Roma 10:1-21
10 O turang senina, sura-sura pusuhku ras pemindonku man Dibata gelah iselamatken min kalak e.
2 Pang aku ngatakenca kalak e tuhu-tuhu semangat nembah Dibata, tapi semangatna e labo menurut pemeteh si benar.
3 La iteh kalak e kai si erbanca sekalak jelma benar i lebe-lebe Dibata. Iusahaken kalak e mbuktiken dirina benar, tapi la ilakoken kalak e kai si erbanca sekalak jelma benar i lebe-lebe Dibata.
4 Enggo iban Kristus Undang-Undang Musa lanai erkuasa. Emaka kerina kalak si erkiniteken banci ikataken benar.
5 Pernah itulis Musa kerna kalak si ikataken benar menurut Undang-Undang Musa, “Kalak si ndalanken undang-undang e, nggeluh me erkiteken undang-undang e.”
6 Tapi nina Kitap si Badia kerna kalak si ikataken benar perban erkiniteken, “Ula ikataken kena i bas pusuh kena, ‘Ise pagi si nangkih ku surga?’ maksudna guna maba Kristus nusur,
7 ntah, ‘Ise pagi si nusur ku bas lubang si seh kel bagesna?’ maksudna guna maba Kristus ndarat i bas si mate nari.”
8 Kai nari nina Kitap si Badia? “Kata e rembak ras kena, eme i bas babah ras i bas pusuh kena.” Maksudna, “kata” kiniteken, si sangana siberitaken.
9 Adi ikataken babah kena i lebe-lebe jelma si nterem maka Jesus e Tuan, janah erkiniteken kena i bas pusuh kena nari maka Jesus nggo ipekeke Dibata i bas si mate nari, iselamatken me kena.
10 Kiniteken i bas pusuh kena me si erban kena ikataken benar, tapi kai si ikataken babah kena me si erban kena iselamatken.
11 Sebap lit ayat ngataken, “Ise pe si erkiniteken man bana, labo pernah ikecewaken.”
12 Labo lit bedana kalak Jahudi ras kalak Junani. Seri nge kerina Tuhanna, eme si nggit kel mere man kerina kalak si erlebuh man baNa.
13 Sebap, “Ise pe si erlebuh man gelar Jahwe, iselamatken me.”
14 Tapi uga kalak banci erlebuh man baNa adi lenga ia erkiniteken man baNa? Uga kalak banci erkiniteken man baNa adi lenga pernah ibegina kerna Ia? Uga banci ibegina adi la lit si mberitakenca?
15 Janah banci kin lit si mberitakenca adi la lit si nuruhsa? Lit kap tertulis, “Seh kel jilena nahe kalak si maba berita si meriah!”
16 Aminna pe bage, labo kerina kalak ngaloken berita si meriah. Sebap pernah itulis Jesaya, “O Jahwe, ise kin si erkiniteken man berita si ipeseh kami?”
17 Situhuna, kenca megi berita e nge maka kalak banci erkiniteken, janah berita e ibegina sanga lit kalak si mberitakenca kerna Kristus.
18 Tapi nungkun aku, “Lenga kin ibegi kalak e?” La mungkin, sebap lit tertulis, “Kerina kalak i belang-belang doni bage pe i ujung-ujung doni nggo megi berita e.”
19 Tapi nungkun aku, “Lenga kin iteh Israel?” Pasti itehna. Tangtangna, ipeseh Musa kata-kata Dibata, nina, “Kuban me kena cemburu nandangi bangsa si deban. Kuban me kena merawa arah sada bangsa si motu.”
20 Alu pang ipeseh Jesaya kata-kata Dibata, nina, “Kalak si la ndarami Aku, idatna me Aku. Kalak si la nungkuni kerna Aku, itandaina me Aku.”
21 Tapi kerna Israel, ipeseh Jesaya kata-kata Dibata, nina, “Gedang-gedang wari Kududurken tanKu man bangsa si la patuh ras si keras kepala.”
