1 Korinti 4:1-21
4 Ate kami gelah anggap kalak kami pelayan Kristus ras pengurus rahasia si badia Dibata.+
2 Sekalak pengurus iarapken setia bas ndalanken dahinna.
3 La kuakap penting hakimi kena aku ntah pe baba kena aku ku pengadilen manusia. Situhuna, aku pe la kuhakimi bangku.
4 La kuakap lit kai pe salahku, tapi enda labo ertina aku kalak si benar. Jahwe* kap si ngakimi aku.+
5 Emaka, ula hakimi kena+ ise pe sope seh waktuna, seh asa kerehen Tuan. Cidahkenna pagi kai si terbuni si lit bas gelap janah katakenna isi pusuh kalak, jenari tiap kalak ndatken pujin si patut arah Dibata nari.+
6 O turang senina, kukataken kerina enda guna kepentingen kena. Kuban aku ras Apolos+ jadi usihen gelah arah kami banci angkai kena peraturen enda: “Ula lakoken kai pe lebihen asangken si tertulis,” gelah ula kena sombong+ janah gelah ula ulin akap kena sekalak jelma asangken si deban.
7 Kai kin si erban kena beda ras kalak si deban? La kin si lit bas kena e ibere Dibata nge?+ Adi memang kerina e bere Dibata, engkai maka kena sombong tempa-tempa si e hasil usaha kena?
8 Enggo kin kena puas? Enggo kin kena bayak? Enggo kin kena merentah jadi raja+ adi la ras kami? Ngarap kel aku kena enggo jadi raja gelah kami pe banci merentah jadi raja radu ras kena.+
9 Kuakap, ban Dibata kami jadi rasul-rasul gelah jadi kalak si ihukum mate kami bas bagin pendungi,+ perban kami enggo jadi tontonen man doni enda,+ man malekat-malekat, bage pe man manusia.
10 Kami bodoh+ guna Kristus, tapi kena pentar perban ngikutken Kristus. Kami lemah, tapi kena megegeh. Kena ihamati, tapi kami la ihamati.
11 Seh asa gundari kami kelihen denga,+ muas,+ kurang paken* kami, ipekpeki,+ la lit rumah kami,
12 janah kami kerja keras alu tan kami.+ Sanga hina kalak kami, pasu-pasu kami kalak e.+ Sanga kami isiksa, gengken kami alu sabar.+
13 Sanga kami ipitnah, jawap kami alu lembut.+ Seh asa gundari, kami iban bagi sampah doni si ambekken kalak.
14 Kutulis enda kerina labo gelah kena mela, tapi guna mere nasehat man kena, anak-anak si kukelengi.
15 Bicara lit kin pe 10.000 guru kena si ngajari kena cara ngikutken Kristus, tapi bapak kena labo enterem. Bas Kristus Jesus, aku kap bapak kena, si maba berita si meriah.+
16 Emaka mindo aku gelah usih kena min aku.+
17 E me sebapna kusuruh Timotius ndahi kena, ia kap anak si kukelengi janah setia bas ngelayani Tuan. Ingetkenna kari kena kerna cara-caraku bas ngelayani Kristus Jesus,+ bagi si kuajarken bas tiap runggun.
18 Piga-piga bas kena nari jadi sombong sebap akapna aku la reh ndahi kena.
19 Tapi mis nge kari aku reh, adi bage kin ate Jahwe.* Merhat aku meteh uga kin situhuna kalak si sombong e, labo guna meteh kai si katakenna, tapi guna meteh lit kin kuasa Dibata bas kalak e ntah lang.
20 Sebap Kerajan Dibata labo kerna ranan, tapi kerna kuasa Dibata.
21 Apai kin pilih kena? Reh aku alu perpalu+ ntah alu lemah lembut ras alu kekelengen?
