Roma 4:1-25
4 Adi bage, kai si banci sikataken kerna kai si nggo ialoken nini bulangta Abraham?
2 Adi Abraham ikataken benar erkiteken perbahanenna, lit alasenna guna ermegah, tapi i lebe-lebe Dibata la banci ia ermegah.
3 Lit ayat si ngataken, “Abraham erkiniteken man Jahwe, emaka perban kinitekenna e, ia ikataken kalak si benar.”
4 Adi kalak si erdahin ngaloken upah, upahna e labo pemere,* tapi nggo kin hakna.
5 Menurut Dibata, kalak si la erdahin tapi erkiniteken man Dibata, kalak si benar kap ia aminna pe erdosa.
6 Bali bagi si nggo ikataken Daud kerna keriahen ukur sekalak jelma si ikataken Dibata benar labo erkiteken perbahanenna:
7 “Ermeriah ukur me kalak si kesalahenna ialemi janah dosa-dosana iampuni.
8 Ermeriah ukur me kalak si dosana la iinget Jahwe.”
9 Kalak si isunat kin ngenca si ermeriah ukur? Uga kerna kalak si la isunat? Sebap nggo sikataken maka, “Perban erkiniteken, Abraham ikataken kalak si benar.”
10 Ndigan kin Abraham ikataken benar? Kenca ia isunat ntah sope ia isunat? Situhuna, ia ikataken benar sope ia isunat.
11 Ialokenna sada tanda eme sunat, e si jadi jaminen* maka ia ikataken kalak si benar perban nggo erkiniteken ia sope isunat. Emaka ia jadi bapak kerina kalak si erkiniteken sope isunat janah kerina kalak ngataken maka ia benar.
12 Ia pe jadi bapak kerina kalak si isunat, tapi labo man kalak si isunat saja ngenca, tapi pe man kalak si tuhu-tuhu ngikutken dalan kiniteken Abraham bapakta sope ia isunat.
13 Labo erkiteken ndalanken undang-undang maka Abraham ntah pe kesusurenna* ndatken janji maka iwarisi kalak e pagi doni, tapi perban Abraham ikataken benar erkiteken kinitekenna.
14 Sebap adi kalak si ndalanken undang-undang nge si ndatken warisen, kiniteken e jadi sia-sia janah janji e lanai lit ertina.
15 Situhuna, Undang-Undang Musa ngerehken rawa Dibata, tapi adi la lit undang-undang, la lit pelanggaren.
16 Ialoken Abraham janji Dibata perban kinitekenna, janah icidahken Dibata lias ateNa si mbelin arah janji e. Emaka kerina kesusuren* Abraham ngaloken janji e. Kesusurenna* e eme kalak si patuh man Undang-Undang Musa bage pe kalak si lit kinitekenna bagi Abraham, bapakta kerina.
17 Enda sue ras ayat si ngataken, “Enggo kupilih kam jadi bapak melala bangsa.” Janji Dibata enda pasti terjadi. Erkiniteken Abraham man Dibata sebap Dibata kap si erban kalak mate nggeluh mulihi, janah Ia kap si ngataken kerna kai si lenga terjadi tempa-tempa nggo terjadi.*
18 Aminna pe arapen e tempa la mungkin, arapen e tetap erban ia erkiniteken maka ia jadi bapak nterem bangsa. Tek ia nandangi kai si nggo ikataken, “Bage me pagi buena kesusurenndu.”*
19 Paksa si e umur Abraham kira-kira 100 tahun janah Sara pe nggo metua ras lanai banci melahirken. Emaka menurut Abraham, lanai mungkin lit anakna. Aminna pe bage, kinitekenna la lemah.
20 La ia ragu man janji Dibata perban erkiniteken ia. Kinitekenna reh paguhna emaka imuliakenna Dibata,
21 janah tek kel ia maka ngasup Dibata nepati janjiNa.
22 Eme sebapna, “ia ikataken kalak si benar.”
23 Situhuna, kata-kata “ia ikataken kalak si benar” labo itulis guna ia saja,
24 tapi guna kita ka pe. Kita pe ikataken benar erkiteken tek kita man Dibata si mpekeke Jesus, Tuanta, i bas si mate nari.
25 Ipediat Dibata me Jesus ibunuh gelah dosata banci imasapken, janah ipekeke Dibata ia gelah banci kita ikataken benar.
Cataten i teruh
^ Ntah “perbahanen lias ate.”
^ Ntah “meterai.”
^ As. “benihna.”
^ As. “benih.”
^ As. “Benihna.”
^ Ntah banci saja “si njadiken si la lit jadi lit.”
^ As. “benihndu.”
