Matius 5:1-48
5 Sanga idahna jelma si nterem e, nangkih ia ku deleng. Kenca ia kundul, reh me murid-muridna ndahi ia.
2 Mulai ia ngerana janah iajarina kalak e, nina,
3 “Ermeriah ukur me kalak si iakapna perlu itandaina Dibata,* erkiteken man bana pagi Kerajan surga.
4 “Ermeriah ukur me kalak si erceda ate, erkiteken iapuli me ia pagi.
5 “Ermeriah ukur me kalak si melias janah lembut, erkiteken iwarisina pagi doni enda.
6 “Ermeriah ukur me kalak si muas ras melihe nandangi kai si benar, erkiteken ipuasken me ia pagi.
7 “Ermeriah ukur me kalak si perkuah, erkiteken idatna me pagi perkuah ate.
8 “Ermeriah ukur me kalak si bersih pusuhna, erkiteken idahna me pagi Dibata.
9 “Ermeriah ukur me kalak si erban dame, erkiteken igelari me ia pagi anak-anak Dibata.
10 “Ermeriah ukur me kalak si isiksa perban kai si benar, erkiteken man bana pagi Kerajan surga.
11 “Ermeriah ukur me kena adi ihina ras isiksa kalak kena, janah ikatakenna kerina bual si jahat kerna kena erkiteken aku.
12 Sebap nabi-nabi si mbarenda pe isiksa alu cara si bage. Senang janah ermeriah ukurlah erkiteken mbelin upah kena i surga.
13 “Kena me sira doni, tapi adi sira e lanai masin, uga erbanca masin mulihi? E lanai lit gunana, selain iambekken ku darat janah iperjaki kalak.
14 “Kena me terang doni. Sada kota la banci ibuniken adi inganna i datas deleng.
15 Kalak si mpegara lampu, labo itamana i teruh tumba, tapi i bas inganna, janah e banci nerangi kerina si lit i bas rumah e.
16 Emaka, ersinarlah ban terang kena i lebe-lebe jelma si nterem, gelah banci idahna perbahanen kena si mehuli janah imuliakenna Bapak kena si i surga.
17 “Ula iakap kena aku reh guna nasapken Undang-Undang Musa ntah pe Ajaren Nabi-Nabi. Aku reh labo guna nasapkenca, tapi guna erbanca terjadi.
18 Tuhu-tuhu kel kukataken man kena, adi lit denga langit ras doni, sada hurup ntah sada bagin si kitikna pe i bas Undang-Undang Musa nari la banci masap seh asa kerina isina terjadi.
19 Emaka, ise pe si ngelanggar salah sada perentah si kitikna, janah iajarina kalak si deban ngelakoken si bage, la ia cocok* masuk ku* Kerajan surga. Tapi ise pe si ndalankenca ras ngajarkenca, cocok* ia masuk ku* Kerajan surga.
20 Kukataken man kena, adi perbahanen kena la ulin asangken perbahanen ahli-ahli Undang-Undang Musa ras kalak Parisi, la banci kena masuk ku Kerajan surga.
21 “Enggo pernah ibegi kena kata-kata si ibereken man nini bulang kena, ‘Ula munuh. Ise pe si munuh ibaba pagi ku pengadilen.’
22 Tapi kukataken man kena, ise pe si terus merawa man seninana ibaba pagi ku pengadilen. Ise pe si ngisakken seninana ibaba pagi ku Pengadilen Agama.* Janah ise pe si ngataken, ‘O kalak motu!’ ialokenna pagi ukumen Gehena* si gurlah.
23 “Emaka adi ibabandu persembahenndu ku batar-batar persembahen, janah i je ingetndu lit si la senang man bandu,
24 tadingkenlah persembahenndu e i lebe batar-batar persembahen. Kenca si e, laweslah kam. Erdame kam lebe ras ia, jenari mulihken kam janah bereken persembahenndu e.
25 “Adi lit kalak ngaduken kam ku pengadilen, mislah dungi masalah e sanga kam ras ia i bas perdalanen denga nuju ku je, alu bage la ibabana kam ku hakim, hakim nari ku petugas pengadilen, kenca si e kam ipenjaraken.
26 Pasti la banci kam ndarat i je nari adi lenga igalarindu kerina utangndu seh asa si kitikna.*
27 “Enggo pernah ibegi kena ikataken, ‘Ula erlua-lua.’
