1 Kronika 11:1-47
11 Bas pudi wari, kerina suku Israel reh ndahi Daud i Hebron+ janah nina, “Sada dareh kap kita.+
2 Sanga Saul denga jadi raja, kam kap si minpin Israel erperang.+ Nina Jahwe Dibatandu man bandu, ‘Kam pagi si mpermakani bangsaKu Israel janah kam jadi peminpin bangsaKu Israel.’”+
3 Emaka reh kerina peminpin Israel ndahi Raja Daud i Hebron, janah ban Daud perjanjin ras kalak e i Hebron i lebe-lebe Jahwe. Kenca si e, lantik kalak e Daud jadi raja Israel+ bali bagi si ikataken Jahwe arah Samuel.+
4 Bas pudi wari, berkat Daud ras kerina kalak Israel ku Jerusalem, eme Jebus,+ ingan tading kalak Jebusi.+
5 Tokohi penduduk Jebus me Daud, nina, “Labo ndigan pe kam banci masuk ku jenda!”+ Tapi taluken Daud kota Sion si ertembok,+ janah dungna ingan e jadi Kota Daud.+
6 Emaka nina Daud, “Si pertama nyerang kalak Jebusi, ia pagi si jadi peminpin* ras pejabat.” Joap+ anak Seruya si pertama maju, janah dungna ia jadi peminpin.
7 Kenca si e, tading Daud i kota si ertembok e. E me sebapna, kota e igelari Kota Daud.
8 Mulai bangun Daud tembok kota e ras bangunen-bangunen si lit i sekelilingna, mulai arah Bukit* nari seh ku kota e. Janah bangun Joap bagin-bagin si deban arah kota e.
9 Jahwe penguasa malekat lit ras Daud, emaka kuasa Daud terus reh belinna.+
10 Peminpin-peminpin arah pejuang-pejuang Daud si megegeh ras kerina kalak Israel ndukung Daud gelah ia jadi raja, bali bagi si janjiken Jahwe man kalak Israel.+
11 Enda me daftar pejuang-pejuang Daud si megegeh: Jasobeam+ anak kalak Hakmon. Ia si jadi peminpin arah telu pejuang Daud si megegeh.+ Pernah bunuhna 300 kalak alu tombakna i bas sada peperangen.+
12 Si peduaken eme Eleasar+ anak Dodo kalak Ahoh.+ Ia salah sada arah telu pejuang si megegeh ndai.
13 Eleasar lit ras Daud sanga i Pas Dammim,+ si i je kalak Pilisti pulung guna erperang. I je lit sada juma si dem turah barli. Kiamen kalak perban kalak Pilisti.
14 Tapi tedis Eleasar i tengah-tengah juma e guna mpertahankenca, janah terus serangna kalak Pilisti e, emaka bere Jahwe kemenangen* si mbelin.+
15 Telu arah 30 kepala pasuken lawes ku gunung batu guna ndahi Daud i Gua Adulam.+ Sanga si e, pasuken Pilisti paksana erkemah i Lembah Repaim.+
16 Daud sangana i bas ingan cebuni, janah lit sada kelompok pasuken Pilisti i Betlehem.
17 Kenca si e kataken Daud sura-surana, “Bicara banci kuinem lau arah sumur* si lit i deher gerbang Betlehem, pasti meriah ukurku.”+
18 Megi si e, terobos telu pejuang Daud perkemahen kalak Pilisti, janah buatna lau si lit bas sumur* i deher gerbang Betlehem, jenari berekenna man Daud. Tapi la nggit Daud nginemsa, amburkenna lau e man Jahwe.
19 Nina Daud, “La mungkin kuinem lau enda, sebap mbiar aku man Dibata! Arus kin kuinem dareh kalak enda si enggo mpertaruhken kesahna?+ Sebap enggo kap pertaruhken kalak e kesahna guna maba lau e.” Emaka la ia nggit nginem lau e. Enda ndai me kerina si ilakoken telu pejuang Daud si megegeh ndai.
