1 Kronika 14:1-17
14 Raja Hiram+ arah Tirus nari nuruh kalak ndahi Daud, janah kirimkenna ka kayu aras, tukang batu,* bage pe tukang kayu guna mbangun istana Daud.+
2 Teh Daud maka enggo pepaguh Jahwe kedudukenna selaku raja i bas Israel,+ janah ban Dibata ia jadi raja si hebat guna umatNa Israel.+
3 Tambahi Daud ka diberuna+ sanga ia enggo i Jerusalem. Emaka reh teremna anakna si dilaki bage pe si diberu.+
4 Enda me gelar anak Daud si lahir i Jerusalem:+ Sammua, Sobap, Natan,+ Salomo,+
5 Ibhar, Elisua, Elpelet,
6 Nogah, Nepeg, Japia,
7 Elisama, Beeliada, ras Elipelet.
8 Kenca begi kalak Pilisti maka Daud enggo ilantik jadi raja i bas kerina daerah Israel,+ reh kerina kalak Pilisti nyerang Daud.+ Sanga begi Daud kerna si e, lawes ia nyerang kalak e.
9 Reh kalak Pilisti janah lalap serangna kalak si tading i Lembah Repaim.+
10 Pindo Daud petunjuk man Dibata, nina, “Arus nge kulawan kalak Pilisti ah? SerahkenNdu nge pagi kalak e ku bas tanku?” Nina Jahwe, “Laweslah kam, pasti Kuserahken pagi kalak Pilisti e ku bas tanndu.”+
11 Emaka lawes Daud ku Baal Perasim,+ janah talukenna kalak Pilisti i je. Kenca si e, nina, “Enggo taluken Dibata si benar musuh-musuhku arah tanku, bali bagi tembok si iruntuhken lau.” E me sebapna ingan e igelari Baal Perasim.*
12 Emaka tadingken kalak Pilisti patung-patung berhalana i je, janah kerina e itutung bali bagi si perentahken Daud.+
13 Bas pudi wari, reh ka kalak Pilisti sekali nari nyerang kalak si tading bas lembah e.+
14 Pindo Daud ka petunjuk man Dibata, janah jawap Dibata si benar ia, “Ula serang kalak e arah lebe nari, tapi mutarlah kena ku pudi kalak e, janah serang kalak e i deher batang baka.*+
15 Sanga begindu sora bagi sora nahe kalak si enterem, si sangana erdalan arah batang baka nari, mislah serangndu kalak e, sebap Dibata si benar enggo maju i lebe-lebendu guna naluken pasuken Pilisti.”+
16 Emaka ilakoken Daud bali bagi si iperentahken Dibata si benar,+ janah taluken Daud kalak Pilisti mulai arah Gibeon nari seh ku Geser.+
17 Emaka terkenal Daud i bas kerina negri janah iban Jahwe kerina bangsa mbiar man Daud.+
Cataten i teruh
^ Ntah “tukang mbangun tembok.”
^ Maksudna, “Si Beluhna bas Nerobos.”
^ Ntah “peren baka.” Kata Baka iterjemahken arah bahasa Heber. La iteh uga situhuna bentukna.
