Roma 8:1-39
8 Emaka, kalak si ersada ras Kristus Jesus labo iukum.
2 Sebap undang-undang kesah si badia si mereken kegeluhen si ersada ras Kristus Jesus, nggo mbebasken kena arah undang-undang dosa bage pe kematen.
3 Si la banci ilakoken Undang-Undang Musa erkiteken kelemahen manusia si la sempurna, ilakoken Dibata alu nuruh AnakNa ku doni jadi manusia guna masapken dosa. Alu bage, ibere Dibata ukumen man dosa manusia.
4 Emaka adi siikutken kesah si badia, labo ngikutken sura-sura daging, banci silakoken kai si benar menurut Undang-Undang Musa.
5 Kalak si ngikutken sura-sura daging, lalap iukurina sura-sura dagingna e, tapi kalak si ngikutken kesah si badia, lalap iukurina kai si sue ras kesah si badia e.
6 Adi lalap ngukuri sura-sura daging ertina kematen, tapi adi lalap ngukuri kai si sue ras kesah si badia, ertina kegeluhen ras kedamen.
7 Kalak si lalap ngukuri sura-sura daging, jadi musuh Dibata kap, sebap kalak enda la matuhi undang-undang Dibata, janah situhuna la ngasup kalak enda matuhisa.
8 Emaka, kalak si ngikutken sura-sura daging, la banci isenangkenna Dibata.
9 Adi tuhu-tuhu kin lit kesah si badia i bas diri kena, ikutken kena me kesah si badia e, labo sura-sura daging. Tapi adi la lit perukuren Kristus i bas diri sekalak jelma, ia labo jang Kristus.
10 Adi ersada kena ras Kristus, aminna pe kena mate perban dosa, nggeluh nge kena iban kesah si badia erkiteken kena ikataken benar.
11 Adi lit i bas kena kesah si badia si nggo mpekeke Kristus Jesus i bas si mate nari, emaka Dibata si nggo mpekeke Kristus i bas si mate nari e pasti mereken geluh si mbaru man daging kena si arus mate e, arah kesah si badiaNa si lit i bas kena.
12 O turang senina, tuhu rutang kita, tapi labo guna nggeluh ngikutken sura-sura daging.
13 Sebap adi nggeluh kena menurut sura-sura daging, pasti nge kena mate. Tapi adi ibunuh kena perbahanen-perbahanen si la mehuli alu penampat kesah si badia, nggeluh me kena.
14 Kerina kalak si itegu-tegu kesah si badia, tuhu-tuhu anak-anak Dibata kap.
15 Kesah si badia labo erban kita jadi budak ntah pe lanai erban kita mbiar, tapi arah kesah si badia e, kita iangkat jadi Anak Dibata janah tersuruh ukurta ngataken, “Abba,* Bapak!”
16 Kesah si badia ikut ersaksi ras pusuhta maka kita anak-anak Dibata.
17 Adi kita anak-anak Dibata, sialoken ka warisen i bas Dibata nari radu ras Kristus, janah adi sinanami kiniseran ras Kristus, kita pe imuliaken ka ras ia.
18 Menurutku, kiniseran si inanami kita e labo japahna pe adi ibandingken ras kemulian si nandangi ipebetehken man banta.
19 Kerina si ijadiken Dibata sangana tertima-tima alu dem pengarapen nimai waktuna anak-anak Dibata ipetangkas.
20 Sebap kerina si ijadiken Dibata e nggo lanai erguna, labo erkiteken sura-surana, tapi erkiteken sura-sura Dibata. Amin bage gia, lit arapen
21 maka kerina si ijadiken Dibata ibebasken me arah perbudaken dosa ras kematen, janah ngenanami kebebasen si mulia si bali bagi si inanami anak-anak Dibata.
22 Siteh maka seh asa gundari, kerina si ijadiken Dibata ras-ras ndehereng janah rate mesui.
23 Selain si e, kita si nggo ngaloken bagin pertama arah warisen e,* eme kesah si badia, kita pe ikut ndehereng sanga sitimai Dibata ngangkat kita jadi anakNa. Erkelangken tebusen, kita ibebasken arah dagingta.
24 Alu erpengarapen nge maka kita nggo iselamatken. Tapi arapen si teridah, labo arapen. Adi arapen e nggo teridah, iarapken denga kin e?
25 Adi arapenta nandangi kai si lenga siidah, tetap sitimai kel arapen e alu megenggeng.
26 Selain si e, kesah si badia pe nampati kita paksa kita lemah. Tapi mon-mon la siteh kai si arus sitotoken si sue ras keperlunta. Amin gia lanai terbelasken uga beratna si lit bas pusuhta, paksa si e me kesah si badia erban pemindon guna kita.
27 Dibata si mereksa pusuhta ngangkai maksud kesah si badia e, perban pemindon e iban guna kalak si badia, janah sue ras peraten Dibata.
28 Siteh maka ipastiken Dibata gelah ratur kerina perbahanenNa, alu bage erguna man kalak si ngkelengi Ia, e me kalak si ipilih Dibata sue ras peratenNa.
29 Sebap kalak si pertama iperdiatekenNa, itetapkenNa ka gelah bali ras AnakNa, alu bage AnakNa e jadi sintua i tengah-tengah nterem turang senina.
30 Selain si e, kalak si tangtangna itetapkenNa e, ilebuhNa ka. Kalak si ilebuhNa e ikatakenNa benar. Dungna, kalak si ikatakenNa benar e, imuliakenNa ka.
31 Uga dage ninta kerna si enda? Adi Dibata ras kita, ise kin si banci ngelawan kita?
32 Adi mereken AnakNa pe labo Ia sangsi, malahen ikorbankenNa guna kita, la kin Dibata ras AnakNa pe pasti mereken kerinana man banta alu lias ate?
33 Ise si banci nuduh kalak si ipilih Dibata? Dibata kap si ngatakenca maka kalak e benar.
34 Ise si banci ngataken kalak e ersalah? Ise pe la banci. Sebap Kristus Jesus nggo mate janah ipekeke i bas si mate nari, si gundari nggo kundul i sebelah kanan Dibata janah ibanna pemindon guna kita.
35 Ise si banci nirangken kita i bas keleng ate Kristus nari? Banci kin kiniseran nirangkenca, ntah kesusahen, penganiayan, kelihen, la ruis, bahaya, ntah pe pedang?
36 Lit tertulis, “Erkiteken kam nge maka gedang-gedang wari kami iancam kematen. Kami ipeseri ras biri-biri si nandangi igeleh.”
37 Tapi erkiteken penampat Kristus si ngkelengi kita, kita tuhu-tuhu menang kel ngadapi si e kerina.
38 Tek aku maka kematen ntah kegeluhen ntah malekat-malekat ntah pemerentah ntah kai si lit gundari ntah si lit pagi ntah kuasa
39 ntah kai si lit i datas ntah kai si lit i teruh, ntah kai pe si nggo iciptaken, la lit si banci nirangken kita arah keleng ate Dibata si ibuktikenNa arah Kristus Jesus Tuanta.
Cataten i teruh
^ I bas bahasa Aram, e ertina “O Bapak!”
^ As. “ngaloken buah si pertama i bas juma nari.”
