Roma 13:1-14
13 Kerina kalak arus patuh man pemerentah si erkuasa sebap kuasa kai pe si lit rehna i bas Dibata nari. Pemerentah si lit gundari e pe ndatken keduduken si erbage-bage arah Dibata nari.
2 Emaka, ise pe si ngelawan pemerentah, ngelawan peraturen Dibata kap, janah kalak si ngelawan peraturen e, iukum me.
3 Kalak si jahat perbahanenna, mbiar ia man pemerentah. Tapi kalak si mehuli perbahanenna, labo ia mbiar. Emaka adi la ate kena mbiar man pemerentah, teruslah lakoken si mehuli, janah ialoken kena me pujin i bas pemerentah nari.
4 Pemerentah e pelayan Dibata kap guna kepentingen kena. Tapi adi ilakoken kena si jahat, mbiar me kena sebap lit nge tujun pemerentah maba pedang. Pemerentah kap pelayan Dibata, si mereken ukumen man kalak si terus ngelakoken perbahanen si jahat.
5 Emaka lit alasen si erban kena arus patuh. Labo saja perban ukumen e, tapi perban pusuh peraten kena.
6 Eme sebapna kena nggalar pajak erkiteken pemerentah e pelayan Dibata kap, si rusur ngelayani masyarakat.
7 Berekenlah kai si jadi hak kalak enda: Galarilah pajak man si mindo pajak, galarilah cuke man si mindo cuke. Ergailah kalak si mindo iergai, hamatilah kalak si mindo ihamati.
8 Ula kena rutang kai pe man ise pe, tapi sikeleng-kelengenlah kena, sebap kalak si ngkelengi kalak si deban nge si nggo ndalanken undang-undang.
9 Undang-Undang bagi, “Ula erlua-lua, ula munuh, ula nangko, ula kena merhat jang kalak,” ras kerina perentah si lit ipersada i bas kata-kata enda: “Arus ikelengindu kalak si deban bagi kam ngkelengi dirindu.”
10 Kalak si erkeleng ate labo ngelakoken kai si jahat man kalak si deban. Alu bage nggo idalankenna undang-undang.
11 Lakokenlah si e kerina sebap iteh kena nge i bas waktu si uga kita nggeluh. Gundari me waktuna kita medak sebap keselamaten nggo deher, deheren asangken tangtangna kita jadi kalak si tek.
12 Gundari nggo tengah berngi, janah kentisik nari terang me wari. Emaka sitadingkenlah perbahanen si gelap janah sipakelah senjata si igunaken paksa terang wari.
13 Sijagalah lagu langkahta bali bagi lagu langkah kalak sanga terang wari. La erpesta pora, la mabuk, la ngelakoken perbahanen seks si salah* ntah pe la ngelakoken perbahanen si la meteh mela,* janah la rubati ntah pe cian.
14 Tapi usihlah Tuan Jesus Kristus, janah ula ban rencana guna sura-sura daging si erdosa.
