Roma 5:1-21
5 Gundari, kita nggo ikataken benar perban kinitekenta, marilah sigejapken keriahen ukur perban perdamenta* ras Dibata erkelangken Tuanta Jesus Kristus.
2 Alu erkiniteken man bana, terbuka dalan man banta guna ngaloken lias ate si mbelin si gundari nggo sigejapken. Emaka marilah kita ermeriah ukur erkiteken lit arapenta guna imuliaken Dibata.
3 Labo terjeng e saja, marilah kita ermeriah ukur paksa sinanami kiniseran erkiteken siteh maka kiniseran e erban kita megenggeng.
4 Adi megenggeng kita, ngena ate Dibata nandangi kita janah adi ngena ateNa kita, lit arapenta.
5 Arapenta labo erban kita kecewa, erkiteken nggo icurcurken Dibata kekelengenNa ku bas pusuhta alu kesah si badia si nggo iberekenNa man banta.
6 Janah sanga kita erdosa* denga pe, Kristus nggo mate guna kalak si erdosa i bas waktu si nggo itetapken Dibata.
7 Jarang kalak nggit mate guna kalak si benar, tapi banci saja lit kalak si nggit mate guna kalak si bujur.
8 Tapi, Kristus mate guna kita sanga kita erdosa denga. Bage me cara Dibata mbuktiken kekelengenNa man banta.
9 Emaka perban kita nggo ikataken benar alu dareh Kristus, iselamatken me kita arah rawa Dibata nari erkelangken ia.
10 Sanga kita jadi musuh Dibata denga, kita nggo idameken mulihi ras Dibata erkiteken kematen AnakNa. Emaka gundari, kenca kita idameken ras Dibata, tek kita maka pasti kita iselamatken erkiteken kegeluhen AnakNa.
11 Labo terjeng e saja, meriah ukurta perban banci kita rembak ras Dibata erkelangken Tuanta Jesus Kristus. Erkelangken ia, gundari kita idameken ras Dibata.
12 Bali bagi dosa masuk ku doni arah sekalak manusia, janah dosa e maba kematen. Akibatna, kematen nggo ngelangketi kerina manusia sebap kerina manusia nggo erdosa.
13 Ope lenga lit Undang-Undang Musa, dosa nggo lit i doni enda. Tapi labo lit sekalak pe ituduh erban dosa adi la lit undang-undang.
14 Aminna pe bage, kematen nggo erkuasa jadi raja mulai kin Adam nari seh ku Musa, janah kematen e pe erkuasa nandangi kalak si la ngelakoken dosa si bali bagi pelanggaren Adam. Melala si seri i bas Adam ras ia si nandangi reh e.
15 Pemere Dibata la seri ras dosa e. Adi dosa sekalak jelma banci erban nterem jelma mate, tek kita maka lias ate Dibata si mbelin ras pemereNa si iberekenNa alu lias ate si mbelin erkelangken sekalak jelma, eme Jesus Kristus, erguna man nterem jelma!
16 Manpaat pemere e pe la seri ras akibat dosa sekalak jelma. Sekalak jelma si erdosa erban kerina kalak ikataken ersalah. Tapi pemere e, si ibereken erkiteken melala dosa, erban nterem kalak ikataken benar.
17 Adi arah dosa sekalak jelma erban kematen erkuasa jadi raja, tek kita maka arah sekalak jelma ka, eme Jesus Kristus, banci erban manusia nggeluh janah merentah jadi raja. Ialoken kalak e lias ate Dibata si mbelin bage pe pemereNa si seh kel buena si erban kalak e ikataken benar.
18 Emaka bali bagi dosa sekalak jelma si erban erbage jelma ikataken ersalah, sada perbahanen si benar pe erban erbage jelma ikataken benar gelah ngaloken kegeluhen.
19 Bali bagi sekalak jelma si la patuh si erban nterem kalak jadi erdosa, bage ka pe sekalak jelma si patuh erban nterem kalak ikataken benar.
20 Undang-Undang Musa ibereken guna mbuktiken melala dosa. Tapi erkiteken reh buena dosa, lias ate Dibata si mbelin pe reh buena.
21 Kai tujunna? Bali bagi dosa ras kematen erkuasa jadi raja, lias ate Dibata si mbelin pe erkuasa jadi raja, gelah manusia banci ikataken benar janah ngaloken kegeluhen si rasa lalap erkelangken Jesus Kristus Tuanta.