28 Tapi kukataken man kena, ise pe si terus ngenen sekalak diberu seh ngasa turah napsuna man diberu e, ia nggo erlua-lua ras diberu e i bas pusuhna.
29 Emaka, gundari, adi matandu si kanan erbanca kam erdosa,* cungkil janah ambekkenlah e. Padin sada matandu bene asangken kerina dagingndu iambekken ku Gehena.*
30 Janah, adi tanndu si kanan erban kam erdosa,* potonglah e janah ambekken. Padin sada anggota dagingndu bene asangken kerina dagingndu masuk ku Gehena.*
31 “Selain si e, lit ikataken, ‘Ise pe si iceraikenna ndeharana arus iberena ia surat cerai.’
32 Tapi, kukataken man kena, ise pe si iceraikenna ndeharana padahal ndeharana e la ngelakoken perbahanen seks si salah,* ia banci erban ndeharana e erlua-lua, janah ise pe si ngempoi diberu si iceraiken e erlua-lua ka.
33 “Pernah ka ibegi kena maka nggo ipebetehken man nini bulang kena nai, ‘Ula ersumpah adi la itepatindu. Arus itepatindu janjindu man Jahwe.’
34 Tapi kukataken man kena: Ula ersumpah nandangi kai pe, ntah nandangi surga, erkiteken e tahta Dibata;
35 ntah nandangi doni, erkiteken e ingan naheNa; ntah nandangi Jerusalem, erkiteken e kota Raja si mbelin.
36 Ula ersumpah nandangi takalndu, erkiteken la banci iubahndu sada buk pe jadi mbentar ntah pe mbiring.
37 Adi ikataken kena ‘Ue,’ e arus ertina ue, janah adi ‘Lang,’ ertina lang, sebap kai pe selain si e rehna i bas si jahat* nari.
38 “Pernah ibegi kena ikataken, ‘Mata ganti mata janah ipen ganti ipen.’
39 Tapi kukataken man kena: Ula lawan kalak jahat, sebalikna adi iparap kalak ayondu si sebelah kanan, bere ka ayondu si sebelah kiri.
40 Adi lit si atena maba kam ku pengadilen guna ndatken bajundu, bereken ka cabinndu man bana.
41 Janah adi lit sekalak si erkuasa nuruh kam maba barang sada kilometer dauhna, babalah barang e dua kilometer dauhna.
42 Adi lit si mindo bandu, berekenlah. Janah adi lit si atena minjam* bandu, pepinjamkenlah.
43 “Pernah ibegi kena ikataken, ‘Arus ikelengindu kalak si deban, janah segatlah atendu musuhndu.’
44 Tapi, kukataken man kena: Teruslah kelengi musuh-musuh kena janah totokenlah kalak si niksa kena,
45 alu bage terbukti me maka kena anak-anak Bapak kena si i surga, erkiteken nggo ibanNa pultak matawariNa man kalak si jahat bage pe man kalak si mehuli, janah ibanNa udan man kalak si bujur bage pe man si la bujur.
46 Sebap adi kalak si ngkelengi kena ngenca ikelengi kena, kai upah kena? La kin pengalo cuke pe bage ka nge perbahanenna?
47 Janah adi turang senina kena ngenca iperkuanken kena, kai kelebihen kena? La kin kalak i bas bangsa-bangsa si deban nari pe bage ka nge perbahanenna?
48 Emaka arus kena sempurna, bali bagi Bapak kena si i surga pe sempurna.
Cataten i teruh
^ Ntah “si mindo keperlun rohani alu meseksek.”
^ Ntah “metunggung.”
^ As. “igelari pagi ia si kitikna i bas Kerajan surga.”
^ Ntah “metunggung.”
^ As. “igelari pagi ia si mbelin i bas Kerajan surga.”
^ Ntah “Sanhedrin.”
^ Ingan nutung sampah i darat Jerusalem. Nen Kamus.
^ As. “kuadran si kitikna.”
^ As. “tertuktuk.”
^ Ingan nutung sampah i darat Jerusalem. Nen Kamus.
^ As. “tertuktuk.”
^ Ingan nutung sampah i darat Jerusalem. Nen Kamus.
^ Bahasa Junani, porneia. Nen Kamus.
^ Ntah “Setan.”
^ Maksudna, minjam alu la erbunga.
