Titus 3:1-15
3 Teruslah ingetken kalak e gelah patuh man pemerentah, bage pe man penguasa-penguasa, janah nggit ngelakoken si mehuli,
2 ula pemejin-mejinna ise pe, ula nggit rubati, tapi masuk akal, janah lembutlah man kerina kalak.
3 Sebap mbarenda pe kita la erpengangka, la patuh, itipu, jadi budak i bas erbage sura-sura ras kesenangen, terus ngelakoken kejahaten ras rate cian, erban ciga ate janah sisegat-segaten.
4 Tapi, Dibata Si Nelamatken kita mbuktiken lias ateNa ras kekelengenNa man manusia,
5 labo erkiteken perbahanen si mehuli si nggo silakoken, tapi erkiteken perkuah ateNa. IselamatkenNa kita alu lau* si maba kita ku kegeluhen janah ibanNa kita mbaru alu kesah si badia.
6 Seh kel buena kesah si badia icurcurken Dibata man banta arah Jesus Kristus Juru Selamatta.
7 Alu bage, erkiteken lias ateNa si mbelin, kita ikataken benar. Kenca si e, banci kita jadi ahli waris kegeluhen si rasa lalap sue ras arapenta.
8 Kata enda banci iteki. Ateku min gelah terus ilakokenndu kerina enda, gelah kalak si nggo tek man Dibata tutus ndahiken dahin si mehuli. Enda mehuli janah erguna man manusia.
9 Ula ikut sijawapen i bas si bodoh bage pe sijawapen kerna kesusuren. Ula rubati ntah pe erjengil kerna Undang-Undang Musa, sebap kerina e la erguna janah sia-sia.
10 Adi lit si ngajarken ajaren palsu, janah kenca ipersingeti dua kali, ula nari deheri ia,
11 sebap kalak si bage nggo lanai i bas dalan si benar, erdosa, janah ibuktikenna dirina ersalah.
12 Kenca kusuruh Artemas ntah Tikikus ndahi kam, usahakenndulah ndahi aku ku Nikopolis, sebap nggo kutetapken tading i jah sanga musim mbergeh.
13 Sikapken kerina keperlun Senas, si beluh bas Undang-Undang Musa, bage pe Apolos, gelah la kurang kai pe kalak e i bas perdalanenna.
14 Terus min senina-seninata erlajar gelah terus ilakokenna kai si mehuli, gelah banci kalak e nampati guna ncukupi kai si perluna kel. Alu bage kalak e terus ngasilken perbahanen si mehuli.
15 Kerina si lit ras aku kirim salam man kena. Peseh salamku man teman-teman sada kiniteken si ngkelengi kami.
Mbera lias ate Dibata si mbelin terus nemani kena kerina.
Cataten i teruh
^ As. “peridin.”
