Pilipi 3:1-21
3 O turang senina, emaka teruslah kena ermeriah ukur erkiteken Tuhan. Labo kuakap dalih ngulihisa kai si nggo kutulis man kena. Enda guna keselamaten kena.
2 Hati-hatilah man kalak si bali bagi biang. Hati-hatilah man kalak si jahat. Hati-hatilah man kalak si atena gelah kena isunat.*
3 Kita kap si nggo tuhu-tuhu isunat, erkiteken kita ngelakoken pelayanen si badia alu penampat kesah si badia Dibata, ermegah kita i bas Kristus janah la kita tek man kai si lit i bas manusia,
4 aminna pe banci aku ermegah kerna kai si lit i bas manusia.
Kerna kai si lit i bas manusia, adi ibandingken ras kalak si deban buen nge alasenku guna ermegah.
5 Aku isunat i bas wari pewaluhken, aku kesusuren Israel, arah suku Benyamin nari, janah orang tuaku pe kalak Heber. Menurut undang-undang aku kalak Parisi.
6 Semangat kel aku niksa runggun janah la lit si salah si kulakoken menurut undang-undang.
7 Tapi erkiteken Kristus, kerina si mbarenda kuakap mereken keuntungen, gundari nggo ngerugiken kuakap.*
8 Erkiteken merga kel kuakap pemeteh kerna Kristus Jesus, Tuanku, dungna kerinana nggo kuanggap ngerugiken. Guna ia nggo kutadingken kerinana janah kuanggap e sampah gelah banci aku rembak ras Kristus.*
9 Janah banci aku itandai selaku kalak si ersada ras ia, labo erkiteken kudalanken Undang-Undang Musa tapi perban erkiniteken aku man Kristus, eme sebapna ikataken Dibata aku kalak benar.
10 Ateku min kuteh kerna ia, kerna kuasa si mpekeke ia, janah ikut ngenanami kiniseran ras mate bali bagi ia.
11 Kulakoken si e gelah lit kesempatenku ipekeke i bas kekeken si pertama i bas si mate nari.
12 Labo kukataken maka nggo kudatken hadiah e ntah pe nggo jadi sempurna. Tapi terus kuusahaken ndatkenca, sebap Kristus Jesus nggo milih aku guna ngalokenca.
13 O turang senina, situhuna labo kuakap nggo kudat hadiah e, tapi si kulakoken eme ngelupaken kai si arah pudiku janah kupala-palai ngayaki kai si arah lebe,
14 alu bage banci terus kuayaki tujun e guna ndatken hadiah i bas Dibata nari, eme idilo guna nggeluh i surga erkelangken Kristus Jesus.
15 Emaka kita si paguh kinitekenna bage min perukuren ras perbahanenta. Janah adi la bage perukuren kena, Dibata me si mpebetehkenca man kena kerna perbahanen si benar.
16 Si pentingna, teruslah sipepaguh kinitekenta bagi si nggo silakoken sedekah enda.
17 O turang senina, teruslah usih kena aku janah perdiatekenlah kalak si nggeluh menurut usihen si nggo ibereken kami.
18 Enterem kalak si la ngergai kematen Kristus i bas tiang siksan.* Enggo rusur kucakapken kerna kalak e janah gundari pe kucakapken ka janahku ngandung.
19 Ijadiken kalak e beltekna dibatana, megah iakapna nandangi kai si arusna erban ia mela, janah kerna doni saja ngenca si man ukurenna. Kalak si bagenda ikernepken me.
20 Kita warga negara surga kap, janah sangana sitimai kel juru selamat si lit i bas surga, eme Tuan Jesus Kristus.
21 Alu kuasana si mbelin, iubahna dagingta si lemah jadi mulia bali bagi ia, janah ibanna kerinana patuh man bana.
Cataten i teruh
^ As. “si motong daging.”
^ Ntah banci saja “nggo kutadingken alu meriah ukur.”
^ As. “banci kudatken Kristus,” eme ngaloken pasu-pasu selaku pengikut Kristus.
^ Nen Kamus.
