1 Kronika 17:1-27
17 Kenca tading Daud bas istanana, nina Daud man Nabi Natan,+ “Aku tading bas istana si iban arah kayu aras+ nari tapi Peti Perjanjin* Jahwe tading bas kemah.”+
2 Nina Natan man Daud, “Lakokenlah kai pe si atendu lakokenndu, sebap Dibata si benar ras kam kap.”
3 Bas berngi e reh kata Dibata man Natan, nina,
4 “To kataken man budakKu Daud, ‘Bagenda nina Jahwe, “Labo pagi kam si mbangun rumah man inganKu tading.+
5 Sebap mulai kin Kubaba bangsa Israel ndarat arah Mesir nari seh ngayak gundari, Aku la pernah tading i bas sada rumah. Tapi pindah-pindah Aku arah sada kemah ku kemah si deban, janah arah sada ingan ku ingan si deban.+
6 Sedekah Aku ras kalak Israel, pernah kin Kukataken man salah sada hakim bas Israel si Kupilih guna mpermakani bangsaKu, ‘Engkai maka la bangun kena rumah arah kayu aras man bangKu?’”’
7 “Kataken man pelayanKu Daud, ‘Bagenda nina Jahwe penguasa malekat, “Mbarenda, sanga kam njaga asuh-asuhen denga i mbalmbal, Kubuat kam i je nari janah Kuban kam jadi peminpin bangsaKu Israel.+
8 Ku japa pe kam pagi lawes, Aku lit ras kam,+ janah Kutaluken pagi kerina musuh-musuh si lit i lebe-lebendu.+ Kuban pagi gelarndu bali bagi gelar kalak si terkenal si lit i doni enda.+
9 Kupilih pagi sada ingan man umatKu Israel janah Kutamaken kalak e i je. I je me kalak e pagi tading janah lanai pagi lit kai pe si ngganggu kalak e. Lanai pagi kalak e isiksa kalak jahat bagi si mbarenda.+
10 Sanga mulai Kulantik hakim-hakim guna merentah umatKu Israel,+ kalak e enggo isiksa tapi Kutaluken pagi kerina musuh-musuhndu.+ Selain si e, Kukataken man bandu, ‘Jahwe kap pagi si erban keturunenndu jadi raja.’
11 “‘“Sanga enggo seh pagi waktuna kam mate bali bagi nini bulangndu, Kulantik pagi keturunenndu jadi raja kenca kam, eme salah sada anakndu,+ janah Kuban pagi kerajanna paguh.+
12 Ia pagi si mbangun rumah man bangKu,+ janah Kuban pagi tahtana paguh seh rasa lalap.+
13 Aku pagi jadi Bapakna, janah ia jadi anakKu.+ Lalap pagi Kucidahken kekelengenKu si setia man bana,+ la bagi man kalak sope lenga kam si lanai Kucidahken kekelengenKu si setia.+
14 Kulantik pagi ia jadi raja i bas rumahKu seh rasa lalap,+ janah tahtana tahan seh rasa lalap.”’”+
15 Ipeseh Natan kerina kata-kata e ras kai si enggo idahna* e man Daud.
16 Megi si e, kundul Raja Daud i lebe-lebe Jahwe janah nina, “O Dibata Jahwe, ise kin aku enda? Ise kin keluargaku maka lakokenNdu si enda kerina man bangku?+
17 O Dibata, tempa-tempa si e ndai lenga bias, cakapkenNdu ka maka seh ngasa wari si pepagi keturunen budakNdu enda tetap denga pagi ertahan.+ O Dibata Jahwe, anggapNdu aku jadi kalak si patut imuliaken.
18 BerekenNdu kehamaten man bangku, janah tuhu-tuhu tandaiNdu kel aku. Kai nari si banci kataken budakNdu enda man baNdu kerna si e kerina?+
19 O Jahwe, lakokenNdu kerina perbahanen si mbelin enda janah cidahkenNdu kemulianNdu+ guna kepentingen budakNdu enda, janah si e bali bagi sura-suraNdu.
20 O Jahwe, kerina si begiken kami mbuktiken maka la lit si bagi Kam+ janah la lit Dibata selain Kam.+
21 Bangsa si apai kin bas doni enda si bali bagi umatNdu Israel?+ O Dibata si benar, tebusNdu kalak e janah jadikenNdu jadi umatNdu.+ BanNdu gelarNdu terkenal alu perbahanen si mbelin ras si luar biasa.+ PelawesNdu bangsa-bangsa si deban arah lebe-lebe umatNdu nari+ si enggo tebusNdu arah Mesir.
22 BanNdu bangsaNdu Israel jadi umatNdu seh rasa lalap,+ janah Kam o Jahwe enggo jadi Dibata kalak e.+
23 O Jahwe, mbera-mbera lalap tepatiNdu janjiNdu man budakNdu enda bage pe man keturunenku seh rasa lalap, mbera-mbera lakokenNdu bali bagi si enggo janjikenNdu.+
24 Mbera-mbera mbelin gelarNdu+ seh rasa lalap, gelah banci ikataken kalak, ‘Jahwe penguasa malekat kap Dibata kalak Israel, Ia kap Dibata kalak Israel,’ janah mbera-mbera keturunenku tetap lit i lebe-lebeNdu seh rasa lalap.+
25 O Dibataku, enggo pebetehkenNdu man budakNdu enda maka keluargaku jadi keturunen raja pagi. E me sebapna pang budakNdu enda bagenda ertoto.
26 O Jahwe, Kam kap Dibata si benar, janah enggo janjikenNdu kerina si mehuli ndai man budakNdu enda.
27 Mbera-mbera nggit Kam masu-masu keturunen budakNdu enda janah terus min kalak e lit i lebe-lebeNdu seh rasa lalap. Sebap enggo pasu-pasuNdu keturunenku o Jahwe, janah mbera-mbera pasu-pasuNdu keturunenku seh rasa lalap.”
