 sen logam pirak e, eme erga si itetapken piga-piga kalak Israel man dilaki e,
10 janah ipakena e guna nukur taneh tukang kudin, sue ras kai si nggo iperentahken Jahwe man bangku.”
11 Gundari cinder Jesus i lebe-lebe Gubernur, janah isungkun Gubernur e ia, “Kam kin Raja Kalak Jahudi?” Ijawap Jesus, “Kam sendiri si ngatakenca.”
12 Tapi sanga ituduh imam-imam kepala ras peminpin-peminpin e ia, la sitik pe ijawapna.
13 Kenca si e, isungkun Pilatus ia, “La kin ibegindu maka seh kel lalana tuduhen kalak e man bandu?”
14 Tapi la ijawapna ia, sengkebabah ranan pe lang, emaka mamang kel ate Gubernur e.
15 I bas tiap Perayan Paskah, lit kebiasan Gubernur mbebasken sekalak tahanen si ipilih jelma si nterem.
16 Paksa si e lit sekalak penjahat si terkenal si paksana ipenjaraken, gelarna Barabas.
17 Emaka paksa kalak e pulung, nungkun Pilatus, “Si apai ate kena kubebasken man kena, Barabas ntah Jesus si igelari Kristus?”
18 Iteh Pilatus perban cian nge ate kalak e maka iserahkenna Jesus.
19 Selain si e, sanga Pilatus kundul i kursi penghakimen, ikirim diberuna pesan man bana, “Ula campurindu urusen kalak si benar e, sebap kunipiken ia janah mbiar kel aku iban nipi e.”
20 Tapi iajuk-ajuk imam-imam kepala ras peminpin-peminpin e jelma si nterem gelah ipindona Barabas si ibebasken, tapi Jesus iukum mate.
21 Emaka nungkun Gubernur e, “Si apai ate kena si kubebasken i bas dua kalak enda?” Ijawap kalak e, “Barabas.”
22 Nina Pilatus, “Adi bage, kai si arus kulakoken man Jesus si igelari Kristus?” Kerina kalak e ngataken, “Bunuh ia i bas tiang!”*
23 Isungkunna ka, “Engkai? Kejahaten kai kin si ilakokenna?” Tapi terus reh gangna sora kalak e, “Bunuh ia i bas tiang!”*
24 Kenca idahna kai si ilakokenna e la berhasil, janah reh gejekna ka jelma si nterem e, ibuat Pilatus lau janah iburihina tanna i lebe-lebe jelma si nterem, nina, “Aku la ertanggung jawap nandangi dareh dilaki enda. Kenalah si arus ertanggung jawap.”
25 Kerina kalak e ngaloi, “Kami ras anak-anak kami si nanggungsa darehna.”
26 Kenca si e, ibebaskenna Barabas man kalak e, tapi isuruhna gelah Jesus iligasi janah iserahken guna iukum mate i tiang.*
27 Kenca si e, prajurit-prajurit gubernur maba Jesus ku ingan tading gubernur janah ipepulung kalak e kerina pasuken gelah ngkelilingi ia.
28 Kenca itangtangi kalak e uis Jesus, ipakeken kalak e man bana jubah si megara,
29 iban kalak e ka mahkota i bas peren duri nari, janah itama kalak e ku takal Jesus. Itamaken kalak e ka buluh ku bas tanna si kanan. Kenca si e erjimpuh kalak e i lebe-lebena janah ihina kalak e ia, nina, “Mejuah-juah, o Raja Kalak Jahudi!”
30 Jenari iciduri kalak e ia janah ibuat kalak e buluh e, kenca si e ipekpeki kalak e takal Jesus.
31 Dungna, kenca ihina kalak e Jesus, itangtangi kalak e jubah Jesus jenari ipakeken kalak e man Jesus uisna si arah darat, kenca si e ibaba kalak e ia gelah ipakuken i bas tiang.*
32 Sanga kalak e ndarat, jumpa ia ras Simon kalak Kireni. Ipaksa kalak e ia maba tiang siksan* Jesus.
33 Sanga seh kalak e i bas ingan si igelari Golgota, si ertina Ingan Tengkorak,
34 ibereken kalak e bana anggur si icampur ras pegu* gelah iinemna, tapi kenca inanamina, la ia nggit nginemsa.
35 Kenca ipakuken kalak e ia i bas tiang,* ibagi-bagiken kalak e uisna si arah darat alu erban undi,
36 janah kundul kalak e i je njagai ia.
37 Itama kalak e ka i datas takalna tulisen si nuduh ia, si isina, “Enda me Jesus, Raja Kalak Jahudi.”
38 Paksa si e, lit ka dua perampok si ipakuken i sampingna, sada arah kananna, janah sada nari arah kirina.
39 Kalak si lewat ngupirken takalna janah melasken ranan si nghina ia,
40 nina, “O kam si atendu ngeruntuhken rumah pertoton janah ibangunndu bas telu wari, selamatkenlah bandu! Adi anak Dibata kin kam, nusurlah arah tiang siksan* e nari!”
