1 Korinti 8:1-13
8 Gundari, eme kerna pangan si ipersembahken man berhala:+ Kerina kita lit pemetehta kerna si e.+ Pemeteh banci erban kalak jadi sombong, tapi kekelengen mpegegehi kap.+
2 Kalak si akapna bas ia lit pemeteh, situhuna labo lit bas ia pemeteh si arusna kin tehna.
3 Tapi ise pe si engkelengi Dibata, tandai Dibata kap ia.
4 Kerna man pangan si ipersembahken man berhala, siteh maka berhala e labo lit ertina,+ janah sada kap ngenca Dibata.+
5 Amin pe i surga bage pe i doni lit si igelari dibata-dibata,+ janah tuhu lit melala “dibata” bage pe melala “tuan,”
6 tapi situhuna, man banta sada ngenca Dibata,+ eme Bapakta.+ Ia si nciptaken kerinana janah kita iciptaken guna Ia.+ Bage ka pe, sada ngenca Tuan, eme Jesus Kristus. Kerinana iciptaken arah ia+ janah kita pe iciptaken arah ia.
7 Labo kerina kalak lit pemetehna kerna si e.+ Tapi perban mbarenda lit si nembah berhala, piga-piga kalak si man pangan si bage anggapna pangan e ipersembahken man berhala,+ alu bage pusuh peraten kalak si lemah jadi terganggu.*+
8 Situhuna, pangan labo erban kita reh rembakna ras Dibata.+ Bicara la pe sipan labo kita rugi, bicara sipan pe labo lit untungta.+
9 Tapi hati-hatilah, ula sempat kebebasen kena bas milih erban kalak si lemah jadi tertuktuk.+
10 Adi kalak si lemah ngidah kena eme kalak si lit pemetehna man bas ingan nembah berhala, la kin pusuh peratenna jadi terpengaruh, dungna panna pangan si ipersembahken man berhala?
11 Adi bage, pemeteh kena e enggo ncedai kiniteken kalak si lemah, padahal Kristus enggo mate guna ia.+
12 Adi erdosa kena man turang senina kena alu cara si bage janah lukai kena pusuh peraten kalak si lemah,+ erdosa kap kena man Kristus.
13 Emaka, adi pangan kin si erbanca turang seninaku jadi tertuktuk, asa ndigan pe lanai kupan daging, gelah la kuban turang seninaku jadi tertuktuk.+
Cataten i teruh
^ As. “najis.”
