Titus 2:1-15
2 Tapi, teruslah cakapkenndu kai si sue ras ajaren si benar.*
2 Man dilaki si tertuan, terkuasaina min perbahanenna, serius, beluh rukur, paguh i bas kiniteken, i bas kekelengen, ras megenggeng.
3 Bage ka pe, diberu si tertuan, ihamatina min Dibata arah perbahanenna, la tukang pitnah, la jadi budak anggur, janah ia jadi guru i bas si mehuli,
4 gelah banci ipersingetina diberu si terngudan guna ngkelengi dilakina bage pe anak-anakna,
5 beluh rukur, bersih lagu langkahna, beluh ngurus rumah tanggana, mehuli, janah patuh man dilakina. Alu bage kata Dibata la ihina.
6 Bage ka pe, teruslah persingeti dilaki si terngudan gelah beluh rukur,
7 janah jadi usihenlah kam i bas kai pe guna ngelakoken si mehuli. Ajarkenlah si benar* alu tutus.*
8 Pakelah kata-kata si benar* si la banci ipandangi kalak, alu bage mela iakap kalak si nentang kita, perban la lit si la mehuli si banci ikatakenna guna nentang kita.
9 Budak arus patuh man tuanna i bas kai pe, iusahakenna erban tuanna senang, la njawapi,
10 la nangko, tapi ibuktikenna maka ia banci terteki. Alu bage, i bas kai pe banci ibanna tambah jilena pengajaren Dibata Si Nelamatken kita.
11 Sebap lias ate Dibata si mbelin nggo jelas teridah, janah e nelamatken erbage-bage jelma.
12 Lias ateNa e ngajari kita nulak si la ngena ate Dibata, nulak sura-sura doni, ngajari kita beluh rukur, nggeluh alu cara si benar, janah setia man Dibata i bas doni* si gundari enda,
13 janahta nimai arapen si erban meriah ukur bage pe nimai kemulian Dibata Si Madakuasa ras kemulian Juru Selamatta Jesus Kristus jadi teridah.
14 Enggo ikorbanken Kristus dirina guna mbebasken* kita i bas kerina pelanggaren nari, janah ibersihkenna kita gelah banci jadi umatna si istimewa, si semangat ngelakoken kai si mehuli.
15 Alu kuasa si lit bas kam, teruslah cakapken kerna si enda janah teruslah bereken nasehat* bage pe persinget. Ula pediat ise pe sepele man bandu.
Cataten i teruh
^ Ntah “erguna.”
^ Ntah banci saja “Ngajarlah alu benar.”
^ Ntah “serius.”
^ Ntah “erguna.”
^ Nen Kamus.
^ As. “nebus.”
^ Ntah “bereken kata si mpegegehi.”
