Roma 14:1-23
14 Alo-alolah kalak si lemah kinitekenna, janah ula hakimi ia adi la seri pendapat kena.*
2 Lit kalak si kinitekenna erban ia banci man kai pe, tapi lit kalak si lemah kinitekenna si banci man gulen* saja.
3 Kalak si banci man kai pe, ula megombang nandangi kalak si la banci man kerina pangan, janah kalak si la banci man kerina pangan, ula ihakimina kalak si banci man kai pe, sebap kalak e nggo ialoken Dibata.
4 Ise kin kena maka ihakimi kena pelayan kalak si deban? Tuanna nge si nentukenca ia benar ntah pe salah. Situhuna, alu penampat Jahwe, ia ikataken benar.
5 Lit si erpengakap maka wari-wari tertentu pentingen asangken wari-wari si deban, tapi lit ka kalak si erpengakap maka kerina wari seri saja. Tiap kalak tuhu-tuhu tek min nandangi kai si iputuskenna.
6 Kalak si erpengakap maka penting wari-wari tertentu, ilakokenna si e guna Jahwe. Kalak si man pe, ilakokenna si e guna Jahwe, sebap ngata bujur ia man Dibata. Janah kalak si man gulen* saja pe, ilakokenna si e guna Jahwe, janah ngata bujur ka nge ia man Dibata.
7 Situhuna, sekalak pe i bas kita nari labo nggeluh guna dirina saja janah sekalak pe i bas kita nari labo mate guna dirina saja.
8 Sebap adi kita nggeluh, kita nggeluh guna Jahwe, janah adi kita mate, kita mate guna Jahwe. Emaka adi kita nggeluh ntah pe mate, kita jang Jahwe kap.
9 Guna si e me Kristus mate janah nggeluh mulihi, gelah ia jadi Tuan nandangi kalak mate ras kalak si nggeluh.
10 Adi bage, ngkai maka ihakimi kena turang senina kena? Engkai maka kena megombang nandangi turang senina kena? Sebap tedis nge pagi kita kerina i lebe-lebe kursi penghakimen Dibata.
11 Lit tertulis, “Nina Jahwe, ‘Banci kena tek man bangKu erkiteken Aku kap Dibata si nggeluh. Kerina kalak erjimpuh pagi i lebe-lebeKu janah kerina dilah ngakui alu terus terang maka Aku kap Dibata.’”
12 Emaka tiap kalak pagi mereken pertanggungjawapen man Dibata.
13 Emaka, ula nai sihakimi sada ras si debanna. Tapi usahakenlah gelah ula itama kena i lebe-lebe turang senina batu si erban ia tertuktuk ntah pe si ngambati ia.
14 Selaku pengikut Tuan Jesus, kuteh janah tek aku maka labo lit si najis. Adi lit si najis menurut sekalak jelma, e erkiteken najis iakapna.
15 Adi erkiteken pangan kena maka lanai entabeh perasan turang senina kena, lanai kap icidahken kena kekelengen. Emaka ula beneken kiniteken turang senina kena erkiteken pangan kena, sebap Kristus nggo mate guna ia.
16 Emaka ula pediat perbahanen kena si mehuli e erban kalak ngataken si la mehuli kerna kena.
17 Sebap labo pangan ras inemen si nentukenca sekalak jelma banci masuk ku bas Kerajan Dibata. Tapi arus ilakokenna kai si benar, erdame ras kalak si deban, ras ermeriah ukur erkiteken kesah si badia.
18 Ise pe si jadi budak man Kristus alu cara si bage, isenangkenna Dibata bage pe manusia.
19 Emaka lakokenlah kai pe si erban kita nggeluh alu dame ras si deban janah mpegegehi sada ras si debanna.
20 Ula erkiteken pangan icedaken kena dahin Dibata. Payo, labo lit pangan si najis, tapi la mehuli adi ipan sekalak jelma pangan e janah erban kalak si deban tertuktuk.
21 Padin la padah man daging ntah pe minem anggur ntah pe ngelakoken kai pe si erban turang senina kena tertuktuk.
22 Pediatlah kiniteken kena e tetap jadi urusen kena saja ras Dibata. Ermeriah ukur me kalak si la ihakimina dirina erkiteken kai si ilakokenna.
23 Tapi adi ragu ia janah tetap ipanna, ia nggo ersalah erkiteken perbahanenna e la menurut kiniteken. Situhuna, kai pe si ilakoken adi la alu kiniteken, dosa kap.
Cataten i teruh
^ Ntah banci saja “adi tersungkun-sungkun denga ia i bas pusuhna.”
^ Ntah “sayur.”
^ Ntah “sayur.”
