1 Kronika 19:1-19
19 Piga-piga waktu kenca si e, mate raja Ammon eme Nahas, janah anakna si nggantiken ia jadi raja.+
2 Nina Daud, “Kucidahken ateku kekelengenku si setia+ man Hanun anak Nahas, perban mbarenda enggo cidahken bapakna kekelengenna si setia man bangku.” Emaka suruh Daud kalak ndahi Hanun guna ngapuli ia perban enggo mate bapakna. Tapi sanga seh kalak si suruh Daud e bas negri kalak Ammon+ guna ngapuli Hanun,
3 nina pejabat-pejabat kalak Ammon man Hanun, “O Tuan, akapndu kin guna ngergai bapakndu maka suruh Daud kalak reh guna ngapuli kam? La lah suruhna kalak e reh gelah jadi mata-mata? La lah perdiateken kalak e atena kota enda gelah banci talukenna?”
4 Emaka tangkap Hanun pelayan-pelayan Daud e. Jenari cukurna janggut kalak e+ janah potongna uis kalak e seh ngasa awakna nari ngenca gedangna. Kenca si e, suruhna kalak e mulih.
5 Sanga ipeseh kerna si e man Daud, mis suruhna kalak si deban njumpai kalak ndai, sebap enggo seh kel melana akap kalak e. Nina raja man kalak e, “Tadinglah kena i Jeriho+ seh ngayak turah ka janggut kena, kenca si e mulihlah kena.”
6 Sanga teh kalak Ammon maka enggo segat kel ate Daud man kalak e, kirim Hanun ras kalak Ammon 34 ton 200 kilo* pirak guna newa gereta perang bage pe prajurit si erkuda arah Mesopotami,* Aram Maaka, ras Soba.+
7 Sewa kalak e 32.000 gereta perang, bage pe raja Maaka ras pasukenna. Kenca si e, reh kalak e janah erkemah i lebe-lebe Medeba.+ Rehen kalak Ammon arah kota-kotana nari. Pulung kalak e janah ersikap guna erperang.
8 Sanga begi Daud kerna si e, utusna Joap+ ras kerina pasukenna, bage pe pejuang-pejuangna si megegehna.+
9 Emaka ban kalak Ammon barisen perang i dalan masuk ku gerbang kota. Tapi paksa si e raja-raja si enggo reh, pulung i taneh si mbelang.
10 Sanga idah Joap maka reh serangen arah lebe nari bage pe arah pudi nari, pilihna piga-piga prajurit Israel si hebatna janah tamana kalak e bas barisen perang guna nyerang kalak Siria.+
11 Prajurit si debanna ipinpin Abisai, eme senina Joap.+ Suruh Joap ia ngaturken barisen perang guna nyerang kalak Ammon.
12 Nina Joap, “Adi gegehen kalak Siria+ asangken aku, arus kam reh nelamatken aku. Tapi adi gegehen kalak Ammon asangken kam, kuselamatken kam.
13 Arus kita megegeh ras perpang+ guna bangsata bage pe guna kota-kota Dibatata, janah lakoken Jahwe kari kai si mehuli akapNa.”
14 Maju Joap ras pasukenna nyerang kalak Siria, dungna kiamen kalak Siria e arah Joap nari.+
15 Sanga idah kalak Ammon enggo kiamen kalak Siria, emaka kiam ka kalak e arah Abisai, senina Joap. Jenari masuk kalak e ku kota. Kenca si e, mulih Joap ku Jerusalem.
16 Sanga teh kalak Siria maka ia enggo taluken Israel, kirimna kalak si maba berita guna ngelebuh kalak Siria si lit i daerah Lau.*+ Peminpin kalak Siria si lit i je eme Sobak, kepala pasuken Hadadeser.+
17 Sanga begi Daud kerna si e, mis pepulungna kerina pasuken Israel. Sebrangi kalak e Lau Jordan guna ndahi kalak Siria janah banna barisen perang guna ngelawan kalak e. Aturken Daud barisen perang guna ngelawan kalak Siria, janah serang kalak Siria me Daud.+
18 Tapi kiamen kalak Siria arah pasuken Israel nari. Bunuh Daud 7.000 prajurit Siria si ergereta ras 40.000 prajurit si erdalan. Janah bunuhna ka peminpin kalak e eme Sobak.
19 Sanga teh kerina pelayan Hadadeser maka kalak e enggo italuken Israel,+ mis kalak e erdame ras Daud janah patuh man Daud.+ Kalak Siria pe lanai nggit nampati kalak Ammon.
