1 Korinti 11:1-34
11 Usihlah aku, bagi aku ngusih Kristus.+
2 Kupujiken kena sebap rusur inget kena aku janah ikutken kena kerina si enggo kuajarken.
3 Tapi ateku min gelah teh kena maka kepala tiap dilaki eme Kristus,+ kepala tiap diberu eme dilaki,+ janah kepala Kristus eme Dibata.+
4 Adi dilaki ertoto ntah ernubuat janah pakena tutup takal, permelakenna kap peminpinna.
5 Adi diberu ertoto ntah ernubuat+ tapi la pakena tutup takalna, permelakenna kap peminpinna sebap seri saja ia ras diberu si bukna icukur.
6 Adi diberu la make tutup takal, ulin potongna bukna. Tapi adi mela ia bukna ipotong ntah icukur, arus pakena tutup takal.
7 Sekalak dilaki la patut make tutup takal sebap ciptaken Dibata dilaki seri ras Ia janah ciptakenNa dilaki+ guna jadi kemulianNa, tapi diberu kap kemulian dilaki.
8 Sebap dilaki labo iciptaken arah diberu nari, tapi diberu kap si iciptaken arah dilaki nari.+
9 Bage pe labo guna diberu maka dilaki iciptaken, tapi diberu iciptaken guna dilaki.+
10 Perban si e ras perban malekat-malekat, arus pake diberu tutup takal si jadi tanda maka ia patuh man kepalana.+
11 Amin pe bage, bas runggun Tuan, dilaki perlu diberu, janah diberu perlu dilaki.
12 Sebap diberu iciptaken bas dilaki nari,+ janah dilaki lahir arah diberu nari, tapi kerinana Dibata si nciptakenca.+
13 Tiap kalak arus ukurina: Cocok kin diberu ertoto man Dibata adi la pakena tutup takalna?
14 La kin teh kena maka tangtangna nari adi sekalak dilaki gedang bukna, si e erban ia ipermelaken,
15 tapi adi diberu gedang bukna sada kemulian man bana? Bukna e ibereken man bana jadi tutup takalna.
16 Tapi adi lit si la setuju janah ikutkenna tena kebiasan si deban, siteh maka labo lit kebiasan si deban bas kita bage pe bas kerina runggun Dibata.
17 Sanga kubereken petunjuk-petunjuk enda, labo kupujiken kena, sebap adi kena pulung, buen si la mehuli si hasilken kena asangken si mehuli.
18 Tangtangna, kubegi maka sanga kena pulung bas runggun, lit perpecahen i tengah-tengah kena. Tek aku maka lit perpayona kerna si e.
19 Pasti lit nge pagi sekte-sekte i tengah-tengah kena,+ alu bage teridah alu jelas ise arah tengah-tengah kena si aloken Dibata.
20 Sanga kena pulung bas sada ingan, situhuna tujun kena labo man berngi guna mperingeti Tuan.+
21 Sanga kena man, piga-piga bas kena nari enggo leben man berngi, dungna lit piga-piga arah kena nari si melihe janah lit ka si mabuk.
22 La kin lit rumah kena ingan kena man ras minem? Ihina kena kin ate kena runggun Dibata? Permelaken kena kin ate kena kalak si mesera? Uga dage ningku man kena? Arus kin kena kupujiken? Bas si e labo kena kupujiken.
23 Kuajarken man kena kai si enggo ajarken Tuanta man bangku, eme: Bas berngi+ sanga Tuan Jesus nandangi ihianati, buat Jesus roti,
24 ertoto ia ngata bujur, jenari cepik-cepikkenna janah nina, “Enda ngertiken dagingku,+ si ibereken guna kepentingen kena. Teruslah lakoken enda jadi peringet-ingeten man bangku.”+
25 Bage ka lakokenna man calung* e+ kenca kalak e man berngi, nina, “Calung* enda ngertiken perjanjin si mbaru+ si isahken alu darehku.+ Teruslah lakoken enda, tiap inem kena e, si e jadi peringet-ingeten man bangku.”+
26 Tiap pan kena roti e janah minem kena alu calung* e, umumken kena kematen Tuan seh asa ia reh.
27 Emaka ise pe si man roti e janah minem alu calung* Tuan padahal la ia cocok ngelakoken si e, ersalah ia sebap la hamatina daging Tuan ras darehna.
28 Emaka sope roti e ipan janah minem alu calung* e, tiap kalak arus pastikenna lebe dirina cocok+ ntah lang guna ngelakoken si e.
29 Sebap ise pe si man ras minem tapi la angkana erti daging e, banna kap dirina ihukum.
30 E me sebapna enterem bas kena nari si lemah, sakit, janah medem bas kematen.*+
31 Tapi adi enggo sipastiken lebe kita cocok, kita labo ihakimi.
32 Tapi adi kita ihakimi, kita ipersingeti Jahwe*+ gelah la ihukum radu ras doni enda.+
33 Emaka turang senina, adi kena pulung guna man, sitima-timanlah kena.
34 Adi lit si melihe, manlah ia lebe i rumah, gelah sanga kena pulung la ban kena diri kena ihukum.+ Kerna persoalen-persoalen si deban, kudungi kari sanga aku enggo seh jena.
Cataten i teruh
^ Ntah “cangkir.”
^ Ntah “cangkir.”
^ Ntah “cangkir.”
^ Ntah “cangkir.”
^ Ntah “cangkir.”
^ Maksudna, mate secara rohani.
