1 Korinti 7:1-40
7 Gundari, enda jawapen man penungkunen si itulis kena: Ulin sekalak dilaki la erhubungen seks ras diberu,
2 tapi perban i japa pe enterem kalak enggo ngelakoken perbahanen seks si salah,* tiap dilaki lit min ndeharana sekalak-sekalak,+ janah tiap diberu lit min perbulangenna sekalak-sekalak.+
3 Sekalak perbulangen arus min berekenna hak* ndeharana, ndehara pe arus bage man perbulangenna.+
4 Sekalak ndehara la erkuasa nandangi dagingna, si erkuasa nandangi dagingna eme perbulangenna. Bage ka pe sekalak perbulangen la erkuasa nandangi dagingna, si erkuasa nandangi dagingna eme ndeharana.
5 Ula tahan kena hak teman geluh kena, pala ersada arih kena ngelakokenca bas waktu si ntisik si enggo itetapken. Alu bage banci pake kena waktu e guna ertoto, jenari ersada mulihken gelah la kena igoda Setan perban la terkuasai kena diri kena.
6 Si kukataken enda banci lakoken kena, tapi enda labo perentah.
7 Kuarapken kerina kalak bagi aku. Amin pe bage, tiap kalak lit pemere si alokenna sekalak-sekalak+ bas Dibata nari. Lit pemere bagi si enda, lit ka pemere bagi si ah.
8 Kukataken man kena si lenga erjabu bage pe man diberu si enggo janda, ulin nge kena tetap bagi aku.+
9 Tapi adi la banci kuasai kena diri kena, ulin kena erjabu asangken gara rusur napsu kena.+
10 Man si enggo erjabu, kubereken petunjuk enda, labo bas aku nari tapi bas Tuan nari, gelah sekalak ndehara ula ranggung* ras perbulangenna.+
11 Amin pe ranggung, la banci ia erjabu. Pala, ersada ia mulihken ras perbulangenna. Sekalak perbulangen pe la banci nadingken ndeharana.+
12 Man si deban kukataken bagenda, tapi enda bas aku nari labo bas Tuan nari:+ Adi lit sekalak perbulangen si ndeharana la sada kiniteken ras ia, janah ndeharana e nggit tetap tading ras ia, la banci tadingkenna ndeharana e.
13 Adi lit sekalak ndehara si perbulangenna la sada kiniteken ras ia, janah perbulangenna e nggit tetap tading ras ia, la banci tadingkenna perbulangenna e.
14 Perbulangen si la sada kiniteken enggo badia perban ndeharana e, janah ndehara si la sada kiniteken enggo badia perban perbulangenna e. Adi lang, anak-anak kena jadi najis. Tapi gundari kalak e enggo badia.
15 Adi ndehara ntah pe perbulangen si la sada kiniteken, pilihna nadingken* teman geluhna e, pediatlah ia lawes. Bas keadan si bage, turang ntah pe senina e la arus tetap ersada ras teman geluhna e. Tapi enggo bereken Dibata man kena kedamen.+
16 O kena ndehara, ja nari teh kena maka la banci selamatken kena perbulangen kena?+ O kena perbulangen, ja nari teh kena maka la banci selamatken kena ndehara kena?
17 Amin pe bage, tiap kalak arus nggeluh sesuai ras kai si bereken Jahwe* man bana, eme sesuai ras keadanna si mbarenda sanga ia ilebuh Dibata.+ Emaka, kubereken petunjuk enda man kerina runggun.
18 Adi lit kalak si enggo isunat sanga ia ilebuh,+ ulin ia tetap bage. Adi lenga ia isunat sanga ia ilebuh, la padah ia isunat.+
19 Isunat ntah pe la isunat, e labo penting,+ si penting eme ndalanken perentah Dibata.+
20 Uga pe keadan sekalak jelma sanga ia ilebuh, ulin ia tetap bas keadanna e.+
21 Budak kin kena sanga kena ilebuh? Ula kuatir kerna si e.+ Tapi adi lit kesempaten kena jadi bebas, gunakenlah e.
22 Sekalak budak si ilebuh jadi budak Tuan eme kalak si ibebasken janah jadi jang Tuan.+ Bage ka pe, kalak si bebas sanga ia ilebuh eme budak Kristus.
23 Enggo merga kel kena itukur,+ emaka ula nai kena jadi budak manusia.
24 O turang senina, ugapa pe keadan sekalak jelma sanga ia ilebuh, ulin ia tetap bas keadanna e i lebe-lebe Dibata.
25 Gundari man si lenga pernah erjabu, labo lit kudat perentah bas Tuan nari, tapi selaku kalak si setia perban kualoken perkuah ate Tuan, kubereken pendapat enda:+
26 Perban kita nggeluh bas jaman si susah, ulin sekalak dilaki tetap bas keadanna si gundari.
27 Adi enggo lit ndehara kena, ula nai darami kena dalan nadingken ia.+ Adi la lit ndehara kena, ula nai darami kena ndehara.
28 Bicara enggo pe kena erjabu, labo kena erdosa. Adi si lenga erjabu dungna erjabu, labo ia erdosa. Tapi kalak si erjabu nanamina pagi melala kesusahen. Ateku min gelah la nanami kena kesusahen si bage.
29 Maksudku bagenda, o turang senina: Waktuna ntisik nari ngenca.+ Mulai gundari nari, ulin kalak si lit ndeharana, tempa-tempa la lit ndeharana.
30 Kalak si tangis tempa-tempa la tangis, kalak si ermeriah ukur tempa-tempa la ermeriah ukur, kalak si nukur tempa-tempa si tukurna e labo jangna.
31 Kalak si make doni tempa-tempa la kerinana pakena doni enda, perban keadan si lit bas doni enda sangana berubah.
32 Ateku min gelah bebas kena arah kekuatiren nari. Dilaki si la erjabu, si kuatirkenna kerna kai si lit hubungenna ras pelayanen man Tuan, uga gelah ngena ate Tuan.
33 Tapi dilaki si enggo erjabu si kuatirkenna kerna kai si lit bas doni enda,+ uga gelah ngena ate ndeharana,
34 emaka ukurna terbagi. Diberu si la erjabu bage pe singuda-nguda, si kuatirkenna kerna kai si lit hubungenna ras pelayanen man Tuan,+ gelah dagingna ras perukurenna banci badia. Tapi diberu si erjabu si kuatirkenna kerna kai si lit bas doni enda, uga gelah ngena ate perbulangenna.
35 Si enda kukataken guna kiniulin kena, labo guna mbatasi kena. Tapi, kuiahken ateku kena gelah ngelakoken kai si mehuli janah terus ngelayani Tuan alu la lit ganggun.
36 Tapi, ise pe si lenga erjabu si la ngasup akapna nguasai napsuna, janah adi enggo cukup umurna, padin ia erjabu. Labo ia erdosa adi bage.+
37 Tapi, ise pe si akapna la perlu erjabu janah banci kuasaina napsuna, emaka banna keputusen gelah la erjabu janah enggo tetapkenna keputusenna e bas pusuhna, si mehuli kap si lakokenna e.+
38 Emaka, kalak si erjabu lit manpaat idatna, tapi buen manpaat si idat kalak si la erjabu.+
39 Ndehara ersada ras perbulangenna sedekah perbulangenna e nggeluh denga.+ Tapi adi perbulangenna e medem bas kematen, banci ia erjabu ras ise pe si atena ngena asalken erjabu ia ras pengikut Tuan.*+
40 Tapi menurutku, senangen nge akapna adi lanai ia erjabu, janah menurutku kesah Dibata lit bas aku.
