1 Kronika 12:1-40
-
Si ndukung Raja Daud (1-40)
12 Sanga cebuni Daud arah Saul+ anak Kis nari, enterem kalak si reh ku Siklak+ guna ndahi Daud. Arah kalak si reh e, lit pejuang-pejuang si megegeh si nampati Daud bas erperang.+
2 Senjata kalak e eme panah. Janah beluh kalak e make tanna si kanan ntah pe si kiri+ guna mbenterken batu+ make alat si iban arah nali nari,* ntah pe guna manahken anak panah. Kalak e senina-senina Saul arah Benyamin nari.+
3 Peminpin kalak e eme Ahieser ras Yoas. Kalak e duana anak Syema si dilaki (Kalak e kalak Gibea).+ Lit ka Jesil ras Pelet anak Asmawet si dilaki,+ Berakah, Jehu kalak Anatot,
4 Ismaya kalak Gibeon+ (Ia salah sada pejuang si megegeh arah 30 kalak+ e janah ia peminpin kalak e), Jeremia, Jahasiel, Johanan, Josabat kalak Gedera,
5 Elusai, Jerimot, Bealia, Semaria, Sepatia kalak Harip,
6 Elkana, Isiah, Azarel, Joeser ras Jasobeam keturunen Korah,+
7 bage pe Joela ras Sebadia anak Jeroham si dilaki si asalna arah Gedor.
8 Piga-piga kalak Gat lawes ndahi Daud ku inganna cebuni i taneh mesawang.*+ Kalak e pejuang si megegeh, prajurit si terlatih erperang, janah terus jemakna perisai* si galang ras tombakna. Ayo kalak e bali bagi singa janah meter kel perkiamna bali bagi kijang i das pegunungen.
9 Eser me peminpin kalak e, Obaja si peduaken, Eliap si peteluken,
10 Mismana si peempatken, Jeremia si pelimaken,
11 Attai si peenemken, Eliel si pepituken,
12 Johanan si pewaluhken, Elsabat si pesiwahken,
13 Jeremia si pe-10-ken, janah Makbanai si pe-11-ken.
14 Kalak e ndai kerina arah suku Gat nari+ janah kalak e peminpin-peminpin pasuken. Si lemahna arah kalak e seri gegehna ras 100 prajurit, janah si megegehna arah kalak e seri gegehna ras 1.000 prajurit.+
15 Kalak e me si nyeberangi Lau Jordan bas bulan si pertama. Paksa si e Lau Jordan sangana banjir. Pelawes kalak e ka penduduk si tading i lembah-lembah ku daerah timur ras daerah barat.
16 Piga-piga kalak Benyamin ras kalak Juda pe reh ndahi Daud ku inganna cebuni.+
17 Emaka jumpai Daud kalak e janah nina, “Adi reh kena i bas dame guna nampati aku, kualoken kena jadi temanku. Tapi adi kerehen kena e guna nghianati aku janah nyerahken aku ku bas tan musuhku, padahal la lit salahku, mbera-mbera idah Dibata nini bulangta kerna si e janah hakimiNa kena.”+
18 Emaka erdahin kesah si badia i bas Amasai+ peminpin arah si 30 kalak e, janah nina,
“O Daud anak Isai, kam kap si mpuna kami, janah ras kam kap kami.+
Dame, damelah man bandu, ras dame man kalak si nampati kam,Sebap Dibatandu kap si nampati kam.”+
Emaka aloken Daud kalak e janah banna kalak e jadi peminpin pasukenna.
