Roma 2:1-29
2 O turang senina, la soal ise pe kena, la lit alasen kena guna nghakimi. Adi ihakimi kena kalak si deban, iukum kena diri kena sendiri, sebap kena pe seri nge perbahanen kena.
2 Siteh maka ihakimi Dibata kalak si terus bage perbahanenna, janah penghakimen Dibata sue ras kai si benar.
3 Ihakimi kena kalak si terus bage perbahanenna, tapi kena sendiri pe bage nge perbahanen kena. Akap kena kin kena banci bebas i bas penghakimen Dibata nari?
4 La kin iergai kena lias ate, kiniulin, ras kesabaren Dibata si seh kel belinna? La kin iteh kena maka icidahken Dibata lias ateNa guna nampati kena ertobat?*
5 Erkiteken kena keras kepala janah la nggit ertobat,* ipepulung kena rawa Dibata man diri kena, janah si e jelas kari teridah i bas wari penghakimen Dibata si benar.
6 Ibalas Dibata pagi tiap kalak sue ras perbahanenna:
7 Man kalak si ndarami kemulian, kehamaten, ras setia ngelakoken kai si mehuli, ialokenna me pagi kegeluhen si rasa lalap bage pe daging si la banci kernep.
8 Tapi man kalak si perubat-rubat, kalak si ngikutken kai si la benar, ras ngikutken kai si salah, ialokenna pagi ukumen ras rawa Dibata.
9 Tiap kalak jahat ngenanami kiniseran ras kesusahen pagi, tangtangna man kalak Jahudi jenari man kalak Junani ka.
10 Tapi man tiap kalak si ngelakoken kai si mehuli, ialokenna pagi kemulian, kehamaten, ras kedamen, tangtangna man kalak Jahudi jenari man kalak Junani ka.
11 Sebap kerina manusia seri nge i lebe-lebe Dibata.
12 Kerina kalak si ngelakoken dosa alu la meteh undang-undang, mate me pagi aminna pe la tehna undang-undang e. Tapi kerina kalak si ngelakoken dosa janah meteh undang-undang, ihakimi me pagi sue ras undang-undang e.
13 Sebap labo kalak si megiken undang-undang e si benar i lebe-lebe Dibata, tapi kalak si ngelakokenca nge.
14 Adi kalak i bas bangsa si deban nari si la lit undang-undangna, ngelakoken kai si lit bas undang-undang, berarti lit sada undang-undang i bas dirina.
15 Ibuktiken kalak e maka undang-undang e lit tertulis i bas pusuhna. Pusuh peratenna jadi saksi man dirina janah perukurenna banci nalahken ntah pe mbela dirina.
16 Erkelangken Kristus Jesus, ihakimi Dibata pagi kerina si irahasiaken manusia. Enda terjadi i bas wari penghakimen, sue ras berita si meriah si kupeseh.
17 Kena igelari selaku kalak Jahudi, ernalem man undang-undang, megah iakap kena jadi umat Dibata,
18 iteh kena peraten Dibata, janah banci ibedaken kena kai si penting perban kena nggo iajari kerna Undang-Undang Musa.
19 Tek ka kena maka kena me si negu-negu kalak si pentang, si jadi terang man kalak si lit i bas gelap,
20 si ngajari kalak si motu, si jadi guru man anak-anak, janah iangkai kena pemeteh ras kebenaren si lit i bas Undang-Undang Musa.
21 Kalak si deban iajari kena, tapi ngkai la iajari kena diri kena? Ikataken kena man kalak, “Ula nangko,” tapi ngkai kena nangko?
22 Ikataken kena, “Ula erlua-lua,” tapi ngkai kena erlua-lua? Ciga ate kena nandangi berhala, tapi ngkai maka irampok kena ingan nembah berhala?
23 Megah iakap kena nandangi undang-undang, tapi ngkai maka ihina kena Dibata alu ngelanggar Undang-Undang Musa?
24 Sue ras ayat si tertulis, “Gelar Dibata ihina bangsa-bangsa si deban erkiteken kena.”
25 Situhuna lit nge gunana sunat adi idalanken kena undang-undang. Tapi adi ilanggar kena undang-undang, seri saja kena bagi kalak si la isunat.
26 Adi kalak si la isunat ndalanken perentah Dibata si lit bas Undang-Undang Musa, la kin ia seri ras kalak si isunat?
27 Alu ndalanken Undang-Undang Musa, ihakimi kalak si la isunat me kena, perban kena nggo isunat janah lit bas kena undang-undang si tertulis tapi ilanggar kena undang-undang e.
28 Sekalak jelma jadi kalak Jahudi situhu-tuhu labo erkiteken penampilenna ntah pe erkiteken sunat i bas dagingna.
29 Tapi, ia jadi kalak Jahudi situhu-tuhu erkiteken pusuhna. Sunat si alokenna eme sunat i bas pusuh, si itegu-tegu kesah si badia, labo erkiteken undang-undang si tertulis. Emaka kalak si bage labo ngaloken pujin i bas manusia nari tapi i bas Dibata nari nge.
