Pilemon 1:1-25
1 I bas Paulus nari, si ipenjaraken erkiteken Kristus Jesus bage pe i bas Timotius nari, seninata. Surat enda man Pilemon, teman sada dahin si ikelengi kami,
2 janah man turangta Apia, ras Arkipus temanta seperjuangen, bage pe man runggun si pulung i bas rumahndu:
3 Mbera ialoken kena lias ate si mbelin ras kedamen arah Dibata eme Bapakta ras arah Tuan Jesus Kristus.
4 O seninaku Pilemon, rusur kukataken bujur man Dibataku paksa kuinget kam i bas totoku,
5 sebap rusur kubegi kerna kinitekenndu bage pe kerna kekelengenndu man Tuan Jesus bage pe man kerina kalak si badia.
6 Ertoto aku gelah kinitekenndu bage pe kiniteken turang seninandu ngiahken kam gelah sadar maka nggo sialoken kerina si mehuli arah Kristus nari.
7 O seninaku, mbelin kel keriahen ukur si kugejapken janah terapul kel aku paksa kubegi kerna kekelengenndu erkiteken nggo ipegegehindu kalak si badia.
8 Emaka, aku selaku rasul Kristus, pang merentahken kam guna ngelakoken kai si arus ilakokenndu.
9 Tapi ulin kuakap mindo man bandu erkiteken keleng ate. Si enda kuban perban aku, Paulus, nggo metua, janah sangana ipenjaraken erkiteken Kristus Jesus.
10 Mindo kel aku guna anakku, Onesimus, erkiteken aku nggo bali bagi bapakna sanga aku bas penjara.
11 Mbarenda la ia erguna man bandu, tapi gundari ia nggo erguna man bandu bage pe man bangku.
12 Kusuruh ia, si seh kel ateku kelengna ndahi kam mulihi.
13 Situhuna, i jenda min ateku ia ras aku gelah banci igantikenna kam guna ngelayani aku sedekah aku ipenjaraken erkiteken berita si meriah.
14 Tapi, la ateku kulakoken kai pe adi la isetujuindu. Ateku min perbahanenndu si mehuli e ilakokenndu alu ukur meriah, labo erkiteken terpaksa.
15 Banci saja enda me sebapna maka itadingkenna kam kentisik, gelah banci idatndu ia mulihi seh rasa lalap,
16 lanai selaku budak, tapi lebihen asangken budak, eme selaku sekalak senina si ikelengi. Keleng kel ateku ia, tapi pasti reh kelengna kari atendu ia, selaku budakndu bage pe selaku pengikut Tuan.
17 Emaka, adi temanndu kin iakapndu aku, alokenlah ia alu mehuli bagi kam ngaloken aku.
18 Selain si e, adi lit kin salahna ntah pe utangna bandu, aku sajalah si nanggungsa.
19 Aku, Paulus, aku sendiri si nulissa surat enda: Kugalari pagi kerina mulihi man bandu. La perlu kam kuingetken maka kam pe rutang kegeluhen man bangku.
20 O seninaku, sampatindu min aku i bas si enda guna Tuanta, gelah meriah ukurku sebap kita radu ras pengikut Kristus.
21 Tek aku maka ilakokenndu pemindonku man bandu, emaka kutulis surat enda man bandu sebap tek aku maka lebihen asa si kupindo e pe nggit nge kam ngelakokenca.
22 Selain si e, sikapkenlah inganku tading, sebap ngarap kel aku erkiteken pertotonndu banci aku bebas janah ndahi kam.
23 Epapras si ipenjaraken ras aku erkiteken Kristus Jesus, kirim salam man bandu,
24 bage pe temanku sada dahin eme Markus, Aristarkus, Demas, ras Lukas.
25 Mbera lias ate si mbelin arah Tuan Jesus Kristus nemani perbahanen si mehuli si ilakoken kena.
