1 Korinti 14:1-40
14 Usahakenlah ncidahken* kekelengen, janah usahakenlah ndatken pemere-pemere bas Dibata nari, terlebih-lebih pemere guna ernubuat.+
2 Kalak si ngerana bas bahasa si deban, labo ia ngerana man manusia tapi man Dibata. Amin pe alu kesah si badia banci cakapkenna kerna rahasia si badia,+ tapi ise pe la ngangkaisa.+
3 Tapi kalak si ernubuat banci mpegegehi, nampati, ras ngapuli kalak si deban alu rananna.
4 Kalak si ngerana bas bahasa si deban, dirina ngenca si pegegehina. Tapi kalak si ernubuat, mpegegehi runggun.
5 Ateku min kerina kena ngerana bas bahasa si deban,+ tapi padin kuakap kena ernubuat.+ Ulin ernubuat asangken ngerana bas bahasa si deban, pala e iterjemahken, alu bage runggun banci ipegegehi.
6 O turang senina, adi reh aku janah ngerana alu bahasa si deban, kai gunana man kena? Gelah erguna, la kin arus aku ngerana alu pemeteh,+ ntah alu nubuat, ntah ajaren, ntah alu kata-kata si kualoken arah Dibata?+
7 Bagi alat-alat musik, eme barang si la erkesah tapi ersora, contohna suling ntah harpa,* adi la jelas nadana imainken, uga banci teh kalak laguna?
8 Adi la jelas sora trompet, ise si ersikap guna erperang?
9 Bage ka pe, adi kata-kata si pake kena mesera ngangkaisa, uga kalak banci ngangkai si kataken kena e? Situhuna, seri saja kena ngerana ku angin.
10 Lit erbage-bage bahasa i doni enda, tapi kerina bahasa e lit ertina.
11 Adi la kuangka kai si kataken sekalak jelma man bangku, aku jadi kalak asing man bana, janah ia jadi kalak asing man bangku.
12 Bage ka pe kena, perban ersura-sura kel kena ngaloken pemere-pemere bas Dibata nari, usahakenlah ndatken terbuen pemere guna mpegegehi runggun.+
13 Emaka kalak si ngerana bas bahasa si deban, perlu ia ertoto gelah banci terjemahkenna kai si katakenna e.+
14 Adi ertoto aku bas bahasa si deban, labo aku si ngerana tapi pemere arah Dibata. Amin pe bage, labo kuangkai kai si kukataken e.
15 Adi bage, kai si kulakoken? Ertoto aku alu pemere arah Dibata janah ertoto ka aku gelah kai si kukataken banci iangkai. Kuendeken pujin alu pemere arah Dibata janah rende ka aku gelah kai si kukataken banci iangkai.
16 Adi puji kena Dibata alu pemere arah Dibata nari, janah kai si kataken kena e la angkai kalak si lenga iajari si lit i tengah-tengah kena, uga banci katakenna “Amin” kenca kena ertoto ngata bujur?
17 Memang mejile pertoton kena bas ngataken bujur man Dibata, tapi kalak e la terpegegehi.
18 Bujur kukataken man Dibata perban banci aku ngerana bas terbuen bahasa asangken kena kerina.
19 Amin pe bage, gelah banci kuajari kalak bas runggun, ulin kubelasken lima kata si banci iangkai asangken sepuluh ribu kata bas bahasa si deban si la iangkai.+
20 O turang senina, ula bagi anak-anak cara kena rukur.+ Tapi bas si la mehuli, bagi anak-anak min kena,+ janah bagi kalak dewasa min cara kena rukur.+
21 Lit tertulis bas Undang-Undang Musa, “‘Kupake pagi kalak si ngerana bas bahasa si deban bage pe kalak asing guna ngerana man kalak e, tapi kalak e tetap la nggit megiken Aku,’ nina Jahwe.”*+
22 Emaka, pemere guna ngerana bas bahasa si deban jadi bukti man kalak si la tek,+ labo bukti man kalak si tek. Tapi pemere ernubuat jadi bukti man kalak si tek, labo man kalak si la tek.
23 Adi kerina runggun pulung janah kerina ngerana bas bahasa si deban, jenari reh kalak si lenga iajari ntah si lenga tek, la kin kataken kalak e kari maka kena kerina enggo adon?
24 Tapi adi kerina kena ernubuat, jenari reh kalak si lenga iajari ntah pe kalak si lenga tek, kata-kata kena banci jadi persinget man kalak e janah ngiahken kalak e guna mereksa dirina.
25 Teh kalak e pagi kai si terbuni bas pusuhna, alu bage sujud ia nembah Dibata. Nina, “Tuhu-tuhu kepe Dibata lit i tengah-tengah kena.”+
26 Adi bage, uga turang senina? Sanga pulung kena, lit si ngendeken masmur, lit si ngajar, lit si mpeseh kata si alokenna arah Dibata, lit si ngerana alu bahasa si deban, janah lit si nerjemahken.+ Lakokenlah kerinana guna mpegegehi.
27 Adi lit si ngerana bas bahasa si deban, bias nge dua ntah telu kalak saja si gantian ngerana, janah arus lit sekalak jelma si nerjemahkenca.+
28 Adi la lit si nerjemahkenca, arus kalak e tetap sinik bas runggun janah ngerana man Dibata bas pusuhna saja.
29 Adi lit nabi, bias dua ntah telu nabi saja+ si ngerana, tapi si debanna ngusahaken gelah ngangkai ertina.
30 Tapi adi lit kata si reh arah Dibata ipeseh man sekalak jelma si sangana kundul i je, kalak si sangana ngerana arus sinik.
31 Kerina kena banci gantian ernubuat, alu bage kerina kalak banci erlajar janah ipegegehi.+
32 Pemere si aloken nabi-nabi arus pakena alu cara si benar.
33 Dibata labo Dibata si la teratur, tapi Dibata kedamen kap Ia.+
Bagi bas kerina runggun kalak si badia,
34 diberu arus sinik bas runggun. La banci kalak e ngerana.+ Tapi arus kalak e patuh,+ bagi si kataken Undang-Undang Musa.
35 Adi lit si atena tehna, i rumah sajalah ia nungkun man dilakina, sebap man kemelanken kap adi diberu ngerana bas runggun.
36 Bas kena nari kin rehna kata Dibata, ntah man kena saja kin kata Dibata e ipeseh?
37 Adi lit si akapna ia nabi ntah lit bas ia pemere bas Dibata nari, arus akuina maka kai si kutulis man kena enda perentah Tuan.*
38 Adi lit kalak si la mperdiateken si enda, ia pe labo iperdiateken.*
39 Emaka turang senina, teruslah usahaken guna ndatken pemere ernubuat,+ tapi ula larang kalak si deban ngerana bas bahasa si deban.+
40 Lakokenlah kerinana alu cara si benar ras teratur.+
Cataten i teruh
^ As. “Ayakilah.”
^ Harpa eme alat musik si ersenar bagi gitar, tapi bentukna beda.
^ Ntah banci saja “Adi lit si kurang pemetehna, tetap nge kurang pemetehna.”
