Roma 7:1-25
7 O turang senina, ngerana aku man kena si meteh undang-undang. La kin iteh kena maka Undang-Undang Musa erkuasa nandangi sekalak jelma sanga ia nggeluh denga?
2 Contohna, menurut undang-undang, sekalak diberu si nggo erjabu, ersada ras perbulangenna sanga perbulangenna e nggeluh denga. Tapi adi mate perbulangenna e, bebas ia arah undang-undang perbulangenna nari.
3 Emaka adi erjabu ia ras dilaki si deban sanga perbulangenna nggeluh denga, ia ikataken erlua-lua. Tapi adi nggo mate perbulangenna e, ia nggo bebas arah undang-undang perbulangenna. Emaka, adi erjabu ia ras dilaki si deban, ia labo ikataken erlua-lua.
4 Bage ka pe kena o turang senina. Erkiteken pengorbanen Kristus, kena lanai i teruh kuasa Undang-Undang Musa.* Alu bage, kena nggo jadi jang Kristus, si nggo ipekeke i bas si mate nari. Emaka arus sihasilken buah si maba kemulian man Dibata.
5 Mbarenda sanga kita nggeluh ngikutken sura-sura dagingta, icidahken Undang-Undang Musa maka sura-sura si erdosa erban dagingta erdosa, janah dosa e ngasilken buah si maba kematen.
6 Tapi gundari, kita nggo ibebasken arah Undang-Undang Musa, erkiteken kita nggo mate i bas undang-undang si ngkuasai kita. Alu bage, kita jadi budak i bas pengertin si mbaru si ngikutken kesah si badia, janah lanai jadi budak i bas pengertin si ndekah si ngikutken undang-undang si tertulis.
7 Adi bage, salah* kin Undang-Undang Musa e? Tentu lang! Adi la lit Undang-Undang Musa e, labo kuteh kerna dosa. Contohna, adi la iperentahken undang-undang, “Ula kena merhat nandangi jang kalak,” emaka labo kuteh si e salah.
8 Erkiteken lit perentah e, dosa dat kesempaten erban aku jadi merhat nandangi kerina jang kalak si deban, sebap ope lenga lit undang-undang, dosa e mate kap.
9 Situhuna, mbarenda aku nggeluh ope lenga lit undang-undang. Tapi kenca lit undang-undang e, dosa jadi nggeluh mulihi tapi aku mate.
10 Undang-undang si arusna maba ku kegeluhen, kepeken maba ku kematen.
11 Erkiteken lit undang-undang e, dosa dat kesempaten muat ukurku janah munuh aku.
12 Emaka Undang-Undang Musa e badia, janah perentahna pe badia, benar, ras mehuli.
13 Adi bage, perban si mehuli nge maka aku mate? Tentu lang! Dosa me si munuh aku arah kai si mehuli. Alu bage jelas teridah uga kin dosa e. Undang-undang mbuktiken maka dosa e seh kel jahatna.
14 Siteh maka Undang-Undang Musa e jang Dibata, tapi aku manusia si la sempurna janah idayaken jadi budak dosa.
15 La kuangkai kai si kulakoken. Sebap, la kulakoken si ngena ateku, tapi kulakoken si segat ateku.
16 Tapi adi kulakoken kai si segat ateku, setuju nge aku maka Undang-Undang Musa e mehuli.
17 Emaka labo aku si ngelakoken kai si segat ateku e, tapi dosa si lit i bas aku.
18 Kuteh maka i bas aku, eme i bas dagingku, la lit si mehuli. Kulakoken ateku si mehuli, tapi la aku ngasup.
19 Kai si mehuli si ngena ateku, la kulakoken. Tapi kai si la mehuli si segat ateku, kepeken e si kulakoken.
20 Jadi, adi kulakoken kai si segat ateku, si ngelakokensa e labo aku tapi dosa si lit i bas aku.
21 Emaka enda me si kuadapi: Sanga kulakoken ateku kai si benar, kai si la mehuli lit i bas aku.
22 I bas pusuhku, ngena kel ateku undang-undang Dibata.
23 Tapi i bas dagingku, lit undang-undang dosa si njadiken aku tabanen si erperang ngelawan undang-undang Dibata si lit i bas ukurku.
24 Andiko, uga narilah pe aku enda! Ise nge si nelamatken aku arah daging si maba ku kematen enda?
25 Bujur kukataken man Dibata si nelamatken aku erkelangken Jesus Kristus Tuanta! Emaka i bas ukurku, aku enda budak undang-undang Dibata, tapi i bas dagingku, aku budak undang-undang dosa.
