1 Kronika 13:1-14
13 Arih-arih Daud ras peminpin-peminpin si ngawasi seribu kalak, ras peminpin-peminpin si ngawasi seratus kalak, bage pe ras peminpin-peminpin si debanna.+
2 Kenca si e, nina Daud man kerina kalak Israel, “Adi setuju kena, janah adi Dibatata Jahwe pe setuju, sipesehlah berita man kerina senina-seninata si tading denga bas kerina daerah Israel, man imam-imam, bage pe man kalak Lewi si tading bas kota-kotana+ si lit mbalmbal i je. Sipindo gelah reh kalak e guna pulung ras kita.
3 Janah ota sibaba mulih Peti Perjanjin*+ Dibatata.” I bas jaman Saul, Peti Perjanjin e lanai iurus kalak Israel.+
4 Kerina kalak Israel setuju ngelakoken si e, sebap cocok iakap kalak e.
5 Emaka pepulung Daud kerina kalak Israel, mulai arah daerah lau* si lit i Mesir nari seh ku Hamat,*+ guna maba Peti Perjanjin Dibata si benar arah Kiryat Jearim nari.+
6 Lawes Daud ras kerina kalak Israel ku Baala,+ eme Kiryat Jearim si lit i daerah kalak Juda, guna muat Peti Perjanjin Jahwe, eme Dibata si benar, si kundul bas tahta i datas* kerubim-kerubim.+ Peti Perjanjin e igelari alu gelarNa.
7 Tama kalak e Peti Perjanjin Dibata si benar e i gereta si mbaru,+ janah baba kalak e arah rumah Abinadap nari. Ussa ras Ahio si mabai gereta e.+
8 Emaka Daud ras kerina kalak Israel ngerayaken si e i lebe-lebe Dibata si benar. Semangat kel kalak e ngerayakenca alu ngendeken lagu, main harpa,* alat musik si debanna si lit senarna, rebana,+ simbal,+ ras trompet.+
9 Tapi sanga seh kalak e bas ingan ngerik i Kidon, menam ndabuh Peti Perjanjin e iban lembu-lembu e, emaka dudurken Ussa tanna janah jemakna Peti Perjanjin e.
10 Perban si e, merawa kel Jahwe man Ussa, janah bunuhNa ia sebap enggo dudurken Ussa tanna janah jemakna Peti Perjanjin e.+ Emaka mate Ussa i je i lebe-lebe Dibata.+
11 Tapi merawa Daud perban merawa kel Jahwe man Ussa. Igelari me ingan e Peres Ussa* seh asa gundari.
12 Emaka i bas wari e, mbiar kel Daud man Dibata si benar, janah nina, “Uga ningku maba Peti Perjanjin Dibata si benar e ku inganku?”+
13 La baba Daud Peti Perjanjin e ku inganna tading i Kota Daud. Tapi baba Daud Peti e ku rumah Obet Edom kalak Gat.
14 Lit telu bulan dekahna Peti Perjanjin Dibata si benar e bas rumah Obet Edom kalak Gat e. Janah Jahwe terus masu-masu keluarga Obet Edom bage pe kerina si lit bas ia.+
Cataten i teruh
^ Ntah “Peti Perpadanen.”
^ Ntah “Sihor.”
^ Ntah “seh asa dalan masuk ku Hamat.”
^ Ntah banci saja “i antara.”
^ Harpa eme alat musik si ersenar bagi gitar, tapi bentukna beda.
^ Ertina “Merawa man Ussa.”
