Roma 6:1-23
6 Uga dage ninta? Terus nge siban dosa gelah reh buena lias ate Dibata si mbelin?
2 Tentu lang! Kita nggo mate i bas dosa, banci kin kita terus nggeluh i bas dosa?
3 La kin iteh kena maka kerina kita si iperidiken i bas Kristus Jesus, iperidiken ka ku bas kematenna?
4 Alu iperidiken i bas kematenna, kita nggo ikuburken radu ras ia. Alu bage, bali bagi Kristus si nggo ipekeke i bas si mate nari alu kuasa Bapak, kita pe arus erdalan i bas kegeluhen si mbaru.
5 Adi kita nggo mate bali bagi ia, kita pe pasti ipekeke bali bagi ia, janah alu cara-cara si bage me kita ersada ras ia.
6 Siteh maka sipat-sipatta si ndekah nggo ipakuken i bas tiang radu ras ia. Alu bage dagingta si erdosa lanai erkuasa nandangi kita, janah kita pe lanai jadi budak dosa.
7 Adi sekalak jelma nggo mate, ia nggo ibebasken* i bas dosana nari.
8 Selain si e, adi kita mate ras Kristus, tek kita maka kita pe nggeluh ka radu ras ia.
9 Siteh maka kenca Kristus ipekeke i bas si mate nari, ia lanai mate janah kematen lanai erkuasa nandangi ia.
10 Sekali ngenca ia mate guna nasapken dosa janah ndigan pe lanai ia mate. Tapi ia nggeluh guna ngelakoken peraten Dibata.
11 Bage ka pe kena. Anggaplah diri kena mate i bas dosa, tapi nggeluh guna ngelakoken peraten Dibata erkelangken Kristus Jesus.
12 Emaka ula pediat dosa erkuasa jadi raja i bas daging kena si banci mate, gelah la ikutken kena sura-sura daging kena.
13 Ula bereken daging kena ku dosa guna ngelakoken kai si salah. Tapi berekenlah diri kena man Dibata selaku kalak si nggo mate janah nggeluh mulihi i bas si mate nari. Bereken ka daging kena man baNa guna ngelakoken kai si benar.
14 Dosa lanai jadi tuan si erkuasa nandangi kena. Sebap kena la i teruh kuasa Undang-Undang Musa, tapi i teruh kuasa lias ate Dibata si mbelin.
15 Kai kesimpulenna? Perban lanai kita i teruh kuasa Undang-Undang Musa tapi i teruh kuasa lias ate Dibata si mbelin, silakoken denga nge dosa? Tentu lang!
16 La kin iteh kena adi ibereken kena diri kena man sekalak jelma janah patuh kena man bana bagi sekalak budak, situhuna kena nggo jadi budakna? Adi kena budak dosa, mate me kena. Tapi adi kena budak Dibata janah ipatuhi kena Ia, kena ikataken benar.
17 Bujur kukataken man Dibata sebap aminna pe kena mbarenda budak dosa, gundari kena alu bulat ukur matuhi ajaren si nggo ibereken man kena.
18 Erkiteken kena nggo ibebasken i bas budak dosa nari, kena nggo jadi budak Dibata guna ngelakoken si benar.
19 Kena lemah erkiteken dosa, emaka ngerana aku alu kata-kata si menukah iangkai kena. Mbarenda ijadiken kena diri kena budak si najis ras budak si la mehuli, alu bage ilakoken kena si la mehuli. Gundari ijadiken kena diri kena budak kebenaren si erban kena badia.
20 Sanga kena jadi budak dosa, kena la iarusken ngelakoken kai si benar.
21 Kai dage si ihasilken kena i bas waktu si e? Kerina si enda erban kena mela, janah si e maba kematen.
22 Tapi erkiteken gundari kena nggo ibebasken arah budak dosa janah jadi budak Dibata, emaka gundari ialoken kena kegeluhen si badia si maba kena ku kegeluhen si rasa lalap.
23 Sebap upah dosa eme kematen, tapi pemere Dibata eme kap kegeluhen si rasa lalap erkelangken Kristus Jesus Tuanta.
Cataten i teruh
^ Ntah “iampuni.”
