1 Korinti 1:1-31
1 Surat enda arah Paulus nari si jadi rasul+ Kristus Jesus sesuai ras peraten Dibata, bage pe arah turang seninata Sostenes.
2 Surat enda man runggun Dibata i Korinti+ si enggo ipebadia guna ersada ras Kristus Jesus,+ si ilebuh jadi kalak si badia. Surat enda pe man kerina kalak si lit i japa pe si erlebuh man gelar Tuan Jesus Kristus,+ eme Tuan kalak e bage pe Tuanta.
3 Mbera-mbera aloken kena kiniulin si luar biasa bage pe kedamen arah Dibata eme Bapakta, ras arah Tuan Jesus Kristus.
4 La erngadi-ngadi kukataken bujur man Dibata, perban berekenNa man kena kiniulinNa si luar biasa arah Kristus Jesus.
5 Perban kena enggo ersada ras Kristus emaka ipebayak Dibata kena bas kai pe, termasuk beluh mpeseh kata Dibata janah lengkap pemeteh kena,+
6 perban kesaksin kerna Kristus+ enggo iban nteguh i tengah-tengah kena.
7 Alu bage, sanga tima-timai kena kel Tuanta Jesus Kristus ncidahken kuasana,+ la kena kurang kai pe.
8 Ban Dibata ka kena tetap paguh seh ku kedungenna, gelah bas wari Tuanta Jesus Kristus,+ la lit si banci nuduh kena.
9 Dibata setia kap,+ lebuhNa kena gelah ersada ras AnakNa, Jesus Kristus Tuanta.
10 O turang senina, bas gelar Tuanta Jesus Kristus, mindo aku gelah sada min kata kena kerina, la lit perpecahen i tengah-tengah kena.+ Arus tuhu-tuhu seperukuren kena janah sependapat.+
11 O turang senina, lit piga-piga bas keluarga Klue ngataken man bangku maka lit perjengilen i tengah-tengah kena.
12 Maksudku bagenda, lit si ngataken, “Aku pengikut Paulus.” Si deban ngataken, “Adi aku pengikut Apolos.”+ Lit ka si ngataken, “Aku pengikut Kepas.”* Si debanna ka ngataken, “Aku pengikut Kristus.”
13 Terbagi-bagi kin runggun Kristus e? Paulus kin si ibunuh i tiang?* Ntah, bas gelar Paulus kin kena iperidiken?
14 Bujur kukataken man Dibata perban labo sekalak pe kena kuperidiken selain Krispus+ ras Gayus.+
15 Alu bage ise pe la banci ngataken maka kena iperidiken bas gelarku.
16 Selain si e, kuperidiken ka kalak si lit bas rumah tangga Stepanas.+ Si kuinget, kalak e ngenca si kuperidiken.
17 Aku isuruh Kristus guna mberitaken berita si meriah.+ Labo guna mperidiken kalak, labo ka guna make kata-kata kalak si lit sekolahna,* gelah kematen Kristus bas tiang siksan* la sia-sia.
18 Man kalak si nandangi ikernepken, berita kerna tiang siksan* Kristus e kebodohen kap,+ tapi man banta si iselamatken, e bukti kuasa Dibata.+
19 Sebap lit tertulis, “Kepentaren kalak si pentar Kumasapken pagi, pemeteh kalak si beluh Kutulak pagi.”+
20 I ja kin kalak si pentar? I ja kin ahli Undang-Undang Musa? I ja kin kalak si jago adu pendapat bas doni* enda? La kin enggo ban Dibata kepentaren doni enda jadi kebodohen?
21 Kepentaren doni enda+ la banci erban kalak nandai Dibata,+ tapi gunaken Dibata berita si akap kalak kebodohen+ guna nelamatken kalak si tek man berita e. I je nari teridah alu jelas kepentaren Dibata.
22 Kalak Jahudi ndarami mukjizat,+ kalak Junani ndarami kepentaren,
23 tapi kita mberitaken kerna Kristus si ibunuh i tiang.* Berita e bagi batu si erban kalak Jahudi tertuktuk, janah berita e akap bangsa-bangsa sada kebodohen.+
24 Amin pe bage, man kalak si ilebuh, eme kalak Jahudi bage pe kalak Junani, Kristus kap bukti kuasa ras kepentaren Dibata.+
25 Sebap kai si anggap manusia kebodohen Dibata, situhuna e pentaren asangken kepentaren manusia. Kai si anggap manusia kelemahen Dibata, situhuna e gegehen asangken gegeh manusia.+
26 O turang senina, sanga kena ilebuh Dibata labo piga bas kena nari si menurut manusia kalak si pentar,+ kalak si erkuasa, bage pe kalak si rehna bas keluarga terpandang nari.+
27 Tapi pilih Dibata kai si anggap doni enda kebodohen guna mpermelaken kepentaren doni enda. Pilih Dibata kai si lemah i doni enda guna mpermelaken kai si megegeh.+
28 Pilih Dibata arah doni enda kai si la penting, si la erguna, janah si isepeleken, guna engkernepken kai si erguna.+
29 Alu bage, ise pe la banci bangga i lebe-lebe Dibata.
30 Perban Dibata kap maka kena gundari ersada ras Kristus Jesus. Kristus jadi bukti kepentaren Dibata man banta, erban kita ianggap benar+ ras badia,+ janah kita ibebasken alu tebusen.+
31 Emaka, enda sesuai ras ayat si ngataken, “Adi bangga kalak, banggalah ia perban Jahwe.”*+