1 Johanes 3:1-24
3 Nenlah uga kelengna ate Bapak man banta,+ emaka kita ikataken anak-anak Dibata!+ Kita memang anak-anakNa, tapi la tandai doni enda kita+ perban doni enda la nandai Dibata.+
2 O turang senina si kukelengi, gundari kita anak-anak Dibata.+ Tapi, lenga siteh uga kita pagi.+ Tapi siteh sanga cidahken Dibata pagi diriNa, bali kita bagi Ia perban tuhu-tuhu pagi siidah Ia.
3 Tiap kalak si bage pengarapenna man Ia,*+ arus pebadiana dirina sebap Ia* badia kap.
4 Ise pe si terus erban dosa, langgarna undang-undang, sebap dosa eme ngelanggar undang-undang.
5 Teh kena ka maka cidahken Jesus dirina guna nasapken dosa-dosata,+ janah la lit dosa bas dirina.
6 Tiap kalak si tetap ersada ras ia, lanai terus erban dosa.+ Kalak si terus erban dosa, la kap idahna ia ntah pe tandaina ia.
7 Anak-anak si kukelengi, ula pediat ise pe erban kena papak. Kalak si terus ngelakoken kai si benar, ia kalak si benar bali bagi Jesus pe benar.
8 Kalak si terus erban dosa, anak Iblis kap, perban mulai kin tangtangna nari enggo lakoken Iblis dosa.+ Perban si e, cidahken Anak Dibata dirina guna engkernepken pendahin Iblis.+
9 Kerina anak Dibata lanai erban dosa,+ sebap kesah Dibata* lit bas kalak e. Lanai banci terus ban kalak e dosa perban kalak e anak-anak Dibata.+
10 Enda bedana anak-anak Dibata ras anak-anak Iblis: Ise pe si la terus ngelakoken kai si benar, ia labo anak Dibata, bage ka pe kalak si la engkelengi turang seninana.+
11 Enda kap berita si enggo begi kena tangtangna nari: Arus kita sikeleng-kelengen.+
12 Ula min kita bagi Kain. Ia anak si jahat,* bunuhna adekna.+ Engkai maka bunuhna adekna? Perban perbahanenna enggo salah,+ tapi perbahanen adekna benar.+
13 O turang senina, ula kena sengget adi segat ate doni enda man kena.+
14 Siteh mbarenda maka kita enggo mate,+ tapi gundari kita nggeluh sebap keleng teta turang seninata.+ Kalak si la keleng tena turang seninana tetap ia bas kematen.+
15 Tiap kalak si segat tena turang seninana, pembunuh kap.+ Teh kena maka pembunuh la banci dat kegeluhen si rasa lalap.+
16 Siteh kerna kekelengen perban enggo bereken Jesus Kristus geluhna man banta,+ janah kita pe arus nggit mereken geluhta man turang seninata.+
17 Adi lit kalak si la kekurangen janah idahna turang seninana merluken penampat, tapi la tena mekuah, uga ia banci engkelengi Dibata?+
18 O anak-anakku, kekelengenta ula min bas biber saja ntah pe cakap saja.+ Tapi arus teridah arah perbahanen+ si rehna arah pusuh nari.+
19 Alu bage, siteh maka asalta bas kebenaren nari. Janah tek kita maka kelengi Dibata kita
20 amin pe pusuhta nalahken kita bas kai pe, perban belinen kap Dibata asangken pusuhta janah kai pe tehNa.+
21 Turang senina si kukelengi, adi la salahken pusuhta kita, banci kita bebas ngerana man Dibata.+
22 Kai pe sipindo pasti berekenNa,+ sebap sidalanken perentahNa janah silakoken kai si erban meriah ukurNa.
23 Si perentahkenNa eme: Arus kita erkiniteken man gelar AnakNa eme Jesus Kristus,+ ras arus kita sikeleng-kelengen,+ bagi si enggo iperentahken man banta.
24 Selain si e, kalak si ndalanken perentahNa tetap ersada ras Ia, janah Ia ersada ras kalak e.+ Arah kesah si badia si berekenNa man banta, siteh maka tetap Ia ersada ras kita.+
Cataten i teruh
^ Mungkin maksudna man Jesus ntah pe man Dibata.
^ Mungkin maksudna man Jesus ntah pe man Dibata.
^ As. “benihNa.”
^ Maksudna, Iblis.
