Roma 12:1-21
12 O turang senina, erkiteken perkuah ate Dibata, mindo aku man kena gelah ipersembahken kena daging kena jadi persembahen si nggeluh, badia, janah ngena ate Dibata. Emaka berekenlah pelayanen si badia alu nggunaken kengasupen rukur kena.
2 Ula nai kena ipengaruhi* doni* enda. Tapi robahlah alu ngobah perukuren kena. Alu bage, banci ibuktiken kena maka peraten Dibata e mehuli, sempurna, janah erban Dibata senang.
3 Erkiteken lias ate Dibata si mbelin si nggo iberekenNa man bangku, kukataken man kena kerina gelah ula iakap kena ganjangen diri kena asangken si patutna, tapi banlah perukuren kerna diri kena uga litna sue ras kiniteken si ibereken Dibata man kena sekalak-sekalak.
4 Bali bagi sada daging si melala anggotana, janah kerina anggota daging e la seri gunana,
5 bage ka me kita. Amin nterem gia kita, kerina kita sada daging erkiteken ersada ras Kristus. Janah kerina kita sekalak-sekalak eme anggota si merluken sada ras si debanna.
6 Erkiteken lias ate Dibata si mbelin, sialoken erbage-bage pemere. Emaka adi sialoken pemere ernubuat, ernubuatlah sue ras kiniteken si nggo sialoken.
7 Adi sialoken pemere ngelayani, teruslah kita ngelayani. Adi sialoken pemere guna ngajar, teruslah kita ngajar.
8 Adi pemere si ialokenna guna mpegegehi, teruslah ia mpegegehi. Adi pemere si ialokenna guna mere, teruslah ia mere alu melumbar. Adi pemere si ialokenna guna minpin, teruslah ia minpin alu tutus. Adi pemere si ialokenna guna ncidahken perkuah ate, teruslah ilakokenna si e alu ukur meriah.
9 Ula min munapik kekelengen kena. Cigalah ate kena kai si jahat, janah persadalah diri kena ras kai si mehuli.
10 Sikeleng-kelengenlah kena bagi ngkelengi keluarga sendiri. Silebe-lebenlah kena i bas nghamati kalak si deban.
11 Mejingkatlah kena janah ula kisat. Semangatlah alu kesah si badia. Erdahinlah selaku budak man Jahwe.
12 Ermeriah ukurlah i bas arapen. Megenggenglah i bas kiniseran. Ertotolah man Dibata la erngadi-ngadi.
13 Berekenlah penampat man kalak si badia sue ras keperlunna. Alo-alolah kalak alu meriah ukur.
14 Pindolah pasu-pasu man Dibata guna kalak si niksa kena. Teruslah pindo pasu-pasu janah ula sumpahi.
15 Ermeriah ukurlah ras kalak si ermeriah ukur. Tangislah ras kalak si tangis.
16 Ukurilah kalak si deban bagi kena ngukuri diri kena. Ula meganjang rukur tapi meteruk ukurlah. Janah ula iakap kena diri kena pentar.
17 Ula balas kejahaten alu kejahaten man ise pe. Banlah si mehuli menurut pengakap kerina kalak.
18 Usahakenlah asa ngasup kena gelah dame ras kerina kalak.
19 O turang senina si kukelengi, ula kena balas dendam. Pediat saja Dibata si ncidahken rawaNa, sebap lit tertulis, “Nina Jahwe, ‘HakKu kap pembalasen. Kubalas pagi perbahanenna si jahat.’”
20 Tapi “adi melihe musuh kena, berelah ia man; adi muas ia, berelah ia minem; alu bage nusur me ukurna iban kena.”*
21 Ula pediat diri kena italuken kai si jahat. Tapi teruslah taluken kai si jahat alu ngelakoken kai si mehuli.
Cataten i teruh
^ Ntah “ibentuk.”
^ Nen Kamus.
^ As. “alu bage itamaken kena rara api ku das takalna.”