41 Bage ka pe, imam-imam kepala, ahli Undang-Undang Musa, ras peminpin-peminpin, mulai nghina ia, nina,
42 “Kalak si deban iselamatkenna, tapi dirina la terselamatkenna! Ia me Raja Israel, arusna nusur min ia gundari i bas tiang siksan* nari, gelah tek kita bana.
43 Ia tek man Dibata, pediatlah Dibata gundari nelamatken ia adi jadi kin ate Dibata nandangi ia, sebap nina, ‘Aku Anak Dibata.’”
44 Perampok-perampok si ipakuken i sampingna pe nghina ia ka alu cara si bage.
45 Mulai jam 12 ciger,* kerina daerah e jadi gelap seh asa jam 3 karaben.*
46 Kira-kira jam telu karaben, erlebuh Jesus alu sora si megang, nina, “Eli, Eli, lama sabakhtani?” si ertina, “O Dibataku, Dibataku, ngkai maka itadingkenNdu aku?”
47 Megi si e, piga-piga kalak si cinder i je ngataken, “Ilebuh-lebuhna Elia.”
48 Minter kiam sekalak muat bunga karang, irendamna i bas anggur si macem, itamana e ku bas buluh, kenca si e iberekenna man Jesus gelah inemna.
49 Tapi si debanna ngataken, “Pediat saja ia! Sinen ntah reh kin Elia e nelamatken ia.”
50 Mulihi Jesus erlebuh alu sora si megang, kenca si e mate me ia.
51 Rempet, tirai bas ingan si badia merigat jadi dua datas nari seh ku teruh, terjadi gempa, janah batu-batu pe pecahen.
52 Kuburen-kuburen pe terbuka, melala mayat kalak si badia si nggo medem bas kematen merapen ku darat,
53 janah nterem kalak ngidah si e. (Kenca Jesus ipekeke, kalak si lit i deher kuburen-kuburen e masuk ku kota si badia.*)
54 Tapi sanga perwira ras kalak si njagai Jesus ngidah gempa ras kerina si terjadi, mbiar kel kalak e janah nina, “Ia pasti Anak Dibata.”
55 I je nterem diberu si ngenenca dauh-dauh nari. Kalak e nggo nemani Jesus i Galilea nari guna nampati ia,
56 piga-piga eme Maria Magdalena, Maria nande Jakup ras Joses, bage pe nande anak-anak Sebedeus.
57 Kenca nggo ben wari, reh me sekalak dilaki si bayak arah Arimatea, gelarna Jusup, si nggo ka jadi murid Jesus.
58 Ijumpaina Pilatus janah ipindona mayat Jesus. Jenari iperentahken Pilatus gelah mayat e ibereken bana.
59 Ibuat Jusup mayat e, ibalutina alu uis linen halus si bersih,
60 jenari iamparkenna i bas kuburenna si mbaru, si nggo ikurakna i uruk batu. Kenca si e igulingkenna sada batu si galang guna nutupi kuburen e, jenari lawes ia.
61 Tapi Maria Magdalena ras Maria si deban terus i je, kundul i lebe-lebe kuburen e.
62 Pepagina, kenca wari Persikapen Sabat, imam-imam kepala ras kalak Parisi pulung i lebe-lebe Pilatus,
63 nina, “Pak, inget kami kai si kataken penipu e sanga ia nggeluh denga, nina, ‘Kenca telu wari, ipekeke me aku.’
64 Emaka, perentahkenlah gelah kuburen e ijaga seh wari si peteluken, gelah ula reh murid-muridna janah itangkona mayat e, jenari nina man kalak, ‘Enggo ipekeke ia i bas si mate nari!’ Adi bage, penipun si terakhir enda keleken kari asangken si pertama.”
65 Nina Pilatus, “Banci ibaba kena penjaga. Te kena jagalah kuburen e asa ngasup kena.”
66 Emaka lawes me kalak e, itutupna kuburen e alu batu janah itamana penjaga i je.
Cataten i teruh
^ Ntah “nyesal.”
^ Ntah “ndelis.”
^ Ntah “kayu.”
^ Ntah “kayu.”
^ Ntah “kayu.”
^ Ntah “kayu.”
^ Nen Kamus.
^ Lau si pagit.
^ Ntah “kayu.”
^ Nen Kamus.
^ Nen Kamus.
^ I bas kalak Jahudi, enda jam si peenemken.
^ I bas kalak Jahudi, enda jam si pesiwahken.
^ Maksudna, Jerusalem.
