Matius 28:1-20
28 Kenca wari Sabat, sanga nandangi terang i bas wari pertama minggu e, Maria Magdalena ras Maria si deban reh guna ngenen kuburen e.
2 Ope si e, nggo terjadi gempa si megegeh, sebap malekat Jahwe nusur surga nari, reh ia janah igulingkenna batu si nutup kuburen e, kenca si e kundul ia i datasna.
3 Teridah ia bagi kilat, janah uisna mbentar bagi salju.
4 Kalak si erjaga pe seh kel biarna, nggirgir ia jenari lanai kemuit.
5 Tapi nina malekat man diberu-diberu e, “Ula mbiar, sebap kuteh maka idarami kena Jesus si nggo ibunuh i bas tiang.*
6 La ia i jenda, bagi si nggo ikatakenna, ia nggo ipekeke. Mari, nen inganna iamparken.
7 Kenca si e mislah lawes janah kataken man murid-muridna maka ia nggo ipekeke i bas si mate nari. Gundari sangana ia i bas perdalanen ku Galilea ngelebei kena. Jumpa jah kari kena. Enda me pesanku man kena.”
8 Emaka, meter kalak e lawes arah kuburen nari, alu mbiar janah meriah ka kel ukurna, kiam ia mpebetehkenca man murid-murid Jesus.
9 Janah nen! Ijumpai Jesus kalak e, nina, “Mejuah-juah!” Ideheri kalak e Jesus, ijemakna nahena janah erjimpuh man bana.
10 Kenca si e nina Jesus man kalak e, “Ula mbiar! Laweslah, kataken man senina-seninaku gelah lawes kalak e ku Galilea, i je me kari idahna aku.”
11 Sanga kalak e i bas perdalanen, piga-piga penjaga lawes ku kota ngelaporken man imam-imam kepala kerna kerina si nggo terjadi.
12 Kenca imam-imam e arih-arih ras peminpin-peminpin, ibereken kalak enda melala sen pirak man prajurit-prajurit,
13 janah nina, “Bagenda kari ningen, ‘I bas berngi wari reh murid-muridna janah itangkona mayat Jesus paksa kami medem.’
14 Adi ibegi gubernur kari kerna si enda, kami kari si njelaskensa man bana,* emaka ula kena kuatir.”
15 Emaka ibuat kalak e sen pirak ndai janah ilakokenna bagi si iperentahken. Berita enda terbegi i tengah-tengah kalak Jahudi seh asa gundari.
16 Tapi, 11 murid lawes ku deleng i Galilea, ingan si nggo itentuken Jesus guna jumpa.
17 Sanga idah murid-murid e Jesus, erjimpuh kalak e, tapi piga-piga ragu denga.
18 Ideheri Jesus kalak e janah nina, “Kerina kuasa i surga ras i doni nggo ibereken man bangku.
19 Emaka, laweslah, banlah kalak i bas kerina bangsa jadi murid-muridku, peridikenlah kalak e i bas gelar Bapa ras Anak ras kesah si badia,
20 ajarlah kalak e ngelakoken kerina si nggo kuperentahken man kena. Janah ingetlah! Katawari pe aku tetap ras kena seh ku kedungen jaman* enda.”
