Pilipi 1:1-30
1 Surat enda i bas Paulus ras Timotius nari, budak Kristus Jesus. Surat enda man kerina kalak si badia i Pilipi, si ersada ras Kristus Jesus, bage pe man pengawas-pengawas* ras si nampati runggun:
2 Mbera lit i bas kena lias ate si mbelin ras kedamen arah Dibata eme Bapakta, bage pe arah Tuan Jesus Kristus.
3 Bujur ningku lalap man Dibata paksa kuinget kena.
4 Tiap ertoto aku guna kena kerina, meriah kel ukurku notokenca
5 erkiteken ibereken kena penampat guna berita si meriah mulai kin wari pertama ibegi kena seh asa gundari.
6 Tek kel aku maka idungi Dibata nge dahin si mehuli si nggo imulaiNa i bas diri kena seh asa wari Kristus Jesus.
7 Patut nge bagenda penggejapenku kerna kena kerina, sebap kena lit i bas pusuhku. Isampati kena aku paksa aku ipenjaraken, bage pe sanga sipake undang-undang guna mbela berita si meriah. Alu bage ikut kena ras aku nggejapken lias ate Dibata si mbelin.
8 Dibata si jadi saksi maka tedeh kel ateku kena kerina, sebap keleng ateku kena bali bagi Kristus Jesus ngkelengi kena.
9 Terus kutotoken gelah ertambahna kekelengen kena, gelah benar pemeteh kena, gelah mbages pengangkan kena,
10 gelah banci ipastiken kena kai si lebih penting, alu bage kena la erpandangen ntah pe la erban kalak tertuktuk seh asa wari Kristus.
11 Selain si e, kutotoken gelah arah Jesus Kristus, reh buena ilakoken kena kai si benar,* alu bage Dibata ipuji ras imuliaken.
12 O turang senina, ateku min gelah iteh kena maka kai si terjadi bangku kepeken erban kemajun i bas berita si meriah.
13 Kerina Pengawal Kerajan ras kerina kalak si deban nggo meteh maka aku ipenjaraken erkiteken Kristus.
14 Perban aku ipenjaraken, teremen turang senina si ngelayani Tuan jadi terpegegehi janah reh pangna mpeseh kata Dibata alu la mbiar.
15 Memang lit kalak si mberitaken kerna Kristus perban cian janah nggit rubati, tapi kalak si deban mberitakenca perban bujur ukurna.
16 Kalak si mberitaken perban bujur ukurna, ilakokenna erkiteken keleng ate. Iteh kalak e maka aku nggo ipilih guna mbela berita si meriah.
17 Kalak si mberitaken perban cian janah nggit rubati, ilakokenna labo erkiteken bujur ukurna, tapi gelah susah kuakap i bas penjara.
18 Kai asilna? Ugapa pe ukur kalak e, bujur ntah lang, tetap nge iberitaken kerna Kristus, janah si e erban aku ermeriah ukur. Situhuna, terus nge aku ermeriah ukur
19 sebap kuteh maka aku iselamatken erkiteken toto kena ras penampat kesah si badia arah Jesus Kristus.
20 Ngarap kel aku janah tek kel aku maka labo pagi kuakap mela. Tapi erkiteken bebas aku ngerana, gundari Kristus imuliaken erkelangken dagingku, bali bagi si nggo-nggona, la soal aku nggeluh ntah pe mate.
21 Sebap adi aku nggeluh, aku nggeluh guna Kristus, janah adi aku mate, e keuntungen man bangku.
22 Emaka adi nggeluh denga aku i bas dagingku enda, reh buena me dahin si mehuli si kuhasilken. Tapi labo kukataken man kena kai si kupilih.
23 La kuteh apai si man pilihen i bas si dua e. Merhat kel aku ibebasken gelah radu ras Kristus, erkiteken si e pasti ndauh ulin.
24 Tapi adi guna kena, ulin nge aku nggeluh i bas dagingku enda.
25 Emaka, tek kel aku kerna si enda, kuteh maka aku tetap nggeluh janah terus ras kena guna kemajun ras keriahen ukur kena i bas kiniteken.
26 Alu bage, sanga mulihken aku ndahi kena, reh tambahna keriahen ukur kena selaku pengikut Kristus Jesus.
27 Perbahanen kena arus sue ras berita si meriah kerna Kristus, alu bage la soal aku reh janah jumpa ras kena ntah lang, banci kubegi maka kena tetap paguh, tetap sepenggejapen ras seperukuren, ras-ras kena erjuang guna tetap erkiniteken nandangi berita si meriah,
28 janah sitik pe kena la mbiar man musuh kena. Kerina enda jadi bukti maka ikernepken nge kalak e pagi, tapi kena iselamatken. Bukti enda rehna i bas Dibata nari.
29 Enggo ibereken kehamaten man kena labo saja guna erkiniteken man Kristus, tapi pe ngenanami kiniseran erkiteken ia.
30 Enggo idah kena uga perjuangenku, janah kena pe erjuang ka nge bali bagi aku. Gundari pe ibegi kena maka aku terus erjuang denga bage si gelgel e.
