1 Korinti 3:1-23
3 O turang senina, mbarenda ngerana aku man kena labo bagi ngerana man kalak si itegu-tegu kesah si badia,+ tapi bagi ngerana man kalak si ngikutken sura-sura dagingna, si bagi bayi denga+ bas ngikutken Kristus.
2 Kubere kena susu, labo pangan si keras, perban kena lenga megegeh. Gundari pe kena lenga megegeh,+
3 perban perukuren kena ngikutken sura-sura daging denga.+ Adi kena sician-cianen janah rubati, la kin e ertina ikutken kena denga sura-sura daging+ ras nggeluh bagi kalak si lit bas doni enda?
4 Adi sekalak ngataken, “Aku pengikut Paulus,” si deban ngataken, “Aku pengikut Apolos,”+ la kin e ertina perbahanen kena seri saja ras kalak si lit bas doni enda?
5 Situhuna ise kin Apolos e? Ise kin Paulus e? Kami pelayan ngenca+ si ngelakoken dahin arah Tuhan* nari, si nampati kena jadi pengikutna.
6 Aku si nuansa,+ Apolos si niramsa,+ tapi Dibata si erbanca turah.
7 Jadi, si penting labo si nuansa ntah pe si niramsa, tapi si penting Dibata si erbanca turah.+
8 Si nuan ras si niramsa sada kap tujunna, tapi aloken kalak e pagi upah sesuai ras pendahinna masing-masing.+
9 Kami kap teman erdahin Dibata, kena kap juma Dibata si sangana dahikenNa, kena kap bangunen Dibata.+
10 Perban kualoken kiniulin Dibata si luar biasa, kuban pondasi+ bagi tukang bangunen si beluh, tapi kalak si deban si mbangunsa i datas pondasi e. Tiap kalak arus perdiatekenna uga ia mbangun i datas pondasi e.
11 Sebap la lit si banci namaken pondasi si deban guna nggantiken pondasi si enggo iban, eme Jesus Kristus.+
12 I datas pondasi e lit si mbangun alu emas, pirak, batu-batu si merga, kayu, dukut-dukut si kerah, ntah pe nggala.*
13 Tapi pendahin kalak e teridah pagi bas waktuna sanga iuji alu api.+ Api pagi si mbuktikenca uga kin situhuna pendahin kalak e masing-masing.
14 Adi pendahin si ibangun sekalak jelma e tetap lit, datna pagi upah.
15 Adi meseng pendahinna e, rugi ia. Amin pe bage selamat ia, tapi bagi kalak si selamat arah api nari.
16 La kin teh kena maka kena kap rumah pertoton Dibata,+ janah kesah si badia Dibata tetap lit bas kena?+
17 Adi kernepken sekalak jelma rumah pertoton Dibata, kernepken Dibata pagi ia. Rumah pertoton Dibata e badia, kena kap rumah pertoton e.+
18 Ula ise pe nipu bana. Adi lit i tengah-tengah kena si akapna ia pentar menurut doni* enda, padin ia jadi kalak bodoh gelah pentar i lebe-lebe Dibata.
19 Menurut Dibata, kepentaren doni enda kebodohen kap, sebap lit tertulis, “BanNa kalak si pentar ndabuh bas jebakenna sendiri.”+
20 Lit ka tertulis, “Teh Jahwe* kap maka perukuren kalak si pentar e sia-sia.”+
21 Emaka ula bangga kerna kai si lakoken manusia, sebap kerina e jang kena.
22 Paulus, Apolos, Kepas,*+ doni enda, kegeluhen, kematen, kai si lit gundari, ntah kai si nandangi reh, kerina e jang kena kap.
23 Tapi kena jang Kristus,+ janah Kristus jang Dibata.
