Roma 16:1-27
16 Kupetandaken ateku Pebe, eme turang seninata si ngelayani i bas runggun Kenkerea.
2 Alo-alo kena min ia selaku pengikut Tuan bali bagi ngalo-ngalo kalak si badia, janah ibereken kena min man bana kai pe si iperlukenna, erkiteken nggo nterem turang senina si isampatina, termasuk aku.
3 Peseh salamku man Persila* ras Akuila, teman-temanku i bas ngelayani Kristus Jesus,
4 si nggit mereken kesahna guna aku. Selain aku, kerina runggun i bas bangsa-bangsa pe ngataken bujur man kalak e.
5 Kirim salam man runggun si pulung i rumah kalak e. Kirim salam man Epenetus si kukelengi, kalak si termasuk tangtangna jadi murid-murid Kristus i Asia.
6 Kirim salam man Maria, si nggo kerja keras guna kena.
7 Kirim salam man keluargaku eme Andronikus ras Junias. Kalak enda pernah ipenjaraken radu ras aku. Itandai rasul-rasul kalak e selaku kalak si mehuli, janah nggo dekahen ia jadi pengikut Kristus asangken aku.
8 Peseh salamku man Ampliatus si kukelengi i bas Tuan.
9 Salam man Urbanus temanta sada dahin i bas Kristus bage pe man Stahis si kukelengi.
10 Salam man Apeles si nggo terbukti setia man Kristus. Salam man kerina kalak si lit i rumah Aristobulus.
11 Salam man Herodian, keluargaku. Salam man kerina kalak si lit i rumah Narkisus, si nggo jadi pengikut Tuan.
12 Salam man Tripena ras Triposa, turang seninata si nggo kerja keras guna Tuan. Salam man Persis turang senina si kita kelengi, si nggo kerja keras guna Tuan.
13 Salam man Rupus kalak si ipilih guna ngelayani Tuan, janah man nandena, si nggo kuakap bagi nandeku.
14 Salam man Asinkritus, Pelegon, Hermes, Petrobas, Hermas, bage pe kerina senina si lit ras kalak e.
15 Salam man Pilologus, Julia, Nerus ras turangna, Olimpas, bage pe kerina kalak si badia si lit ras kalak e.
16 Sikaplah alo-alo kena sada ras si debanna.* Kerina runggun Kristus kirim salam man kena.
17 O turang senina, kupindoken man kena hati-hatilah nandangi kalak si erban perpecahen ras kalak si erban tertuktuk. Sebap si e erlawanen ras kai si nggo ipelajari kena. Ula deheri kalak e.
18 Kalak si bage labo budak Tuanta Kristus, tapi budak sura-sura daging si salah. Alu ranan mehuli ras muji-muji, itipuna kalak si polos.
19 Enggo iperdiateken kerina kalak kepatuhen kena janah si e erban meriah ukurku. Amin bage gia, ateku min gelah pentar kena i bas kai si mehuli janah bersih i bas perbahanen si jahat nari.
20 Kentisik nari, Dibata si mere kedamen, ngkernepken Setan i teruh nahe kena. Mbera lias ate si mbelin arah Tuanta Jesus lalap ras kena.
21 Timotius temanku sada dahin ras keluargaku eme Lusius, Jason, ras Sosipatrus kirim salam man kena.
22 Aku, Tertius si nulisken kai si ikataken Paulus i bas surat enda, kirim salam man kena i bas gelar Tuan.
23 Gayus si i bas rumahna aku tading, bage pe kerina runggun kirim salam man kena. Erastus bendahara kota bage pe Kuartus seninana kirim salam man kena.
24 *——
25 Banci kena megegeh iban Dibata erkiteken berita si meriah si kuberitaken eme kerna Jesus Kristus. Berita enda lit hubungenna ras rahasia si badia si nggo ibukaken si nggo ndekah kel ibuniken.
26 Gundari, rahasia e nggo ibukaken janah nggo ipebetehken man kerina bangsa arah ayat-ayat si itulis nabi-nabi, sue ras perentah Dibata si rasa lalap, si ateNa gelah kerina bangsa erkiniteken janah patuh.
27 Imuliakenlah Dibata seh rasa lalap arah Jesus Kristus. Dibata kap ngenca si pentar. Amin.
Cataten i teruh
^ Ntah “Priska.”
^ As. “Alo-alolah sada ras si debanna alu ciumen si badia.”
^ Ayat enda la lit i bas piga-piga tulisen si nai janah kemungkinen labo bagin arah Pustaka si Badia.
