Matius 4:1-25
4 Kenca si e, ibabai kesah Dibata me Jesus ku taneh mesawang,* i je me ia icubai Iblis.
2 Kenca 40 wari 40 berngi ia erpuasa, igejapna melihe.
3 Reh me Iblis* ncubai ia nina, “Adi anak Dibata kin kam, suruh dage batu-batu enda jadi roti.”
4 Tapi ngaloi ia, “Lit tertulis, ‘Manusia arus nggeluh labo arah roti saja, tapi arah tiap kata si ibelasken Jahwe.’”
5 Kenca si e ibaba Iblis ia ku kota si badia, ku ingan si meganjangna i rumah pertoton,
6 janah ikatakenna man bana, “Adi anak Dibata kin kam, dabuhken dage bandu ku teruh, sebap lit tertulis, ‘IsuruhNa kari malekat-malekatNa,’ janah, ‘Itatangna kari kam i bas tanna, alu bage la banci nahendu terantuk ku batu.’”
7 Nina Jesus man bana, “Lit ka nge tertulis, ‘Ula icubaindu Jahwe Dibatandu.’”
8 Ibabai Iblis ka ia ku deleng si seh kel ganjangna janah icidahkenna man bana kerina kerajan doni enda ras kemulianna.
9 Nina, “Kerina enda banci kubereken man bandu adi erjimpuh kam janah nembah sekali saja man bangku.”
10 Kenca si e ngaloi Jesus, “Laweslah Setan! Sebap lit tertulis, ‘Jahwe Dibatandu si arus isembahndu, janah man baNa saja ngenca kam arus mereken pelayanen si badia.’”
11 Dungna itadingken Iblis me ia, jenari reh me malekat-malekat janah mulai ngelayani ia.
12 Sanga ibegina Johanes nggo itangkap, lawes ia ku Galilea.
13 Jenari, kenca itadingkenna Nasaret, lawes ia ku Kapernaum i tepi lawit i daerah Sebulon ras Naptali, janah tading ia i je.
14 Alu bage terjadi me kai si ikataken arah Nabi Jesaya,
15 “O taneh Sebulon ras taneh Naptali i segedang dalan si nuju ku lawit, i sebrang Lau Jordan, Galilea si iingani bangsa-bangsa si deban!
16 Kalak si kundul i bas kegelapen ngidah terang si ersinar, janah kalak si kundul i bas ingan si itutupi bayangen kematen, nggo isinari terang e.”
17 Jenari, mulai Jesus erberita janah nina, “Ertobatlah,* sebap Kerajan surga nggo ndeher.”
18 Sanga erdalan ia i tepi Lawit Galilea, idahna dua kalak si ersenina, Simon si igelari Petrus ras agina Andreas, paksana ngamburken jala ku lawit erkiteken kalak e nelayan.
19 Janah nina man kalak e, “Mari ikutken aku, kuban kena kari jadi si njala manusia.”
20 Mis itadingken kalak e jalana janah ikutkenna ia.
21 Jenari, idahna dua kalak si deban si ersenina, Jakup anak Sebedeus ras seninana Johanes. Kalak e ras bapakna eme Sebedeus, si paksana pesikap jalana i bas perahu, janah ilebuhna kalak e.
22 Mis itadingken kalak e perahu e bage pe bapakna, janah ikutken kalak e Jesus.
23 Kenca si e isiarina kerina daerah Galilea, ngajar ia i bas ingan-ingan pulung kalak Jahudi.* Iberitakenna berita si meriah kerna Kerajan ras ipepalemna kerina pinakit bage pe kerina masalah kesehaten jelma si nterem.
24 Berita kerna ia seh ku belang-belang Siria. Itaruhken kalak man bana kerina kalak si pinakiten, si kerasuken, ras si sawanen bage pe si lumpuh. Janah ipepalemna kerina kalak e.
25 Erkiteken si e, nterem jelma ngikutken ia. Lit i bas Galilea, Dekapolis,* Jerusalem, Judea, bage pe sebrang Lau Jordan nari.
Cataten i teruh
^ Taneh si mbelang si jarang iingani.
^ Ntah “Penggoda.”
^ Ntah “Jera dingen robahlah.”
^ As. “sinagoga.” Nen Kamus.
^ Ntah “Wilayah Sepuluh Kota.”
