Roma 3:1-31
3 Adi bage, kai gunana jadi kalak Jahudi ntah pe isunat?
2 Melala kel gunana. Si pertama eme ibereken Dibata kata-kataNa si badia man kalak e.
3 Tapi, uga adi lit piga-piga kalak Jahudi la erkiniteken? Enda kin si erbanca maka Dibata lanai terteki?
4 Pasti lang! Aminna pe kerina kalak perbual, Dibata lalap kap benar, bagi lit tertulis, “Kam benar paksa Kam ngerana janah menang paksa Kam ihakimi.”
5 Tapi, uga adi arah kesalahenta teridah maka Dibata e benar? Janah, paksa merawa Dibata, banci kin sikataken, “Dibata e la adil”? Aku ngerana bali bagi perukuren piga-piga kalak.
6 Tentu lang! Adi la kin adil Dibata e, uga Ia nghakimi doni?
7 Bicara erbual pe aku janah bualku e ncidahken maka Dibata e benar, janah bualku e erbanca Ia imuliaken, ngkai maka aku ikataken kalak si perdosa?
8 Engkai maka la ikataken kami, “Mari silakoken si jahat gelah reh si mehuli”? Piga-piga kalak nuduh aku ngataken bage. Situhuna kalak si bage arus iukum.
9 Adi bage, ulin nge kita asangken kalak si deban? Sitik pe lang! Bagi si nggo ikataken, kalak Jahudi ras kalak Junani, kerina nge ikuasai dosa.
10 Bagi si tertulis, “La lit kalak si benar, sada pe la lit,
11 ise pe la lit si pentar, ise pe la lit si ndarami Dibata.
12 Kerina kalak nggo nilah,* kerina kalak e lanai erguna. La lit si mehuli, sada pe lang.”
13 “Babah kalak e bali bagi kuburen si terbuka, itipuna kalak alu dilahna.” “Bisa nipe lit i bas biber kalak e.”
14 “Babahna dem alu sumpah ras ranan si meser.”
15 “Meter nahena kiam guna munuh.”
16 “Kehancuren ras kiniseran lit bas dalan-dalan kalak e,
17 janah la itandai kalak e dalan kedamen.”
18 “La kalak e mbiar man Dibata.”
19 Siteh maka kerina si ikataken Undang-Undang Musa iban guna kalak si nggeluh sue ras Undang-Undang Musa, alu bage la ise pe banci erdalih janah kerina kalak si lit i doni iukum Dibata me pagi.
20 Emaka i lebe-lebe Dibata, labo lit ise pe si ikataken benar aminna pe ndalanken undang-undang. Sebap, undang-undang e nge si erbanca maka siteh kai kin dosa e.
21 Gundari, nggo jelas teridah maka sekalak jelma banci ikataken Dibata ia benar aminna pe la idalankenna undang-undang, bali bagi si ikataken i bas Undang-Undang Musa bage pe Ajaren Nabi-Nabi.
22 Kerina kalak banci ikataken Dibata benar perban kalak e erkiniteken man Jesus Kristus. Sebap la ibeda-bedaken Dibata manusia.
23 Kerina kalak nggo erdosa janah la banci ncidahken kemulian Dibata.
24 Tapi kalak e ibebasken alu tebusen si igalari Kristus Jesus, alu bage kalak e ikataken benar. Enda kap pemere i bas Dibata nari erkiteken lias ateNa si mbelin.
25 Dibata nggo ngkorbanken Kristus gelah kalak si erkiniteken man dareh Kristus banci erdame ras Dibata. Enda guna ncidahken maka Dibata e benar, sebap alu sabar nggo iampuni Dibata dosa-dosa si lit i bas jaman si nai.
26 Enda ncidahken maka seh asa gundari pe Dibata tetap benar. Janah paksa kalak e erkiniteken man Jesus, kalak e jadi kalak si benar i lebe-lebe Dibata.
27 Adi bage banci kin megah siakap? Sitik pe lang. Engkai? Perbahanen kin si iutamaken undang-undang? Lang, kiniteken nge si iutamaken undang-undang.
28 Tek kita maka sekalak jelma ikataken benar perban kinitekenna, labo perban idalankenna undang-undang.
29 Dibata kalak Jahudi saja kin Ia? La kin Ia pe Dibata bangsa si deban ka nge? Payo, Ia pe Dibata bangsa si deban nge.
30 Sada ngenca Dibata. Jadi, adi kalak si la isunat ras kalak si isunat erkiniteken, ikataken Dibata me ia benar.
31 Adi erkiniteken kita, sisasapken kin undang-undang e? Lang. Tapi, sidukung nge undang-undang e.
Cataten i teruh
^ Ntah “menyimpang.”
