Roma 9:1-33
9 Selaku pengikut Kristus, labo aku erbual. Pusuh peratenku si itegu-tegu kesah si badia mereken kesaksin radu ras aku,
2 maka ceda kel ateku janah megogo kel kuakap la erngadi-ngadi.
3 Nggit aku isirangken arah Kristus selaku kalak si isumpahi guna turang seninaku, eme kalak si sada bangsa ras aku,
4 kalak Israel. Kalak e iangkat jadi anak-anak Dibata janah ibereken man kalak e kemulian, perjanjin-perjanjin, Undang-Undang Musa, pelayanen si badia, bage pe janji-janji.
5 Kalak enda me kesusuren nini bulangta, janah Kristus rehna i bas kesusuren kalak e nari. Terpujilah Dibata si erkuasa i bas kerinana seh rasa lalap. Amin.
6 Tapi, enda labo ertina kata Dibata e gagal. Sebap labo kerina kalak Israel tuhu-tuhu “kalak Israel.”
7 Aminna pe kerina kalak e kesusuren* Abraham tapi labo kerina tuhu-tuhu anak Abraham. Lit tertulis, “Kesusuren* si ijanjiken man bandu e rehna pagi arah Isak nari.”
8 Emaka, labo kerina anak Abraham tuhu-tuhu anak Dibata, tapi si lahir arah janji e me si ikataken kesusuren* Abraham.
9 Janji e isina, “I bas waktu si nggo itentuken, reh me pagi Aku janah lahir me pagi sekalak anak dilaki i bas Sara nari.”
10 Janji e labo ibereken paksa e saja, tapi ibereken ka sanga Ribka hamil, anakna kembar dua janah bapana eme Isak, nini bulangta.
11 Ope lenga kalak e lahir, bage pe ope lenga ilakoken kalak e si mehuli ntah si jahat, nggo ipilih Dibata kalak e erkiteken bage sura-sura Dibata, labo erkiteken perbahanen kalak e.
12 Nggo ikataken man Ribka, “Si tertuan pagi jadi budak man si terngudan.”
13 Bagi lit tertulis, “Keleng ateKu Jakup, tapi segat ateKu Esau.”
14 Adi bage uga ninta? Sikataken nge Dibata la adil? Tentu lang!
15 Nina Dibata man Musa, “Man ise ateKu Kucidahken perkuah ateKu, man bana me Kucidahken. Ise ateKu Kukelengi, ia me si Kukelengi.”
16 Emaka pilihen e labo erkiteken sura-sura ntah pe usaha manusia, tapi erkiteken perkuah ate Dibata.
17 Lit ayat ngataken kerna Paro, “Kupediat kam nggeluh gelah banci Kucidahken gegehKu janah gelarKu pe itandai i belang-belang doni.”
18 Emaka man ise ate Dibata icidahkenNa perkuah ateNa, man bana me icidahkenNa. Tapi kalak si deban ipediatNa keras kepala.
19 Gundari, tersungkun-sungkun kena man bangku, “Adi bage, ngkai maka isalahken Dibata denga manusia? Ise kin si ngasup ngelawan peraten Dibata?”
20 Tapi ise kin kena maka pang kena njawapi Dibata? Bagenda nge nina taneh liat* si nggo ibentuk man si mbentuk ia, “Engkai maka bagenda aku ibentukndu?”
21 La kin ate-ate sekalak tukang kudin nge mbentuk taneh liat* jadi sada barang si penting ntah pe jadi barang si biasa?
22 Iban kalak jahat Dibata merawa, seri bagi barang si patut ikernepkenNa. Aminna pe merawa ate Dibata janah icidahkenNa ateNa kuasaNa man kalak si bage, tapi sabar Ia.
23 Alu bage icidahkenNa kemulianNa si luar biasa nandangi barang si patut ngaloken perkuah ateNa, si nggo isikapkenNa guna imuliaken.
24 Kita me barang si patut ikernepken e, si ipilih labo saja arah bangsa Jahudi nari, tapi arah bangsa si deban pe.
25 Enda bali bagi si ikatakenNa i bas buku Hosea, “Kalak si labo umatKu, Kugelari me ia ‘umatKu,’ janah diberu si la Kukelengi, Kukataken me ‘si Kukelengi.’
26 I bas ingan si mbarenda Aku ngerana man kalak e, ‘Kena labo umatKu,’ i je me kalak e ikataken ‘anak-anak Dibata si nggeluh.’”
27 Selain si e, nina Jesaya kerna Israel, “Aminna pe bagi kersik i lawit teremna kalak Israel, piga-piga kalak si tading ngenca iselamatken.
28 Sebap ihakimi Jahwe me pagi kalak si lit i doni, janah idungiNa alu meter.”
29 Selain si e pernah ikataken Jesaya, “Adi Jahwe, kepala pasuken surga la nadingken kesusuren* man banta, kita nggo bali bagi Sodom ras Gomora.”
30 Dage uga kesimpulenta? Kalak i bas bangsa si deban nari iusahakenna gelah ianggap benar, tapi kalak ianggap benar erkiteken kiniteken.
31 Aminna pe iusahaken kalak Israel gelah ianggap benar alu ndalanken undang-undang, tapi labo banci tuhu-tuhu idalanken kalak e.
32 Engkai maka bage? Iusahaken kalak e gelah ianggap benar alu perbahanenna, labo alu kiniteken. Emaka tertuktuk kalak e ku “batu si erban tertuktuk,”
33 bagi lit tertulis, “Nenlah! Kutamaken me sada batu i Sion si erban kalak tertuktuk ras batu si erban kalak jongkang, tapi ise pe si erkiniteken man bana, labo pernah ikecewaken.”
Cataten i teruh
^ As. “benih.”
^ As. “benih.”
^ As. “benih.”
^ Ntah “taneh dah.”
^ Ntah “taneh dah.”
^ As. “benih.”