20 Lit ka telu kalak nari pejuang Daud si megegeh janah arah kalak e teluna, si jadi peminpinna eme Abisai+ senina Joap.+ Pernah bunuhna 300 kalak alu tombakna, janah ia pe terkenal bali bagi telu pejuang si megegeh ndai.+
21 Arah si telu e, Abisai si megegehna janah ia si jadi peminpin kalak e. Amin gia bage, kedudukenna tetap teruhen asangken telu pejuang si megegeh si pertama ndai.
22 Benaya+ anak Joyada eme kalak si perpang,* lakokenna melala perbahanen si megegeh i Kabseel.+ Bunuhna dua anak Ariel arah Moap nari. Bas sada wari sanga nusur salju, nusur ia ku lubang lau guna munuh sada singa.+
23 Bunuhna ka sada kalak Mesir si seh kel galangna dagingna, gedangna lebih dua meter.*+ Amin gia tombak kalak Mesir e bali bagi kayu si ipake bas alat tenun,+ lawanna kalak Mesir e alu tongkat janah rampasna tombak kalak Mesir e. Jenari bunuhna kalak Mesir e alu tombakna ndai.+
24 E me si ilakoken Benaya anak Joyada. Ia terkenal bali bagi telu pejuang si megegeh ndai.
25 Amin pe gegehen ia asangken 30 peminpin pasuken ndai, labo seri kedudukenna ras telu pejuang si megegeh si pertama ndai.+ Amin gia bage, pilih Daud ia jadi kepala pengawal pribadina.
26 Pejuang-pejuang si megegeh si lit bas pasuken Daud eme Asahel+ senina Joap, Elhanan anak Dodo si dilaki si asalna arah Betlehem,+
27 Samot kalak Harot, Heles kalak Pelon,
28 Ira+ anak Ikes si dilaki (ia kalak Tekoa), Abieser+ kalak Anatot,
29 Sibekai+ kalak Husa, Ilai kalak Ahoh,
30 Maharai+ kalak Netopa, Heled+ anak Baanah si dilaki (ia kalak Netopa),
31 Itai anak Ribai si dilaki si asalna arah Gibea si lit i Benyamin,+ Benaya kalak Piraton,
32 Hurai si asalna arah daerah lau* Gaas,+ Abiel kalak Bet-Araba,
33 Asmawet kalak Bahurim, Eliaba kalak Salbim,
34 anak-anak Hasem si dilaki eme kalak Gison, Jonatan anak Sage si dilaki (ia kalak Harar),
35 Ahiam anak Sakar si dilaki (ia kalak Harar), Elipal anak Ur si dilaki,
36 Heper kalak Mekerah, Ahia kalak Pelon,
37 Hesro kalak Karmel, Naarai anak Esbai si dilaki,
38 Joel senina Natan, Mibar anak Hagri si dilaki,
39 Selek kalak Ammon, Naharai kalak Beerot (ia kap si maba senjata Joap anak Seruya),
40 Ira kalak Jetri, Garep kalak Jetri,
41 Uria+ kalak Het, Sabad anak Ahlai si dilaki,
42 Adina anak Sija si dilaki (ia kalak Ruben janah ia kap peminpin kalak Ruben. Lit 30 kalak si ikut ras ia),
43 Hanan anak Maaka si dilaki, Josapat kalak Mitian,
44 Usia kalak Astera, Samma ras Jeiel eme anak Hotam si dilaki (ia kalak Aroer),
45 Jediael anak Simri si dilaki, ras Joha kalak Tis eme senina Jediael,
46 Eliel kalak Mahawa, Jeribai ras Josawia anak Elnaam si dilaki, Itma kalak Moap,
47 Eliel, Obet, ras Jasiel kalak Mesoba.
Cataten i teruh
^ As. “kepala.”
^ Ntah “Milo.” Istilah Heber si ertina “taneh si ergun-gun.”
^ Ntah “keselamaten.”
^ Maksudna, lubang guna nimpan lau.
^ Maksudna, lubang guna nimpan lau.
^ As. “eme anak kalak si perpang.”