19 Piga-piga kalak arah suku Manase pe nadingken pasuken Saul janah dahi kalak e Daud. Paksa si e, Daud sangana ikut ras kalak Pilisti guna erperang ngelawan Saul. Tapi la surung sampati Daud kalak Pilisti, perban kenca arih-arih peminpin-peminpin kalak Pilisti,+ isuruh kalak e Daud lawes. Sebap nina kalak e, “Tadingkenna nge kita pagi janah dukungna tuanna Saul, jenari bunuhna kita.”+
20 Sanga lawes ia ku Siklak,+ enda me kalak Manase si nadingken pasuken Saul guna ngikutken Daud: Adnah, Josabat, Jediael, Mikael, Josabat, Elihu, ras Siletai. Kalak e peminpin-peminpin arah suku Manase si ngawasi ribun kalak.+
21 Kerina kalak e megegeh ras perpang.+ Emaka sampati kalak e Daud ngelawan perampok-perampok. Janah dungna kalak e jadi peminpin-peminpin bas pasuken Daud.
22 Tiap wari lalap rehen kalak guna nampati Daud.+ Dungna pasuken Daud bali teremna bagi pasuken Dibata.+
23 Enda me jumlah peminpin pasuken si make senjata. Kalak e reh ndahi Daud i Hebron+ guna erban ia jadi raja si nggantiken Saul bagi si perentahken Jahwe.+
24 Arah suku Juda lit 6.800 kalak si maba perisai si galang ras tombak. Kalak e iperlengkapi senjata guna erperang.
25 Arah suku Simeon lit 7.100 prajurit si megegeh ras perpang.
26 Arah suku Lewi lit 4.600 kalak.
27 Joyada+ si jadi peminpin keturunen Harun,+ janah ras Joyada lit 3.700 kalak,
28 bage pe Sadok+ (sekalak anak muda si megegeh ras perpang) ras 22 peminpin arah keluarga bapakna.
29 Arah suku Benyamin eme senina-senina Saul,+ lit 3.000 kalak. Mbarenda, teremen arah kalak enda si setia man Saul ras keluarga Saul.
30 Arah suku Eperaim lit 20.800 kalak si megegeh ras perpang, si terkenal i bas keluarga bapakna.
31 Arah setengah suku Manase lit 18.000 kalak si ipilih guna njadiken Daud raja.
32 Arah suku Isakar lit 200 peminpin. Banci teh kalak e kai si arus ilakoken kalak Israel i bas waktu si tepat. Kerina senina-senina kalak e patuh man perentah si 200 kalak e.
33 Arah suku Sebulon lit 50.000 kalak si jadi prajurit. Kalak enda iaturken i bas barisen perang, janah lit erbage-bage senjata perangna. Tuhu-tuhu setia kel* kalak e kerina ngikutken Daud.
34 Arah suku Naptali lit 1.000 kalak peminpin ras 37.000 prajurit si maba perisai si galang ras tombak.
35 Arah suku Dan lit 28.600 kalak si iaturken i bas barisen perang.
36 Arah suku Aser lit 40.000 kalak si banci jadi prajurit janah kalak e iaturken i bas barisen perang.
37 Arah suku-suku si tading i sebrang Lau Jordan,+ eme suku Ruben, suku Gat, bage pe setengah arah suku Manase nari, lit 120.000 prajurit si make erbage-bage senjata perang.
38 Kerina kalak e prajurit si ersada i bas barisen perang. Sada arih kalak e lawes ku Hebron guna erban Daud jadi raja i bas kerina daerah Israel. Janah, kalak Israel si debanna pe sada arihna ras kalak e guna erban Daud jadi raja.+
39 Telu wari dekahna kalak e tading ras Daud i je. Ipan ras inem kalak e kerina si enggo sikapken senina-seninana.
40 Kalak si tading i deher kalak e bage pe daerah si ndauh si lit i daerah Isakar, Sebulon, ras Naptali pe reh maba pangan. Ibaba kalak e melala kel tepung, kue ara si enggo ikerahken, kue kismis si enggo ikerahken, lau anggur, minak, janah kerina e itama kalak e i datas kelede, unta, bagal,* ras lembu. Janah baba kalak e ka melala kel lembu ras biri-biri, sebap lit keriahen ukur si mbelin i bas Israel.
Cataten i teruh
^ Taneh si mbelang si jarang iingani.
^ Ntah “ampang-ampang.”
^ Ntah “La erdua ukur.”
^ Keturunen kelede jantan ras kuda beruna.
